LEVI DÂN 9 - PATHIAN LEKHABU IRTHIANG C.L. Bible (BSI)

Arona’n irbôlna a inhlan

¹ Sûn riat niin chu Mosia’n Arona le a nâihai kha Israel ulianhai leh a koihaia.

² Arona kuang, “Belrachal tuai le belrachal hmêlveiloi kaiin lân, sehrât kha sual irbôlna thilinhlana Rengpa kuang inhlanin lân, belra chu hâlirvôm thilinhlana inhlan roh.

³ Israel mihai khan sual irbôlna thilinhlana kêlchal hong chôihai sianlân; sehrâtte le belrate, kum khat vêl ang, hmêlveiloi hâlirvôm hrangin hong chôi sa ri sehai.

⁴ Sehrâtchal le belrachal, irpôlkhômhai hrangin hong chôi sianlân, bu le bâl thilinhlan sahriak leh irpol Rengpa kuang hong inhlan sa ri se. A vuan hin kei, Rengpa hi, nin makunga ki hong inlang hrang a ni,” a tia.

⁵ Mosia thupêk angin irtongna puan in mikota, khahai kha hong chôiin lân, nam pumpui chu Rengpa chubai mûk hrangin an pungkhôma.

⁶ Mosia khan an kuang, “Hi hi tho hrangin Rengpa khan thu nangni a ipêk a ni. Rengpa roiinpuina vâr kha a zuang inlang hrang a ni,” a tia.

⁷ Khan, Arona kuang khan, “Maichâma ni sual irbôlna hrang le hâlirvôm thilinhlan chu inhlan ro, mipui sual irbôlna hrang khom inhlan sa roh. Rengpa thupêk angin mipui sual irbôlna kha inhlan pehai ro,” a tia.

⁸ Arona chu maichâma a fea, ama sual irbôlna sehrâtchal tuai kha a thata.

⁹ A nâihai khan a thisen an hong lâk pea, a kutchal an chiea, maichâm kil irkia khan an pola, a ipol ban chu maichâm kôla a bunpaia.

¹⁰ A thâihai, a bê inhni, a mithin tuam a râng sa laitakhai kha Mosia kuang Rengpa thupêk angin maichâma khan a hâla.

¹¹ A vun le hme rêk chu riakna hmun pên tiang a hâlirvôma.

¹² Ama hranga hâlirvôm thilinhlan khom kha a thata, a thisen kha a nâihaiin an hong lâk pea, maichâma an thek irvêla.

¹³ A lu le a hme dang khom an hong chôia, maichâma a lei hâla.

¹⁴ A sûngkua le a kehai kha a’rsûk infâia, maichâma hâlirvôm thilinhlan chunga khan a hâl tâka.

¹⁵ Kha zoi chu mipui thilinhlan kha an hlan tâka. Mipui sual irbôlna thilinhlan kha a thata, ama sual irbôlna a inhlan ang takin a thoa.

¹⁶ Hâlirvôm thilinhlana inhlan hrang sa khom kha a tho hrang lam dân angin a thoa.

¹⁷ Bu le bâl thilinhlan baidi kha a hapa, maichâma khan a hâl saa.

¹⁸ Irpôlkhômhai thilinhlan sehrâtchal le kêlchal, mipuiin an hong ichôi kha a thata, sa thisen kha a nâihaiin an hong chôia, maichâm kha an thek irvêla.

¹⁹ Arona khan sehrâtchal le belrachal mar, belrachal pin thâi tak le a hlap thâihai, a bêhai, a mithin tuamtu a rânghai kha an pêk saa,

²⁰ a mier chunga khan a siaa, khan ama khan a thâi kha a hâla,

²¹ Mosia ihril angin a mier le a mal chang tianga kha ochaihai hrangin Rengpa makunga ngaihoi thilpêkin a hong inhlana;

²² Arona’n hihai hi an hlan zoiin chu mipui chunga a kut a phara, satvurna a hrila, maichâm ata a zuang chum tâka.

²³ Mosia le Arona kha irtongna puan ina khan an lûta, an hong suakin chu mipui hrangin satvurna kha an hrila. Rengpa roiinpuina vâr kha mi murdi chunga a hong irlang ta.

²⁴ Rengpa kuang ata mei a hong suaka, maichâma hâlirvôm le a hme thâihai kha a hong kâng irhmang tâka. Mipuiin kha kha an hmu’n an khêka, khûksadelin irnênga an inbok tâka.