LEVI DÂN 24 - PATHIAN LEKHABU IRTHIANG C.L. Bible (BSI)

Meiser enkol hrang dân

¹ Rengpa’n Mosia kuang:

² “Israel mihai khan oliv hriak irthît infâi meiser tui hrangin hong chôihai sianlân, a zoro taka a ibel hen hrang a ni.

³ Irtongna puan in sûnga hmun irthiangtak, thuthung siana, puanzâr pên tiang, khohloi tin Arona’n bel a ta, a tûk khovâr dênin a ibel pat hrang a ni. Hi thil hi kumkhuaa tho hrang a ni.

⁴ Rângachak inzena siam meiser sianaa meiserhai chu Arona’n irvo a ta, Rengpa makunga khan a zoro taka bel hen hrang a ni.

Bai ser

⁵ Baiphit a sa zâtin bai tang sômhleihni, her khata rikin, siam ro,

⁶ rângachak inzena inluan dokânga khan thâr hni, kirukin se roh.

⁷ Bero’n zen, idôr ten mani bai sia irtângna khan sehai ro, kha khan bai kha Rengpa kuang fâk hrang thilinhlana ni entir a ti.

⁸ Sabat ni kipa Rengpa makunga bai thar se hen hrang a ni. Hi hi Israelhai hrangin kumkhuaa tho hrang a ni.

⁹ Bai kha Arona le a’rchihai dongtum a ni hrang a ni, hmun irthianga khan an ifâk hen hrang a ni, Rengpa kuang thilinhlan, ochaihai hranga ser khak chu a ni.

Irhremna irphutôk le irhoitôk

¹⁰ Aigupta mi ata Israel nu inkhat nâipa le Israel mi an irsuala.

¹¹ Kha nupang kha Selomiti nâinu a ni, Dan nama Dibria tunu a ni. Israel nu nâipa khan Rengpa irhming a hrilinsiata, khua a sâl saa. Mosia kuang an hong hruaia.

¹² I anga tho hrang mani ti Rengpa a’rdona, a zuang sâm mâka chu a hrung khak a ni.

¹³ Rengpa’n Mosia kuang,

¹⁴ “Kha mi kha dâi pên tiang hruaiin lân, Pathian khua a isâl lai inhretuhai khan a lu chunga an kut irnghathai sianlân, mipuiin lungin dêngthat ri sehai.

¹⁵ Israel mihai kha hril ro: Pathian khuasâltu khan a ituang ngêt hrang a ni.

¹⁶ Pathian hrilsiat chu thatpai hrang a ni; Israel pungkhôm murdi’n lungin an idêngthat hrang a ni; Israel mi khom, an laia nam dang omhai khom, Pathian hrilsiat chu thatpai hrang a ni.

¹⁷ Mi that chu thatpai sa hrang a ni.

¹⁸ Mi dang sa that petu chu a ithuan hrang a ni, hringna irthûla hringna.

¹⁹ Mi dang hmêlirveitirtu chu a itho ang takin a chunga tho nôk hrang a ni.

²⁰ Ru inkhat an khiaktirin chu a ru inkhat inkhiak nôk hrang a ni, mit irthûla mit, ha irthûla ha, hmêlirveitir irthûla hmêlirveitir nôk.

²¹ Mi sa inrûka thattu chu thuan a ta, mihriam thattu chu that sa hrang a ni.

²² Hi dân hi Israel mi murdi hrang a ni, nin laia om nam danghai khom huam a ti, Rengpa nin Pathian ki ni,” a tia.

²³ Hi thu hi mihai a hril zoiin chu Pathian khosâltu kha riakhmun ata an hruai suaka, an dêngthat tâka. Mosia kuang Rengpa thupêk ang khan Israel mihai khan an tho tâka.