LUKA 1 - PATHIAN LEKHABU IRTHIANG C.L. Bible (BSI)

Theofila kuang

¹ Ei laia thil zuang tung, a phut ata a hmuhai le a sinthohaiin,

² an ni ihril ang khan, mi tamtakin irziak an tum tâka.

³ Khasikin Theofil mahripom tak, a bul ata tinrêng infel zita suiin, a dônte’n ni ta hrangin irziak inlân ki iti a ni.

⁴ Tiana thurchi nang an lei irchuhai kha a dik tak a ni tih nin hriat theina hrangin.

Baptistu Johana suak hrang thu lei hrilna

⁵ Judai ram rêng Heroda ni laiin, Abija pâla mi ochai Zakaria a oma, a dôngma chu Arona irchia mi Elizabeti a ni.

⁶ An ruaiin Pathian mit hmua fel takin an oma, sêlna boiin Rengpa dân le a thu zômin an om ngaia.

⁷ Khannisianlân, Elizabeti a ching sikin nâi nei maka, an ruaiin an tar ok tâka.

⁸ Khan, sûn khat chu Zakaria kha Tempila Ochai sin a thoa.

⁹ Dân angin Tempila lûtin Rengpa maichâma mirimhoi a hâla.

¹⁰ Mirimhoi a hâl laiin mipuihai an rêngin pên tiang an lei chongchaia.

¹¹ Mirimhoi hâlna chang tianga ngîrin Rengpa itîr vântîrtôn inkhat a kuang a zuang inlâra.

¹² Zakaria’n a hmu’n chu an lâi raka a sân a chia,

¹³ Khannisianlân, vântîrtônin chu, “Zakaria, chi no roh, ni chongchaina kha inhriat a ni, ni dôngma Elizabeti’n nâipasal nang nei pe a ti, ar hming Johana phua ni ti.

¹⁴ A suakin chu nangma le mi tamtak lungrîl lômin raifân a ti.

¹⁵ Rengpa mithmuin mi lian ni a ta, uain le zu rêng rêng khom in no ni. A nu phîng sûng ata Irtha Irthiangin sip a ti;

¹⁶ Israel irchihai laia mi tamtak Rengpa an Pathian tiang hong hruai nôkhai a ti.

¹⁷ Pahai chu an nâihai irngaisaktir hrangin, mi pualoihai chu mi felhai lungrîl irput ang irput hrangin, Rengpa ta hranga a mihai hranga lei sinsiam hrangin Elija irtha dong le a sinthotheina neiin, Rengpa makunga khan a izuang masa hrang a ni,” a tia.

¹⁸ Vântîrtôn kuang Zakaria khan, “Kha kha itin mo ki inhriat thei hrang? Keima lak tar ki nia, ki dôngma lak a sân ar chang ok tâka,” a tia.

¹⁹ Vântîrtôn khan, “Kei hi Pathian makunga ngîr ngai Gabriela ki ni, nang chongpui hrang le kha thu raifânom tak kha hril hranga itîr ki ni.

²⁰ Irngai roh, a zoro taka hong tung ngêt hrang thil ki insîrhai hi tak ni sôn no sikin, a zuang tung tak tak mâka chu dâihrek ni ta, chong thei no chi ni,” a tia.

²¹ Mipuihaiin pên tiang an lei nghâka, Tempil sûnga a om sôt sikin a sân ar khêl an tia.

²² A hong suak tikin chu a chong thei ta no sikin Tempila inlârna a ihmu a nih ti an inhriata, an kuang kut veivâkin a hrilhaia, chong thei viat ta maka.

²³ A sintho zoro a hong chuk tika chu in sûng tiang a kîr tâka.

²⁴ Kha zoiin chu a dôngma Elizabeti khan nâi a vong tâka, tha ringa tual suak ta maka,

²⁵ “Mi laia ki’rhming siat tâk insa nôkna hrangin Rengpa’n lung a nin khama, hiang hin a ni itho pe ta,” a ni.

Jisua suak hrang thu

²⁶ Elizabeti nâi vong, a tha rukna’n chu Pathianin vântîrtôn Grabiela chu Galili ram Nazaret khuaa a tîra.

²⁷ Reng Davida irchia mi Josefa dôngma hual dôngmate Mari kuang thu zuang chôiin,

²⁸ Mari kuang a lûta, chubai, inditbîknu! “Rengpa ni kuang a om, sat nang a vur ok,” a tia.

²⁹ Kha thu kha an hriatin chu imo a omzia tâk, tiin a sân a char a dong tâka.

³⁰ Vântîrtôn khan, “Mari, chi no roh, Pathian ngaisakna ni dong kêng.

³¹ Inrâi ni ta, nâipasal nei ni ta, ar hming Jisua phua ni ti.

³² Mi lian ni a ta, an chung taka Pathian nâi tih an ti. Rengpa Pathianin a irchibul Davida angin Rengin siam a ti.

³³ Jakoba irchihai chunga Rengin om a ta, an laia a ramin mong nî nei no ni,” a tia.

³⁴ Khan, Mari’n vântîrtôn kuang, “Pasal lua la nei loiin te, itin mo a ini thei hrang?” a tia.

³⁵ Vântîrtôn khan a sâma, “Irtha Irthiang kha ni chunga zuang om a ta, Anchungtaka sinthotheina khan nang irhli khu a ti; khasikin nâi zuang suak hrang chu mi irthiang, Pathian Nâipa tih an ti.

³⁶ Khan, irngai ta, ni zuarpuinu, a ching an iti ngai, Elizabeti khomin a tar hnungin nâipasal a vong ta, hi tha hi a tha rukna a ni ta.

³⁷ Pathian hrangin chu tho theiloi ite zel om ma,” a tia.

³⁸ Mari khan, “Irngai ta, Rengpa suaknu ki ni, nir cham angin ki chunga tung ri se,” a tia, vântîrtôn khan a rotsan tâka.

Mari’n Elizabeti a hrôna thu

³⁹ Kha lai khan Mari kha a thoia, thingtâng, Judahai khua inkhata a fe tâka.

⁴⁰ Zakaria ina khan a hong tunga, Elizabeti kha chubai a mûka.

⁴¹ Elizabeti’n Mari chubai mûk an hriat le chu, a phînga nâite a chânga, Elizabeti kha Irtha Irthiangin a sip tâka,

⁴² Khanchu, inring takin a khêka, “Nang chu nupang laia mi vânnei tak ni ni, ni nâi vong khom mi vânnei a ni.

⁴³ Itin lama mo ki Rengpa nu, ni ni hong ihro tâk?

⁴⁴ Irngai ta, ni chubai mûkna irhâi kin hriat le chu ki sûnga nâite khom a raifân sikin a ichâng a ni.

⁴⁵ Ni kuanga Rengpa’n thu a insîr kha a tung ngêt hrang tih ni iam sikin ni vânnei e,” a tia.

Mari inpâkna hla

⁴⁶ Khanchu Mari’n, “Ki lungrîlin Rengpa a chôiindôma,

⁴⁷ Ki’rtha khom a ni saninhringtu Pathian chunga a raiinfân tak tak,

⁴⁸ A suaknu irngaiintômzia a zuang ngaisaka, Irngai ro, atûn ata chu thangthar thiaihai khomin vânnei ni tih an ti.

⁴⁹ Sinthothei Pathian khom ki chunga sin lian tak a thoa, ar hming khom a irthiang a ni.

⁵⁰ A chipuihai chu thoiinthar dênin lung an kham thiai ngai.

⁵¹ A bânin a hrâtzia an langtira, Mi lârirpâkhai chu an ngaituana an thekindarh tâka.

⁵² An toi hmuna rêng toihai kha a hnûk thâka, Nam irngaiintômhai kha a chôiirsâng tâka.

⁵³ Phîngchâmhai chu thil tui tinrêngin a vâia, Irchonghai chu kut rongin an fetira.

⁵⁴ Ei irchibulhai kuanga a inkung ang khan. A siahlo Israelhai san hrangin a zuang tâka.

⁵⁵ Abrahama le a irchihai kumkhua’n lung an khamzia inhriat maina hrangin,” a tia.

⁵⁶ Mari chu Elizabeti kuang tha thum a oma, khanchu, a in tiang a fe nôk tâka.

Baptistu Johana suak thu

⁵⁷ Elizabeti nâi nei zoro a hong chukin chu, nâipasal a neia,

⁵⁸ A bômhai le a urênghaiin, Rengpa’n a sân lung an kham ti an inhriatin chu, a sân an lômpui tâka.

⁵⁹ Khan, a sûn riat nia chu, nâitesen sertan hrangin an honga, a pa irhming dên Zakaria phua an tuma.

⁶⁰ Khannisianlân, a nu khan, “Ni mak e, a’rhming chu Johana kêng phua hrang,” a tia.

⁶¹ Annihai khan, “Hianga irhming hi nin urênghai laia khom la om ngai mah,” an tia.

⁶² A pa kha imo a’rhming phua a nuam ti kut veivâkin an irdona.

⁶³ Zakaria’n, irziakna hrang lekha phêk a zonga, a’rhming chu Johana a nih tiin a’rziaka, a sân an irngai ar khêl tâka.

⁶⁴ Voi khat rengin Zakaria kha a hong chong thei tâka, Pathian an pâk zôi ta.

⁶⁵ An kôlvêla om murdi’n an chia, kha thurchi kha Judai ram thingtâng hmun tina an thang tâka.

⁶⁶ An hriatpu dôrin, “Hi nâite hi itin takin mo a la hong iom hrang na! Rengpa Irtha laka a chunga a oma,” an tia.

Zakaria hla

⁶⁷ Johana pa Zakaria kha Irtha Irthiangin a sipa, hiang hin a tia;

⁶⁸ “Rengpa, Israelhai Pathian chu inpâkin om ri se, A mihai san hrangin a zuanga, an zôkhai tâka.

⁶⁹ A siahlo Davida irchi ata ei ta hrangin saninhringtu roiinpui tak an ding ta.

⁷⁰ Tianlai deipu irthianghai bâia a insîr tâk angin.

⁷¹ Ei râlhai le a ni khôkmâktuhai ata, nin zôktu hrang chu,

⁷² Ei irchibulhai lung an khamzia an langtira, A thuthung irthiang an hriat mai a ni.

⁷³ Ei pu Abrahama kuang thu an kung khaka,

⁷⁴ Ei râlhai ata a ni sana, chi loia a sin ei tho theina hrang thu kha.

⁷⁵ Ei hring sûngin a mit hmua, Irthiang le fel taka ei om theina hrangin.

⁷⁶ “A ni, ki nâi, nang hi Anchungtak Pathian deipu nang la ti an ti. A lampuihai sinsiam hrangin Rengpa maton tiang lei fe ni ti.

⁷⁷ An sualhai ngaidamin, a mihai kuanga saninhring thu inhriattir hrangin.

⁷⁸ Ei Pathian chu inrenna le lungkhamnaa sip a nia, Khasikin, chung tiang ata saninhringna misa vâr chu ei chunga insuaktir a ta,

⁷⁹ irvân ata vârin, inthim le thina dâihlim hnuaia omhai êl invâr a ta, Irtharngamna lama kal nin chôitir a ti,” a tia.

⁸⁰ Khan, nâite kha taksa le irtha tianga ar sôn tîr tîra, Israel mipuihai laia an lâr mâka chu, ramchâra a om maia.