LUKA 10 - PATHIAN LEKHABU IRTHIANG C.L. Bible (BSI)

Jisua’n sômsari inhnihai a tîrna thu

¹ Kha zoiin chu, Rengpa’n mi dang sômsari inhni an thanga, a bo bopin an fena hrang kho tina le hmun tina a tîr suakhaia.

² An kuang, “Bu ât hrang a tama sintho mi lak an tôm. Khasikin, a bu ât hranga mi tîr hrangin bu Neitupa kuang ngên roi,” a tia.

³ Irngai u ta, ine laia belrate lût angin nangni ki itîr a ni.

⁴ Sum kok, hmarsa, kekok hai chôi no roi; lampuia khom tûte chubai no roi.

⁵ In nin lûtna kipa, “Hi ina hin irtharngamna om ri se,” ti bak roi.

⁶ Irtharngamna irngaiinna mi an omin chu, nin irtharngamna thu kha a chunga om mai a ta, khan an om no’n chu nin irtharngamna thu kha nin chunga hong kîr nôk a ti.

⁷ Nin tungna ina vai om unglân, in tin rôl têt tuat no roi, nangni an ipêk ka fâkin in roi, sinthotu chu a hlo hmu rua a ni.

⁸ Khua nin lûta, nangni an lômin chu, nangni an ipêk ka chu fa roi.

⁹ Kha khuahai khan damloi indam unglân, an kuang, “Pathian Ram nin kuang a zuang tung ta,” ti roi.

¹⁰ Nin lûtna khuaa nangni an lôm no’n chu tuala fe unglân,

¹¹ Nin khuaa vâiphin kin kea kop ten lua khom nin chunga kin hui nôk zit, khan khomin, Pathian Ram chu nin kuang a zuang tung ta, nin iti hrang a ni.

¹² Nangni ki hril, Pathian Roirêl nia chu, kha khua tuang hrang nêkin chu Sodom khua tuang hrang chu a zâi om ual a ti.

Irlet nuamloi khuahai

¹³ Korazin! Ni chung a rik e! Bethsaida khom ni chung a rik e! Nangnia sinirkhêl thohai kha Tura le Sidon khuaa tho ni sianlân chu, bora silin irvut irnôtin an sual ata irlet ta an ti.

¹⁴ Roirêl nîa chu nin ituang hrang nêkin chu Tura le Sidon tuang hrang chu a zâi om ual a ti.

¹⁵ Nangma Kapernaum khom, irvân dênin inpâk ni ini hrang ma ni? Hremhmuna kêng paithâk ni ini hrang.

¹⁶ Jisua’n a irchutirhai kuang, “Tukhom nin thu irngai chu, ki thu irngai a ni. Tukhom nangni hnôl chu a ni hnôl a ni, tukhom ni hnôl chu a ni tîrtu hnôl a ni,” a tia.

Sômsari inhnihai hong kîr nôk thu

¹⁷ Khan, sômsari inhnihai kha raifân takin an hong kîra, “Rengpa, nir hmingin ramilhlihai tenin kin thu an zôm,” an tia.

¹⁸ Jisua’n a sâma, “Setana irvân ata michêk anga zuang tâk ki hmu,” a tia.

¹⁹ An kuang, “Irngai u ta, mirûl, âinuvêt hai, râlpa hrâtna murdi hai sirbe theina ircham nangni ki pêk a ni, ite’n nangni inna viat no ni.

²⁰ Aniachu, irthahai nin irchamin an om sika hin lôm no roi, irvâna nin irhming irziak a ni sikin lôm ual roi,” a tia.

Jisua lômna

²¹ Kha laia khan Jisua kha Irtha Irthiangin raifânin a sipa, “Ka pa, irnêng irvân Rengpa, mi thiamhai laia ni thup khaka, mi’nmôlhai kuang nin puang ngai sikin lômthu kin sir; A ni, ka pa, khaang kha ni lungdo le ni nuamlam tak a ni.

²² Ka Pa’n itinrêng a nin koltir ta, Nâipa hi tu mo a ini, Pa ti bana chu tukhomin inhre mahai; Pa khom tu mo a ini, Nâipa le Nâipa’n a inpuang nuamhai laia ti no chu, tukhomin inhre mahai,” a tia.

²³ Khan, Jisua’n irchutirhai tiang a’rheia, inrûkin, “Hihai nin ihmu hi nin râlvân a sa.

²⁴ Deipuhai, rênghai tamtakin nin ihmuhai ang hi hmu an nuama chu hmu mahai, nin inhriathai hi inhriat an nuama chu inhre mahai,” a ti pehaia.

Samari mi sa chongirkhek thu

²⁵ Dân irchutirtu inkhat Jisua kuang a honga, a kuang, “Irchutirtu, kumtuang hringna ki nei theina hrangin imo ki itho hrang?” a tia.

²⁶ Jisua’n a sâma, “Dân bua mo a chuang? A itak mo nin itep ngai?” a tia.

²⁷ Ama khan, “ ‘Rengpa ni Pathian chu ni milung murdi’n, ni hringna murdi’n, ni hrâtna murdi’n, ni lungrîl murdi’n lung ni ithung hrang a ni; nangma lung ni irthung angin ni bômhai khom lung ni ithung hrang a ni ti hi,’ ” a tia.

²⁸ Jisua khan, “Ni sâm indik e, khaang khan tho’n lân, hring ni ti,” a tia.

²⁹ Khannisianlân, Dân irchutirtu khan thiam chang nuamin, Jisua kuang, “Tu mo ki bômhai?” a tia.

³⁰ Jisua’n kha thu kha a sâma, “Mi inkhat, Jerusalem ata Jeriko khuaa fe hrang kha, lam chimripa hrâtlâksonghaiin an lei zêma, a puan a diar an khekpai pea, an zêm bita, thi vâng vângin an rotsana.

³¹ Kha lama khan Ochai inkhat a zu fea, a hong hmu’n chu a lôi pata.

³² Khaang dênin Levia irchi mi inkhat khomin kha hmun kha a hong tunga, ama kha a hong hmu’n chu a lôi sa tâka.

³³ Samari mi inkhat inzin fe khan, kha hmun kha a hong tunga, ama kha a hong hmu’n chu lung an kham tak taka,

³⁴ a va pana, a pophai kha sahriak le uain polin a tuam pe tâka; ama sakuartung chunga ngei khan an chuangtira, khualbûka a fepuia, a enkol tâka.

³⁵ Zîng nôka chu a duli inhni a kêlsuaa, khualbûk enkoltu kha a pêka, lei enkolin lân, hi nêka hin ni thâmin chu ki zuang kîr nôk tika nang thuan ki ti,” a tia.

³⁶ “Khan, kha mi inthumhai laia a tu tak kha mo hrâtlaksonghai tongtu bômhai ni iam?” a tia.

³⁷ Ama khan a kuang, “Lunginkhamtu kha,” a tia. Jisua’n, “Nang khom khaang tak khan va tho ro,” a tia.

Jisua’n Marthi le Mari a panna

³⁸ Khan, Jisua le a irchutirhai an inzin malamin, khua inkhata an lûta, nupang a’rhming Marthi’n a ina an tungtirhaia.

³⁹ Zuarpui inkhat a neia, a’rhming chu Mari a ni, ama kha Rengpa ke bula toiin a thu’nsîr a’rngaia.

⁴⁰ Marthi chu sin zongin a buai zapa, a honga, “Rengpa, ki zuarpuinu’n ki bing doka sin hranga a ni imâk hi, ni ingaisak loi ma ni? Ni hong san sian sa no ni mo?” a tia.

⁴¹ Rengpa khan a sâma, “Marthi, Marthi, thil tamtak ni ngaituaa ni ibuai kêng.

⁴² Inkhat vai kêng a inang, Mari’n thil dik an thanga, ni isutpai hrang ni mah,” a tia.