LEVI DÂN 25 - PATHIAN LEKHABU IRTHIANG C.L. Bible (BSI)

Kum sarina

¹ Sinai tânga Rengpa khan Mosia kuang,

² “Israel mihai kha hril ro, nangni ki ipêk hrang ram nin tung tika chu Rengpa chôiindômna hrangin a kum sarina kipa ram kha inôltir hen roi.

³ Kum ruk sûng chîmu song nin ta, nin grephai sât nin ta, a ra irhmal nin ti.

⁴ A kum sari kum rêk chu Rengpa chôiindômna hrangin inôltir pat hrang a ni, nin loihaia chîmu song no roi, nin grephai sât irnoitir no roi.

⁵ Ni bu faôi khom nin i-ât hrang ni ma, ni ienkol loi grep khom nin irhmal hrang ni ma: ram inôltir kum a ni.

⁶ Ram chu inôltir khom unglân, nin suakhai hrang, irhlofâk nin ihmanghai hrangin, nam dang nin iompuihai le nin ta hranga fâk hrang chu om dên a ti.

⁷ Nin sâ vâihai, nin ramsahai ta hrang khom fâk hrang om dên a ti.

Pêkkîr kum Jubili

⁸ Kum sari a bâk sari, kum sômminli kum kuak a hek kum

⁹ tha sari, tarik sôm ni, sual irbôlna nikhua roiinpuia khan mi tîr unglân, ram pumpuia bekul tum ri sehai.

¹⁰ Kum sômringana chu lôm nin ta, ram sûnga om murdihai hrangin zalênna thu nin inpuang hrang a ni, nin ta hrangin Jubili kum ni a ti. In le loi zuar tâk murdi chu a neitu kuang mani, a’rchihai kuang mani, pêk kîr nôk hrang a ni, suaka zuar tâk khom an isuak zit hrang a ni, mâni in le loia kîr nôk an ti.

¹¹ Kha kuma khan ite nin isong hrang ni ma, faôi nin i-ât hrang ni ma, nin grep sat irnoi hong ra khom nin ilâk hrang ni mah.

¹² Kumtuangin kha kum kha nin ta hrangin kum ser ni a ta, nin loia hong suak kha nin ifâk hrang a ni.

¹³ Hi Jubili kuma hin mâni ram seng nin inei kîr nôk hrang a ni.

¹⁴ Khasikin, ram nin zuarin mani, nin lâkin mani, nir chi chanpui Israel mi chu irhoiloi takin ni ilo hrang ni mah.

¹⁵ Jubili kum a tung mâna, rama chîmu hong suak thei hrang dôr insâpin, a ram man chu sût hrang a ni.

¹⁶ kum a la tamin chu a man a ipung hrang a ni; ram kha zuar tak tak ni maka, chîmu thar thei vai kha zuar thei a ni.

¹⁷ Nin Israel chanpuihai huang no roi, Pathian chi roi, kei hi Rengpa nin Pathian ki ni.

Kum sari kuma fâk hrang

¹⁸ Rengpa dân hi zôm unglân, a thupêkhai hi zôm unglân, kha rama khan chardong loiin nin iom hrang a ni.

¹⁹ Rama chîmu irzir intam a ta, nin inuam do dôr fâk hrang nei nin ta, irtharngam takin om thei nin ti.

²⁰ A kum sari kum chu ite ei song noa, ei ât ual no’n chu imo ei ifâk hrang? nin iti a ni thei.

²¹ A kum rukna ram chu satvur ki ta, kum hni fâk hrang suak a ti.

²² kum riatnaa chîmu song ra nin ât mâka chu kum ruknaa suak kha nin iruk hrang dôr om a ti.

²³ Nin ram chu zuarpai thei no chin ni, ram chu ki ta a ni; nangni chu mikhual nin ni.

²⁴ Ram chu nin izuar a ni khomin a neitu khan a irchôk kîr thei ngêt hrang a ni.

²⁵ Israel mi chu a sân an rianga, a ram zuar nang rak a ni khomin a’rnâipui urêngin a irtan hrang a ni.

²⁶ Lei irtan hrangtu urêng irnaipui neiloi chu, ama a hong irfûk irhniang theia, ama ngêtin a’rchôk kîr nôk thei hrang a ni.

²⁷ Khaang thila chu Jubili kum tung mâka chu chîmu thar thei zât man insâpin irchôk kîr thei hrang a ni, Jubili kum chu a inei kîr nôk dên hrang a ni.

²⁸ Ram ircho kîrna hrang poisa a nei zoi no’n chu a’rchôktu khan Jubili kum dênin nei a ta, Jubili kum chu a neitu chongpu kha a ipêk khîr nôk hrang a ni.

²⁹ Kul nei khopuia in neiin a in kha a zuarin chu a zuar ata kum khat sûng khan irtan nôk thei a ti.

³⁰ Kum khat sûnga a’rchôk kîr thei no’n chu irchôk kîr thei nôk ni ta no ni, a’rchôktu khan a’rchihai dênin a in kha nei thei ta a ti; Jubili kuma khom pêk khîr hrang ni mah.

³¹ Khua kulnei loi, thingtâng khuaa in chu ram nin irchôk anga bê hrang a ni, a neitu kuang khan irchôk kîr thei a ta, Jubili kuma pêk kîr nôk dên hrang a ni.

³² Levia irchihai rêk chu an omna hrang inkung khuaa an thil nei chu itiklai khomin irchôk kîr nôk thei an ti.

³³ Hi khuaa om Levi irchihaiin in an izuar chu ircho kîr thei no khomhai sian, Jubili kuma chu pêk kîr nôk hrang a ni; Levi chihai an omna hrang inkung khuaa an in nei chu Israelhai laia an kumkhua thil nei indet tak an ni sikin.

³⁴ Levi irchihai khua kôla sâ lêngna hmuna chu itiklai khomin zuar hrang ni ma, thil an inei indet omsun a ni.

³⁵ Nin urêng Israel, ni kôla om chu, a sân a lei hong inrianga, mâni khom a’rfâ thei no’n chu irhlofâk angin mani, mikhual angin mani ni ienkol hrang a ni; khanchu, ni kôla a iom sa mai hrang a ni.

³⁶ A kuang ata a pung irzûl no ro, Pathian chin lân, ni urêngpa chu a bingin a hong iom thei hrang a ni.

³⁷ Poisa nin pûktir khomin inpungtir no’n lân, ni bu a’rchôkin ite hlep no roh.

³⁸ Kanaan ram hi nangni ki pêka, nin Pathian ni hrangin Aigupta ram ata nangni hruai suaktu Rengpa nin Pathian ki ni.

³⁹ Ni chipui Israel chu a sân lei hong inriangin ni suaka hong irzuar khomsian, suak angin ni isor hrang ni mah.

⁴⁰ Irhlofa le mikhual angin enkol ni ta, Jubili kuma ni insua nôk hrang a ni.

⁴¹ Kha zoi tika chu a nâihai le nang suaksan an ta, an in sûng mihai kuang om nôk an ta, an in le loi kha lua nôk an ti.

⁴² Israel mihai hi ki suak an ni, Aigupta ram ata ki hruai suakhaia, suaka zuar hrang ni mahai.

⁴³ Indînhai sabak loiin an chunga nin iom hrang ni ma, Pathian chi roi.

⁴⁴ Pasal mani, nupang mani suak nin nangin chu nin kôlvêla nam dang ircho roh.

⁴⁵ Nin laia om nam dang nâihai chu ircho thei nin ti, khaang mi nâi, nin ina suakhai chu nin ta ni thiai a ti.

⁴⁶ Nin nâihaiin dong thei an ti, donghai an ta, an hring sûng chu an suak ni an ti. Aniachu, ni chipui Israel kha deng ni intheitir hrang ni mah.

⁴⁷ Nin laia om nam dang chu hong irchong zaphai sian khom, nin chipui Israel mihai rêk chu inriang zapin, kha nam dang kuanga mani, ama chipui kuang mani suaka a’rzuara.

⁴⁸ Lei irzuar tâk khomsian, irchopai nôk thei a ni, ama urêng laia inkhatin mani,

⁴⁹ a pa urêngin mani, a pa urêng nâipahaiin mani, a’rkaipui nâi ual mi dangin mani irchopai nôk thei an ti.

⁵⁰ Ama irchôktu leh chong an ta, a irzuar kum ata Jubili kum dênin irhlofa pangaiin i dôr mo hlo irman nih ti insâpin, a’rtanna hrang man chu bituk ni a ti.

⁵¹ A sôt mani, sôtloi mani a sôt za chu sûtin an man ata irthokin inkhîr nih a ti.

⁵² Jubili tung dêna, a hlo thei hrang dôr chu, a’rhlotu kuang ata irtan suana hrang man dôr chu a ni.

⁵³ Irhlofa, kum khat hranga hmang ang dênin an irsor hrang a ni. A pu khan deng a intheitir hrang ni mah.

⁵⁴ I ang lama khom, irtansuak a ni no khomin Jubili kuma chu, a mihai leh insua ngêt hrang a ni,

⁵⁵ Israel mi rêng rêng, tukhom suaka an intâng kumkhua hrang ni ma; Israel mihai kha Rengpa suak, Aigupta ram ata a hruai suakhai an nia; Rengpa an Pathian kha ki ni.