LEVI DÂN 23 - PATHIAN LEKHABU IRTHIANG C.L. Bible (BSI)

Sakhua kûthai

¹ Rengpa’n Mosia kuang:

² “Israel mihai chu hril ro: Rengpa chôiindômna kût hranga zoro inkunga omni khitin nin ihmang suam hen hrang a ni. Khahai kha hihai hi an ni.

³ Sûn ruk sûng sin tho nin ta, a sûn sari niin chu sabat a nia, nin irngam hrang a ni. Sin tho loiin Pathian chubai mûkin nin inkhôm hrang a ni. Sabat nî hi Rengpa dongtum a ni, nin omna kipa nin iser hrang a ni.

⁴ Rengpa hranga kût inkunghai chu hihai hi a ni, a zoro inkunga nin ihmang hen hrang a ni.

Ferkân kût le bai chol kop loi kût

⁵ “Tha masa tak tarik sômhlei minli khohloi tiang, hi Rengpa ferkân kût a ni,

⁶ kha tha dên tarik sômhlei ringa ni chu Rengpa hranga chol kop loi bai kût a ni: sûn sari sûng chu chol kop loi bai nin ifâk hrang a ni.

⁷ A sûn khat nî chu irbukkhômna nei nin ta, sin ite nin itho hrang ni ma.

⁸ Sûn sari sûng chu a nitin Rengpa kuang fâk hrang thilinhlannin inhlan hrang a ni. Sûn sari ni’n chu irbukkhômna nei nôk nin ta, sin pangai ite nin itho hrang ni ma,” a tia.

⁹ Rengpa’n Mosia kuang:

¹⁰ “Israel mihai chu hril ro: ram nangni ki ipêk hrang nin tung tika chu ochai kuang nin bu thar masa a mût kha nin hong ichôi hrang a ni.

¹¹ Ama khan Rengpa kuang thâr a ta, nangni lei pom a ti. Sabat nî a ni’n chu a tûka ochai khan a ithâr hen hrang a ni.

¹² Bumût thâr ni khan belrate, a chal hmêlveiloi, kum khat vêla, hâlirvôm thilinhlana nin hong inhlan hen hrang a ni.

¹³ Kha le ileh khan bu le bâl thilinhlana baidi a sa zât her hni, oliv hriak pol nin inhlan sa hrang a ni; kha kha Rengpa nuamlam tak chu a ni; uain litar khat khom in hrang nin inhlan sa hrang a ni.

¹⁴ Nin bu thar, ochaihai kuang nin hong inhlan mâka chu nin inêk hrang ni mah. Nin irchihai khomin hi dân hi kumkhua’n an izôm hrang a ni.

Pentikos kût

¹⁵ Bumût, Rengpa makunga nin thâr ni, sabat zoi ata tepin hapta sari hek a ta,

¹⁶ sabat voisari zoi tûk, sûn sômringa ni’n chu bu le bâl thilinhlana nin chîmu thar kha nin inhlan hrang a ni.

¹⁷ Sûngkua tinin mâni hmun senga chol kop loi bai nin iur hrang a ni. Rengpa makunga thâr hrang tang hni nin hong ichôi hrang a ni, bai tang khat chu her hnia rik, baiphit thar sa zât nin isiam masa tak a ini hrang a ni.

¹⁸ Kha leh khan belrate kum khat vêla sari, sehrâtchal inkhat, belrachal inhni, hmêlveiloi inzen vântângin Rengpa kuang hong chôi an ta, in hrang thilinhlan le hâlirvôm thilinhlana an inhlan hrang a ni; kha kha Rengpa nuamlam tak a ni.

¹⁹ Sual irbôlna thilinhlana kêl inkhat inhlan nin ta, thilinhlana belrate kum khat vêla irchang inhni, nin inhlan sa hrang a ni.

²⁰ Ochaiin bai le belrate inhni kha Rengpa makunga thâr a ta, ochai dongtum kha ser bîk ni a ti.

²¹ Kha nî khan tukhomin sin pangai nin itho hrang ni ma, Pathian chubai mûk hrangin nin inkhôm hrang a ni. Hi dân hi nin irchihai khomin an omna kipa kumkhua’n an izôm hrang a ni.

²² Bu nin âtin nin irkhol dênin nin inlût zit hrang ni ma, ât irhmâi nin nei khomin ât zit no roi. Mi’nrianghai le nam danghai hrangin se roi, kei hi Rengpa nin Pathian ki ni.

Bôlzoi kût

²³ Rengpa’n Mosia kuang:

²⁴ “Israel mihai kha hril ro; tha sarina, tarik khat ni’n chu omni ten unglân, bekul tum unglân, irbukkhômna nei roi.

²⁵ Rengpa kuang bu le bâl thilinhlan nin inhlan hrang a ni, nin sin pangai tukhomin nin isin hrang ni mah.

Sual irbôlna nikho roiinpui

²⁶ Rengpa’n Mosia kuang,

²⁷ “Tha sarina, tarik sôm hi kum tin nam pumpui sual irbôlna nikho roiinpui a nia, bu ngheiin nin inkhôm hrang a ni. Rengpa kuang hâlirvôm thilinhlan nin inhlan hrang a ni.

²⁸ Hi nikhuaa hin sin nin itho hrang ni ma, nin sual irbôlna inhlan a ni sikin.

²⁹ Hi nia thil imo khat lei fâk chu a chipuihai lai ata inhnotsuak hrang a ni.

³⁰ Hi nia sintho chu Rengpa ngeiin thatpai a ti.

³¹ Hi dân hi nin omna kipa nin irchihai khomin kumkhua’n an izôm hrang a ni.

³² Tarik kuak khohloi, misa tâk ata tarik sôm khohloi misa tâk dênin irngam nia hmang hrang a ni,” a tia.

Kairêng kût

³³ Rengpa’n Mosia kuang:

³⁴ Tha sarina tarik sômhlei ringa ni ata sûn sari sûng kairêng kût nin ihmang hrang a ni.

³⁵ A sûn masa tak nî chu irbukkhôm ir-up nei nin ta, nin sin pangai nin isin hrang ni mah.

³⁶ Sûn sari sûng chu a nitin bu le bâl thilinhlan inhlan hen nin ta, a sûn sari ni chu irbukkhôm nei nôk nin ta, bu le bâl thilinhlan khom nin inhlan hrang a ni, Pathian chubai mûk nî a ni, sin nin itho hrang ni mah.

³⁷ Hihai hi Rengpa chôiindômna’n hruaithe nin hmang hranghai chu a ni, irbukkhôm nei nin ta, fâk hrang thilinhlanhai, hâlirvôm thilinhlanhai, bu le bâl thilinhlanhai le irbôlna chi danghai le in hrang thilinhlanhai, a hun bi taka nin inhlan hrang a ni.

³⁸ Hi kût hi sabat ser bâka ser hrang a ni; khan, hi thilinhlanhai hi Rengpa makunga nin inhlan ngai chonginkung thilinhlanhai, nuam thilinhlanhai bâka tho hrang a ni.

³⁹ Bu nin ât zoia, tha sarina tarik sômhlei ringa ni ata kût hi sûn sari sûng nin ihmang hrang a ni. A sûn masatak kha irngamna nikhua ni a ti.

⁴⁰ Kha nikhuaa khan nin chîmu ra satakhai hong chôi unglân, tûm ônhai le thing incher sasôl sât unglân, Rengpa makunga raifân takin om roi.

⁴¹ Khaang khan sûn sari hmang roi. Hi dân hi nin irchihai khomin kumkhua’n an izôm hrang a ni.

⁴² Israel mi murdi chu hi nikhua sari sûng hin dângdia an iom hrang a ni.

⁴³ Israel mihai Aigupta ram ata Rengpa’n a hruai suak khan Kairêng chînte tea an omtir ngai ti nin nâi le tehai khomin an inhriat hrang a ni, kei hi Rengpa nin Pathian ki ni.

⁴⁴ Khaang tak khan Mosia’n Israel mihai kha Rengpa chôiindômna kût hmang hrangin dân a siam pehai a ni.