LUKA 13 - PATHIAN LEKHABU IRTHIANG C.L. Bible (BSI)

Nin sual nin irlet no’n chu thi nin ti

¹ Kha laitaka khan tuhai mani an oma, Galili rama mi, Pathian kuang thil an inhlan laia Pilata’n a ithathai thurchi Jisua kuang an hril.

² Jisua’n a sâma, “Khaanga thata an iom kha Galili rama mi danghai nêkin an sual ual nin isôn ma ni?

³ Sual bîk mahai, nangni ki hril, nangni khom nin irlet no’n chu khaang dênin irhmang nin ti.

⁴ Khano’nte, Siloam in irsâng chimin sômhleiriat a idel thathai kha. Jerusalema mi danghai nêkin an isual bîk nin isôn ma ni?

⁵ Sual bîk mahai, nangni ki hril, nangni khom nin irlet no’n chu khaang dênin irhmang nin ti,” a tia.

Theipui raloi chongirkhek

⁶ Jisua’n hi chongirkhek thu hi an sîr saa; “Mi senkhatin grep irhuana theipui kung a phuna. A ra a zonga hmu maka.

⁷ Khanchu irhuan enkoltu kuang, ‘En roh, kum thum hi theipui kunga hin a ra ki zonga, inkhat lua hmu ma ung. Hmun vai kêng a iluana, phûrpai roh,’ a tia.

⁸ Khan, irhuan enkoltu’n, ‘Ka pu, kumin chu la om hi ri se, a’rhîlin tuk ki ta, nimnok vur ki ta,

⁹ nakum a ra’n te sa a ta, a ra no le phûrpai ni ti,’ ” a tia.

Sabat nia nupang damloi indam

¹⁰ Voikhat chu Sabat ni’n Sinagok inkhata Jisua’n ar chutirhaia.

¹¹ Nupang inkhat, kum sômhleiriat ramilhli ichel a oma, a kûn chiana, ngîr khom ngîr intûn thei maka.

¹² Jisua’n a hmu’n chu a koia, “Nupangnu, ni natna ata ni zôk ta,” a ti pea.

¹³ A chunga a kut a’rnghata, a ngîr intûn thei zôi zela, Pathian an pâk tâka.

¹⁴ Jisua’n Sabat ni’n mi an damtir sikin Sinagok hruaitu kha a sân a ning an mura, sinthôna hrang sûn ruk a oma, kha sûng khan hong unglân indam irhlôm roi ba, Sabat nî lele’n te! tiin mipuihai a hrila.

¹⁵ Rengpa khan a kuang, “Nangni vârirlethaio, Sabat ni khoma mâni sehrât chal mani, sakuartung mani sûta, a thungna hmun ata tui in hranga hruai suak loia om mo nin om?

¹⁶ Hi nu khom hi Abrahama nâinu a nia. Setana’n kum sômhleiriat dên a khit phiar tâka, kha a khitna kha Sabat ni khom ni sian sût pe hrang mo ni ma?” a tia.

¹⁷ Kha thu kha a hong insîrin chu, a râlhai kha a sân an inzaka, mipui chu a sintho roiinpui takhai sikin an lôma.

Ancham chi chongirkhek

¹⁸ Khanchu Jisua khan, “Pathian Ram chu i ang mo a ini? I leh mo ki irkhek hrang?

¹⁹ Ancham chi mal khat, mi’n a lâka, ar huana a inthek ang hi a ni; a hong mônga, thing a hong changa, chunglêng vahaiin a ôna an riak ngai,” a tia.

Chol chongirkhek

²⁰ Jisua’n ar don nôka, “Pathian Ram chu i leh mo ki hong irkhek nôk hrang?

²¹ Nupangnu’n chol a lâka, baiphit litar sômminli leh a’rzêl zita, a thoi mâka khamphulua a irpol ang kha a ni,” a tia.

Mikot irchêp

²² Jisua’n irchutir malamin Jerusalem a pana, kho lian le kho chînhai ar fang thiaia.

²³ Tu’n mani, a kuang, “Saninhringhai chu tômte vai mo an ini hrang?” a tia.

²⁴ Jisua’n a kuang, “Mikot irchêpa khan lût tum hrâm roi; nangni ki hril, mi tamtakin lût tum an ta thei no nihai.

²⁵ In neitupa a thoia mikot a kal tâkin chu, nangni’n pên tiang ngîrin, ‘Ka pu, mikot nin hong roh,’ tiin van tôk khom unglân ama khan, ‘Kho tianga mi mo nin ini nangni inhre ma ung,’ tiin nangni lei sâm a ti.

²⁶ Khanchu nangni’n, ‘Hmunkhatin fâkin ei in suam ngai khate, ki kholaihaia nir chutir ngai khate,’ la ti nin ti.

²⁷ Khannisian, ama khan, ‘Nangni ki hril, kho tianga mi mo nin ini, nangni inhre ngai ma ung; ki kuang ata rot roi, mi pualoihai!’ nangni ti nôk a ti.

²⁸ Hnôlin nin om tikin chu chapin, irkamnôi nin ta; Abrahama hai, Isaka hai, Jakoba hai le deipu murdihai kha, Pathian Rama omin hmu nin ti.

²⁹ Khan, sak le thang, sim le hmâr ata mi hong an ta, Pathian Ram hruaithe hong ot an ti.

³⁰ Irngai u ta, a hnungkhôn takhai khom a maton tak la ni an ta, a maton takhai khom a hnungkhôn tak la ni an ti,” a tia.

Jisua’n Jerusalem lung a thungzia

³¹ Kha laitaka khan Farisai senkhat an honga, a kuang, “Suakin lân, hitak ata rot roh, Heroda’n nang that a itum kêng,” an hong tia.

³² Jisua’n an kuang, “Kha sihal kha hiang hin hril roi, Irngai roh, a vuan le nangtûk hin ramilhlihai inhnot suak ki ta, damloihai khom indam ki ta, sûn thumin ki sin zoi ki ti.

³³ I khom nisian, a vuan, nangtûk le a zîng nôk dênin tho mai ki ti; Jerusalem pên tiang deipu thi ngai mah,” a tia.

³⁴ “O Jerusalem, Jerusalem, deipuhai thattu, ni kuanga tîrhai lunga lei dêng thattu! Ârpuinu’n a tehai a mitha hnuaia a iop khôm angin ni nâihai voi iza op khôm ki tuma, nin inuam loi kha?

³⁵ Khasikin, ‘Rengpa irhminga hong chu Pathianin satvur ri se,’ nin ti mâka chu nin Sinagok hi ram a ta, ni hmu nôk ta no chin ni,” a tia.