LEVI DÂN 27 - PATHIAN LEKHABU IRTHIANG C.L. Bible (BSI)

Rengpa kuanga thilpêk chungchâng

¹ Rengpa’n Mosia kuang:

² “Israel mihai kha hril ro: mi’n Rengpa kuang mihriam kha pêk inkung sianlân, kha mihriam irphutôk inkung kha Rengpa dongtum ni a ti.

³ pasal, kum sômhni ten, kum sômruk dênin, sumru sekel sômringa varh ni a ti.

⁴ Nupang puihling tâk chu sumru sekel sômthum varh ni a ti.

⁵ Pasal nâipang, kum ringa ten kum sômhni dênin sumru sekel sômhni varh ni a ta, nupang a niin chu sumru sekel sôm varh ni a ti.

⁶ Nâitesen tha khat tena kum ringa dênin pasal chu sumru sekel ringa varh ni a ta, nupang chu sumru sekel thum varh ni a ti.

⁷ Kum sômruk chung tianga pasal chu sumru sekel sômhlei ringa varh ni a ta, nupang chu sumru sekel sôm varh ni a ti.

⁸ A pêktu chu a sân an riang sikin a’rtansuakna man tuk dôr khi a pêk thei no’n chu pe hranga a inkung mihriam kha ochai kuang hong hruai a ta, ochai khan bituk nêka tôm ual, a pêk thei hrang dôr irhoi, lei tuk pe a ti.

⁹ Rengpa kuang thilinhlana hmangrua mi’n sa pe hrangin an kungin chu Rengpa kuanga pêk chu ser irthiang khak a ni ta.

¹⁰ A pêktu khan a pêk suana hrang mani, a nêka thil dang mani pe thei ta no ni; khaanga tho a tumin chu a ruaiin Rengpa ta hrang ni a ti.

¹¹ Sa, fâk irthiangloi zât, Rengpa kuang thilinhlana hmang loi chi a pêkin chu ochai kuang hong kai a ta,

¹² ochai khan a man hrang zât a bi lei tuk a ta, khaang dôr kha a mana tep hrang a ni.

¹³ A pêktu khan irtan a nuamin chu a man bituk dôr le, kha hmun ringaa hmun khat bêlin irtan thei a ti.

¹⁴ Mi’n ama in ngei Rengpa kuang pêk inkung sianlân, ochaiin a in kha a sa le saloia zirin a man inrît a ta; a inrît dôr kha in man hrangin tep ni a ti.

¹⁵ A in kha irtan a nuamin chu a man inrît dôr kha pe a ta, hmun ringaa hmun khat a ipêk belsa hrang a ni.

¹⁶ Mi’n ama ram chimrip Rengpa hrangin pêk an kungin chu chîmu a isonga zirin a man chu inrît ni a ta; barli tîn sômminli suakna kha sumru sekel sômringa varh mânin tep ni a ti.

¹⁷ Jubili kum zoi renga pêk a niin chu a man chuka tep hrang a ni.

¹⁸ Kum danga pêk a ni’n chu ochaiin Jubili dênin i dôr mo rama suak thei ti insâp a ta, khaanga khan a man chu ti hrang a ni.

¹⁹ A neitu khan ram kha a’rtan nuamin chu a man ti dôr kha pe a ta, hmun ringaa hmun khat a ipêk bel hrang a ni.

²⁰ A loi kha ama’n a’rtan nuam no’n mani, mi dang irchotir mani a ni’n chu irtan thei ni ta no ni.

²¹ Jubili kuma chu ram kha Rengpa tah hrangin ser a ni tâka, pêk a ni tâk sikin ochai ta hrang a ni ta.

²² A ram irchôk, a dongtum ram ni loi, a pêkin chu,

²³ ochaiin Jubili dênin a man insâp a ta, kha ni ngêta khan a chimrip kha pe a ta, a poisa chu Rengpa ta a ni.

²⁴ Jubili kuma chu a neitu kuanga khan mani, a’rchihai kuang mani, pêk kîr nôk hrang a ni.

²⁵ Hi thil man insâp hi tempil varh lung tianlai anga insâp hrang a ni. Sekel khat kha Gera sômhni dôr a ni.

²⁶ Sa suak masatak chu Rengpa ta sai a nia, nuam thilinhlana mani pe hrang ni ma: sehrâtte khom kêlte khom Rengpa ta sai a ni.

²⁷ Sa fâk irthiangloi ata masatak rêk chu a man inrît dôr le hmun ringaa hmun khat belin irtan thei a ni; a pêktu’n a’rtan nuam no’n chu mi dang kuang a man inrît ang khan zuar hrang a ni.

²⁸ Rengpa ta hrang lele mi’n a inei ang ang, mihriam mani, sâ mani, a dongtum ram mani, a iser tâk chu zuar thei ni ma, irtan thei ni ma, kumkhua’n Rengpa ta ni ta a ti.

²⁹ Mihriam khom nisian, khaanga pêk tâk chu irtansuak thei ni ta ma, thatpai hrang a ni.

³⁰ Loi ram ata hong suak rêng rêng, bu khom, thei khom, sôma inkhat chu Rengpa ta a ni.

³¹ Mi’n kha kha a’rtan nuamin chu a man pangai bana hmun ringaa hmun khat pêk belin irtan thei a ti.

³² Sa vâi rêng rêng sôma inkhat chu Rengpa ta a ni.

³³ Sa neitu khan a sisiat sômnaa a isia hrang ni ma, a sa ual kha a siat ualin thûl hrang ni ma, thûl a tumin chu Rengpa ta ruruai ni a ta, irtan thei khom ni no ni.

³⁴ Hi thupêk hi Sinai tânga Mosia kuanga Israelhai hrangin Rengpa ipêk a ni.