LUKA 14 - PATHIAN LEKHABU IRTHIANG C.L. Bible (BSI)

Jisua’n mi invûng an dam

¹ Sabat ni voikhat chu Farisaihai laia hruaitu lian inkhat ina bu nêk hrangin a fea, an lei enirchik chiana.

² Mi inkhat a ke, a kut invûng Jisua kuang a honga.

³ Jisua’n Dân irchutirtuhai le Farisaihai a chongpuihaia, an kuang, “Ei Dânin Sabat ni hin indam a phal mo, phal ma mo?” a tia.

⁴ Khanchu, anni kha an dâihreka. Jisua’n damloi kha a chela, an damtira, an fetir ta.

⁵ Khan Jisua’n an kuang, “Tu mo khatin a nâipa mani, a sehrât chal mani, Sabat ni’n tuikhura tâk sianlân, Sabat nî ni khomsian, nin ikêlsua zel loi hrang mo?” a tia.

⁶ Khannisianlân, kha thu kha tûte’n sâm thei mahai.

Irngaiintômna le irphalna

⁷ Bu nêk hranga a mi fialhai khan toina sa an irchu ngai ti Jisua’n a hmu’n chu an kuang chongirkhek thu an sîr tâka.

⁸ “Tu’n mo khat moi lôm hruaithe fa hranga nangni an fialin chu toihmun sataka toi no roi; nangni nêka mi lian a hong fial itinin,

⁹ Nin kuang, ‘Hi pa toihmun hrang hi inkian roi,’ nangni a hong tiin chu, inzak takin toihmun saloi taka nin itoi chian hrang a ni.

¹⁰ Nang an fialin chu toihmun saloi taka toiin lân, khanchu nang a fialpu kha hong a ta, ni kuang, ‘Mala, toihmun saa hin hong toi ro,’ tih a ta, khalâi ottuhai mit hmua chôiirsângin om ni ti.

¹¹ Irngaiinhlu ka kai irhniam an ta, irngaiintôm ka kai chôiirsâng ni an ti,” a tia.

¹² A fialtu kuang khom khan, “Sûna mo zâna mo hruai nin thein, ni rualhai, ni urênghai, ni parualhai le ni bôma irchonghai kha fial no roh; khano’nchu, nang fial nôkna an ta, nang thuan lele’n ti.

¹³ Hruai nin thê tikin chu inrianghai, suakinsualhai, ke’nbâihai, mitchohai fial ual roh;

¹⁴ Khanchu, satvurna dong ni ti, nang thuanna hrang nei no nihaia; mi fialhai thoinôkna tika Pathianin nang thuan a ti,” a tia.

Hruaithe roiinpui chongirkhek thu

¹⁵ A khalâi otpui inkhat khan kha kha an hriatin a kuang, “Pathian Rama hruaithe hrang chu an vânnei bâka!” a tia.

¹⁶ Jisua’n a kuang, “Mi tu’n mani hruaithe roiinpui tak a siama, mi tamtak a fiala.

¹⁷ A fâk zoro tika chu a fialhai kuang, ‘Hong ta roi, atûn hin itinrêng ar zoi ta,’ ti hrangin a siahlo a tîra;

¹⁸ An rêngin irphialna an nei chita.

¹⁹ A maton takpu khan, ‘Loi ki lâka, va en a nang; ngaihoi takin ni lei hong irphat pe roh,’ a tia.

²⁰ Mi dangin, ‘Sehrât bop ringa ki lâka, eninfel hrangin fe ki tuma; ngaihoi takin ni hong irphat pe roh,’ a tia. Mi dangin, ‘Innei zoi phing lele ki nia, hong thei no ning,’ a tia.

²¹ Siahlo kha a honga, kha thu kha a pu a hrila. A chongpupa kha a ning an mur tâka, siahlo kuang khan, ‘Fe latin lân, kholaidung haia, inkongkâr haia, fe’n lân, invâihai, kholra baicha hai, mitcho hai, ke’nbâi hai, hi hin hong hruai lût roh,’ a tia.

²² Siahlo khan, ‘Ka pu, ni thupêk ang khan tho a ni tâka, khan khomin hmun kha a la ôl mai,’ a tia.

²³ Khan a siahlo kuang, ‘Fe’n lân, lamlian haia, lam kêmhaia, mihai ki in sipna hrangin mi hong hruai inlûthai roh.

²⁴ Nang ki hril, mi ki ifialhai khan inkhat luan ki hruaithe fa no nihai,’ ” a tia.

Jisua zui intak lam

²⁵ Khan, a rualin mipui tamtak Jisua leh an fe saa, a hong irheia, an kuang,

²⁶ “Tukhom a pa mani, a nu mani a dôngma mani, a nâihai mani, a urênghai mani, a farnuhai mani, ama hringna nêk khoma lung ni thung loi chu ki irchutir ni thei no ni.

²⁷ Tukhom mâni kros irputa ni zui no chu ki irchutir ni thei no ni,” a tia.

²⁸ Nin laia tu mo in irsâng sin tumin, a toia, a sin zoina hrang sum a inei hrang le nei loi hrang insâp bak loi hrang?

²⁹ Lungphûm sia chian tâka, a sin zoi thei no’n chu a en murdi’n, innuisan an ti.

³⁰ ‘Hi pa hi in sin a phuta, sin zoi thei mah,’ ti an tih.

³¹ Khan, tu rêngin mo a mi sîngkhat leh rêng danga mi sînghni leh a doi hranga zuang, a ngam hrang le ngam no hrang toiin a ngaitua masa no hrang?

³² A doi ngam no’n chu hla vita an la om laiin irngeina thu hril hrangin palai tîr a ti.

³³ Khaang dênin nangni laia mi khom a inei murdi a mâk zit no’n chu ki irchutir ni thei no ni.

Michi dong hmangna boi

³⁴ “Michi hi a sa, khannisianlân, michi alna kha boi ta sianlân, i leh mo an in-al nôk hrang?

³⁵ Irnêng insana hrang khomin sa ta maka, nimnoka pol inruk khom ni ta maka, pai chian hrang vaiin kêng a iruk tâk. Tukhom irngaina mikuar nei murdi’n chu irngai ri sehai,” a tia.