LUKA 15 - PATHIAN LEKHABU IRTHIANG C.L. Bible (BSI)

Belra irhmang

¹ Voikhat chu khâzana irfuangtuhai le mi sual tamtakin a thu irngai hrangin an hong pana.

² Farisaihai le Dân irchutirtuhai khan, “Hi pa hin mi sualhai a’rpâlpuia, bu khom a nêkpuihai ngai,” tiin an chiara.

³ Jisua’n an kuang, hi chongirkhek thu hi an sîra,

⁴ “Nangni laia tu’n mo khatin belra irzakhat nei sianlân an laia inkhat irhmang ta sianlân, rama sômkuak kuakhai kha mâkin, ar hmang kha a hmu nôk mâka chu tu mo zong loi hrang?

⁵ A hmu nôkin chu raifân takin a dâra irput a ta,

⁶ in sûng a va tungin chu a rualhai le a kôlahai koi buk a ta, ‘Ki belra irhmang kha ki hmu nôk ta, tho ni lômpui roi,’ ti a ti.

⁷ Nangni kin hril, khaang dênin mi fel sômkuak kuak irlet nuam loihai nêkin chu, mi sual inkhat irlet chunga hin irvâna mi an lôm ual ngai.

Duli irhmang chongirkhek thu

⁸ “Khan, nupang tukhom, duli sôm neiin inkhat irhmang ta sian, meiser hâla in phîtin, a hmu nôk mâka chu tu mo sataka zong loi hrang?

⁹ A hmu nôkin chu a rualhai le a kôlahai koi buk a ta, ‘Ki duli irhmang kha ki hmu nôk tâk e, tho ni lômpui roi,’ ti a ti.

¹⁰ Nangni ki hril, khaang dênin Pathian vântirtônhai laia khan mi sual inkhat irlet chunga lômna a lûminna ual ngai,” a tia.

Nâipa irhmang

¹¹ Jisua’n an sîr zom zêla, “Mi inkhatin nâipasal inhni a neia;

¹² a nâipang ual khan a pa kuang, ‘Ka pa, ki’rchon dongtum hrang chu ni pe roh,’ a tia. Khanchu, a sum kha an kuang a semhai tâka.

¹³ Khan, nikhua sôtnotea chu, a nâi nâipang ual khan a dongtum murdi kha a lâkkhôm zita, ram dang hlataka a fe tâka; kha sum kha nuamningin a hmang inhek zoi tâka.

¹⁴ A sum nei a hmang inhek zit hnungin chu kha rama khan châmpui a tâka, fâk hrang ar sam tâka.

¹⁵ Khanchu, kha rama om mi inkhat ar hnêl tâka, ama khan a loi tianga vokhai enkol hrangin a tîra.

¹⁶ Khan, vokhai bu fâk ngai itinrênga hôk fa hrangin a’rzuka, khannisian tûte’n fa rua pe mahai.

¹⁷ “Khan, a hong inhriat suak tena chu, ka pa ina irhlo mihai bu nêk zoiloi a itam tia le te, keima lak hi hin phîngchâmin ki ithi chian hrang ma ni!

¹⁸ Thoi lik ki ta, ka pa kuang fe ta ki ta, a kuang, ‘Ka pa, Pathian chunga le ni chunga ki itho’nsual ta a ni.

¹⁹ Ni nâipaa irti inruk ni ta ma ung, irhlo ngai inkhat angin ni hmang roh, ti ki ta,’ a tia.

²⁰ “Khanchu a thoia, a pa kuang a fe tâka. Hla taka a la om laiin a pa khan a lei hmua, lung an kham tak taka, a van tâna, a poma, a tum pôt pôta.

²¹ A nâipa khan, ‘Ka pa, irvâna Pathian chunga le ni chunga thil ki tho’nsual a ni, ni nâipaa irti inruk ni ta ma ung,’ a tia.

²² A pa khan a siahlohai kuang, ‘Songkol satak kha hong la lat unglân, innghâktir roi, kutsabi inbuntir unglân, kekok khom inbuntir roi.

²³ Sehrâtchal tuai mar tak kha hong kai unglân, that roi, raifân takin hruai inthe ei ti.

²⁴ Hi ki nâipa hi a thia, a hong ihring nôk ta a ni; a’rhmanga, ei ihmu nôk ta a ni hi,’ a tia. Khanchu raifân takin hruaithe an phut tâka.

²⁵ “A nâipa ulian ual kha loia fe a hong kîrin chu, in a tung tôn chu thil tum irhai le lâm irhai kha an hriat tâka.

²⁶ Siahlo inkhat a koia, ‘Khu khu, imo a ini tâk?’ tiin ar dona.

²⁷ Ama khan, ‘Ni sangpa a hong kîra, dam taka a hmu nôk sikin ni pa’n sehrâtchal mar a ithat kêng,’ a tia.

²⁸ Khanchu, a ning an mura, in sûng lût nuam ta maka. A pa kha a va suaka, a hong inthêma.

²⁹ A pa kha a sâma, ‘Irngai roh, kumkhua’n ni ta hrangin suak sinin ki sina, ni thupêk lak pom loiin om ma unga, khan khomin ki rualhai leh lômna hrang kêlte lua ni pe ngai mak chea.

³⁰ Khannisianlân, hi ni nâipa notizuarhai kuanga ni sum hmang inchêktu hi a hong kîra, sehrâtchal mar tak ni lei that pe sa nôka,’ a tia.

³¹ “Khan, a pa khan a sâma, ‘Ki nâipa, ki kuanga om mai ni nia, ki inei murdi hi ni ta zit kêng.

³² Hi ni sangpa thi tâk hi, a ihong hring nôk ta a ni, ar hmang tâk kha ei ihmu nôk ta a ni hi te,’ raifân taka om hrang kêng ei ini,” a tia.