LEVI DÂN 8 - PATHIAN LEKHABU IRTHIANG C.L. Bible (BSI)

Arona le a nâihai ochaia namindetna

¹ Rengpa khan Mosia kuang:

² “Arona le a nâihai kha irtongna puan in lûtnaa honghai sianlân, ochai tukfam pol hrang sahriak hai, sual irbôlna hrang sehrâtchal tuai hai, belrachal inhni le chol kop loi bai, kokin hong chôi ri se.

³ Israel pungkhômhai chu koi zit ro,” a tia.

⁴ Rengpa thupêk angin Mosia’n a thoa, an hong irchunkhôm zoiin chu an kuang,

⁵ “Ei itho hrang hi Rengpa thupêk a ni,” a tia.

⁶ Mosia’n Arona le a nâihai kha a hong hruaia, dân angin tui a’rsiltirhaia.

⁷ Songkol hnuai, songkol irfualhai an nghâktira, kongkhit an khittira. Efod an nghâktir saa, a khitna sataka phan khan a konga a khitdela.

⁸ Rôp irbel kha a’rbela, Urim le Thumim khom kha a siaa.

⁹ Diar kha an kaitira, a michala rângachak phêk, Rengpa dongtum ti irziakna kha a’rbela. Khahai kha Rengpa thupêk angin a tho zita.

¹⁰ Mosia’n sahriak pol zât kha a lâka, kairêng le a sûnga om murdi kha an mâia, a’rthiangtira.

¹¹ Sahriak chimrip khan maichâm le a bêlbûr hai, thîr tâbor le dônahai kha irthiangtirna hrangin voisari an theka.

¹² Sahriak chimrip chu Arona lua a buaka, a ser irthiang tâka.

¹³ Arona nâihai khom kha Mosia’n a hruaia, songkol chial an nghâktira, kongkhit an khittira, lukhum an khumtir saa, khahai kha Rengpa thupêk angin a itho a ni.

¹⁴ Mosia’n sual irbôlna sehrât kha a kaia, Arona le a nâihai khan a lua an kut an irnghata.

¹⁵ Mosia’n a thata, a thisen chimrip chu a kut chalin maichâm kil irkihai khan irthiangtirna hrangin a nâla, a inâl ban chu maichâm kôla a bunthuana, khaang khan maichâm kha a sera, a irthiangtir a ni.

¹⁶ Mosia’n a sûngkua a rîl thâi murdi, a mithin le a milunghai, a bêhai le a thâihai kha maichâma khan a hâla.

¹⁷ Rengpa thupêk angin a vun, a taksahai, a rîlhai kha riakhmun pên tiang a hâla.

¹⁸ Hâlirvôm thilinhlan hrang belra khom kha Mosia’n a kaia, Arona le a nâihai khan a lua an kut an irnghata.

¹⁹ Mosia’n a thata, maichâm kha thisen khan an thek kuala.

²⁰ Rengpa thupêk angin belra kha a’rchanchita, a lu le a taksahai le a thâihai chu a hâla.

²¹ A sûngkua le a kehai kha a’rsûka, belrachal kha maichâma a hâl zit tâka. Hâlirvôm thilinhlan a ni, kha kha mirimhoi tak hranga hâlirvôm thilinhlan a nia; Rengpa ta hranga meia thilinhlan chu a ni, Rengpa’n Mosia thu a ipêk ang khan.

²² Mosia’n belra inkhat ochai namindetna kha a kaia. Arona le a nâihai khan a lua an kut an irnghata.

²³ Mosia’n a thata, a thisen chimrip kha Arona mikuar chang tiang hmora khan a pola, a kutpui chang tiang le a kepui chang tiang hmora khom a pola.

²⁴ Arona nâihai khomin an hong pana, an mikuar chang tiang hmora, an kutpui le kepui chang tiang hmorhaia a lei pol pehai saa, a ipol ban chu Mosia’n maichâma inthekna hrangin a ihmang a ni.

²⁵ Belra mar, a pin thâitak-hai, a rîl thâi tuamhai, a mithin tuamtu a rânghai, a bê inhni le a thâi kophai le a mal chang tianga kha a lâka.

²⁶ Rengpa kuang bu le bâl thilinhlan, chol koploi bai tang khat le bai, sahriak le inhmethai, bai irphân sahriak nâlhai kha chu sathâi le a mal chang tiang chunga khan a siaa.

²⁷ Arona le a nâihai kuta an hlana, Rengpa makunga khan a vôka, an hlana.

²⁸ Mosia’n khahai kha a lâk nôka, hâlirvôm thilinhlan chunga namindetna thilinhlana a hâl tâka. Hi hi fa hrang thilinhlan a ni; kha kha Rengpa lôm lam tak a ni.

²⁹ Mosia’n a mier kha a lâka, Rengpa makunga khan a thâra, an hlana: kha kha ochai namindetna belra ata Mosia dongtum chu a ni sa. Rengpa thupêk ang khan Mosia’n itinrêng a tho zita.

³⁰ Mosia’n sahriak pol hrang senkhat chu maichâma inthek thisen chimrip leh khan a lâka, Arona le a nâihai kha an songkolhaia an theka. Khaang khan an songkolhai le Rengpa ta hranga ser irthiang tâk an ni.

³¹ Mosia’n Arona le a nâihai kuang, “Irtongna puan in mikot kôla a hme hi la unglân, but unglân, koka namindetna thilinhlan bai leh khan Rengpa thupêk angin fa roi.

³² Nin ifâk ban kha, hme khom bai khom hâl zit hrang a ni.

³³ Namindetnaa tho hrang tho zoi zit a ni hnungin, sûn sari sûng chu irtongna puan in ata pên tiang nin isuak hrang ni mah.

³⁴ Rengpa thupêk angin khahai kha nin sual irbôlna hrangin ki itho a ni.

³⁵ Rengpa thupêk ang khan sûn sari le zân sari irtongna puan in lûtna kôla nin iom hrang a ni. Nin om nuam no’n chu thi nin ti, kha kha Rengpa thupêk a ni,” a tia.

³⁶ Khanchu, Arona le a nâihai khan Mosia kuanga Rengpa thupêk murdi kha an tho zit tâka.