LEVI DÂN 5 - PATHIAN LEKHABU IRTHIANG C.L. Bible (BSI)

Sual irbôlna inhlan ngêt hrang thilhai

¹ Hiang thila hin sual irbôlna inhlan a nang. Roirêlna hmuna thu’nhriatnaa koi a ni’n chu a thil hmu mani, a thil inhriat mani inpuang hranga ti a nia, an puang nuam no’n chu thilsual a tho a ni, a moh a iphur hrang a ni.

² Mi’n thil irthiang loi, sâ a ruakhai, a lian mani a chîn mani ramsa irthiangloi ruakhai mani a tôn palin chu thilsual a itho a ni; an hriat suakin chu a mô chu a ipêl hrang a ni, porinche sa a ti.

³ Mihriam ata suak, thil irthiangloi rêng rêng a tôn palin chu a thiltho chu dik mah ti an hriat zoi le a irthiang zôi zel a ni.

⁴ Mi’n thil sa mani saloi mani tho hrangin irngaitua sabak loiin khuasâl sianlân, a thiltho chu a’rngaitua sabak zoi tika vai a tho’nsual mô kha pêl ta a ti.

⁵ Mi’n thilsual a tho’n chu, a thilsual tho kha irphuang a ta,

⁶ a thilsual tho hremna hrangin Rengpa kuang belra mani kêl mani, a pui, a hong inhlan hrang a ni. Ochai chu kha mi sual irbôlna kha a inhlan pe hrang a ni.

⁷ Belra mani kêl mani a nei no’n chu a sual mana pêkin Rengpa kuang vasu inhni mani phervali inhni mani a hong inhlan hrang a ni. Inkhat chu sual irbôlna thilinhlan ni a ta, inkhat chu hâlirvôm thilinhlan hrangin ni a ti.

⁸ Ochai kuang hong lâk a ta, sual irbôlna kha a inhlan masa hrang a ni. Tan nghet loiin a ringa khiak a ti,

⁹ a thisen chimrip chu maichâm panga inthek a ta, maichâm kôla a thisen kha a inzung zoi hrang a ni. Hi hi sual irbôlna thilinhlan a ni. Inkhat chu dân angin hâlirvôm thilinhlana a inhlan hrang a ni.

¹⁰ Khaang ochai khan mi thilsual tho irbôlna kha inhlan a ta, ngaidam ni ta a ti.

¹¹ Vasu inhni mani phervali inhni mani khom a nei no’n chu sual irbôlna thilinhlan baidi sa zât her khat a hong inhlan hrang a ni. Oliv hriak mani bero mani a hong ipol sa hrang ni ma; hâlirvôm thilinhlan ni maka, sual irbôlna thilinhlan a ni.

¹² Ochai kuang hong chôi a ta, fâk hrang thilinhlan angin Rengpa kuang inhlan zit a ni entîrna hrangin senkhat lei hap a ta, maichâma fâk hrang thilinhlan angin hâlirvôm a ti. Sual irbôlna thilinhlan a ni.

¹³ Khaang khan thilsual thôtu hrangin ochai khan lei inhlan pe a ta ngaidam ni a ti. Bu le bâl thilinhlan ang dênin a ihâl ban baidi chu ochai dongtum hrang a ni.

Tho’nsual man thilinhlan

¹⁴ Rengpa’n Mosia kuang:

¹⁵ “Mi’n Rengpa dongtum thil ser chu pe no lik sianlân, thilsual a itho a ni. A thilsual tho man thilinhlan Rengpa makunga belra mani, kêl mani, a chal, hmêlveiloi a hong ichôi hrang a ni, sa man zât chu biak ina dân hmang lai anga sût hrang a ni.

¹⁶ A ipêk loi zât irphu chu pe a ta, khabana hmun ringaa hmunkhat a ipêk bel hrang a ni. Ochai kuang pêk a ta, belrate kha ama’n tho’nsualna man thilinhlana lei inhlan pe a ta, ngaidam ni a ti.

¹⁷ “Tho loi hrang thua Rengpa thupêk hi tho pal sian thilsual a itho a ni, a mô kha pêl a ti.

¹⁸ Ochai kuang tho’nsual man thilinhlan hrangin belra mani kêl mani, a chal, hmelveiloi a hong ikai hrang a ni, sa man bi zât chu biak ina dân hmang lai anga sût hrang a ni. Ochai khan tho’nsual man thilinhlan kha a thil tho’nsual pal irbôlna hrangin lei inhlan pe a ta, sual kha ngaidam ni a ti.

¹⁹ Rengpa ata a tho’nsual man thilinhlan a ni,” a tia.