LEVI DÂN 4 - PATHIAN LEKHABU IRTHIANG C.L. Bible (BSI)

Sual irbôlna

¹ Rengpa’n Mosia chu a chongpuia.

² Israel nâihai hril ro, mi tukhomin Rengpa thupêk an tho’nchâiin chu hianga tho hrang a ni.

³ Thil tho’nsualtu chu ochai inlaltak a nia, mipuiin a sual mô an pêl hrangin chu, a sual irbôlna’n sehrâtchal tuai, hmêlveiloi, Rengpa kuang a inhlan hrang a ni.

⁴ Rengpa makunga, irbiakna puan in mikota, sehrâtchal tuai chu hong kai a ta, a lua a kut irnghat a ta, a ithat hrang a ni.

⁵ A thisen senkhat chu chôi a ta, irbiakna puan in sûnga lûtpui a ta,

⁶ a kut chalin hmun irthiang puan zâr kha thisen khan voisari inthek a ta,

⁷ mirimhoi hâlna maichâm kôla a ibuakpai zit hrang a ni.

⁸ Sehrât mar, a rîl thâi murdihai,

⁹ a bêhai le a thâi a mithin tuam râng thâi sa lai takhai.

¹⁰ Ochai khan la a ta, a thâihai kha irpôlkhôm thilinhlan tho dân ang khan hâlirvôm inhlanna maichâma a ihâlirvôm hrang a ni.

¹¹ A vunhai, a takhai, a luhai, a kehai, a sûngkua murdi le a rîlhai le

¹² riakhmun dâi pên tiang hmun ser, maichâm irvut pai khômnaa, meipuia inchepin a ihâlirvôm hrang a ni.

¹³ Israel nam pumpuiin tho’nsual an tho tika, inhresuak zoi loiin Rengpa thupêk an porinchetirin chu,

¹⁴ an tho’nsual tho kha an irhriat suak zoi le, nam punghai khan sual irbôlna hrangin sehrâttuai kha irbiakna puan in mikota an hong ilâk hrang a ni;

¹⁵ nam hruaituhaiin chu a lua kut irnghat an ta, that hrang a ni.

¹⁶ Ochai inlaltak khan sehrât thisen kha irbiakna puan ina chôi lût a ta,

¹⁷ hmun irthiang tak puan zâr chu voisari a kut chalin thisen kha a inthek hrang a ni.

¹⁸ Puan in sûnga mirimhoi hâlna maichâm kila a’rkia khan thisen pol sa a ta; puan in mikota thilinhlan hâlna maichâm kôla a zôk ban chu a ibunpai hrang a ni.

¹⁹ A thâihai kha maichâma khan a ihâlirvôm hrang a ni.

²⁰ Sual irbôlna sehrâttuai a isinsiam ang khan a itho zit hrang a ni, mipui sual irbôlna kha a inhlan hrang a ni; khanchu, an sual kha ngaidam ni ta a ti.

²¹ Sehrâttuai kha riakhmun dâi pên tianga, ama sual irbôlna ang khan, a ihâlirvôm hrang a ni. Hi hi nam pumpui sual irbôlna thilinhlan hen hrang lam chu a ni.

²² Roirêltu’n thilsual a tho’nchâia, Rengpa thupêk a tho’nchâiin chu,

²³ a thilsual tho kha an hrila, an hriatsuak zoi le, a sual irbôlna hrangin kêlchal, hmêlveiloi a inhlan hrang a ni.

²⁴ Kêl lua a kut irnghat a ta, maichâm hmâr tiang, hâlirvôm thilinhlan an thatna hmuna khan a itan that hrang a ni.

²⁵ Ochaiin a thisen kha lâk a ta, a intât ban chu maichâm kôla khan a ibunpai hrang a ni.

²⁶ A thâi murdi chu irpôlkhôm thilinhlan, a itho angin maichâma khan a ihâl irvôm hrang a ni; khaang kha roirêltu sual irbôlna ochaiin a inhlan hrang dân chu a ni; khanchu, a sual chu ngaidam ni a ti.

²⁷ Mi narânin thilsual a tho’nchâia, Rengpa thupêk a porinchetirin chu,

²⁸ a thilsual tho a’rhriatsuak zoi le kêlpui hmêlveiloi, a sual irbôlna hrangin a hong inhlan hrang a ni.

²⁹ Kêl lua kut irnghat a ta, hâlirvôm maichâm hmâr tiang, hâlirvôm thilinhlan an ithatna hmuna khan a ithat hrang a ni.

³⁰ A thisen chu ochaiin maichâm kil irkihaia khan a kut chalin intât a ta, a intât ban chu maichâm kôla a ibunpai hrang a ni.

³¹ A thâi murdi chu irpôlkhômhai thilinhlana itho ang taka khan maichâma a ihâlirvôm hrang a ni; kha kha Rengpa nuamlam tak a ni. Khaang khan thilsual thotu sual irbôlna chu inhlan a ta, ngaidam ni ta a ti.

³² Sual irbôlna hrangin belra a hong chôiin chu, a pui, hmêlveiirla loi a ini ngêt hrang a ni.

³³ Belra lua khan a kut irnghat a ta, hâlirvôm thilinhlana an ithatna hmun, maichâm hmâr tianga khan a itan that hrang a ni.

³⁴ A thisen kha hâlirvôm maichâm kil irkihaia khan a kut chalin ochai khan thisen kha nâl a ta, a inâl ban chu maichâm kôla a ibunpai hrang a ni.

³⁵ Irpôlkhômhai thilinhlan belra ang khan a thâi murdi kha la a ta, Rengpa hranga bu le bâl thilinhlan leh khan a ihâlirvôm hrang a ni. Khaang khan sual irbôlna kha ochai khan inhlan pe a ta, a sual chu ngaidam ni tah a ti.