LEVI DÂN 2 - PATHIAN LEKHABU IRTHIANG C.L. Bible (BSI)

Bu le bâl thilinhlan

¹ Rengpa kuang bu le bâl thilinhlan pêktu’n chu baidi a sa zât, hong la sianlân, oliv hriak le bero pol ri se.

² Ochai khan baidi kha hap a ta, sahriak tômte le berohai leh khan maichâma a ihâlirvôm hrang a ni, kha kha a rênga hâlirvôm a nih ti entîrna hrang a ni; hâlirvôm thilinhlan a nia, Rengpa nuamlam tak a ni.

³ Thilinhlana hâl ban kha chu ochai dongtum hrang a ni, Rengpa kuanga inhlan tâk thil irthiang tak a ni sikin.

⁴ Bu le bâl thilinhlana lungthua rô inhmin a hong chôiin chu, chol kop loi bai a ini hrang a ni, sahriak le inhmet a ni no khomin irphân taka sinin sahriak pol ni ri se.

⁵ Khan, ni thilinhlan chu khênga hâlirvut baidi thilinhlan a ni’n chu chol kop loi, sahriaka inhmet, bai indi tak a ini hrang a ni.

⁶ Khoi ni ta, sahriaka phûm ni ta, kha kha baidi thilinhlan a ni.

⁷ Thîrbêla inzêi, bu le bâl thilinhlan kha baidi a sa zât, sahriaka inzêi a ini hrang a ni.

⁸ Khaang thil kha Rengpa kuang nin hlan hrangin, ochai kha pe’n lân, ama’n maichâma chôi a ta,

⁹ senkhat nok thâk a ta, a inokthâk kha a ihâlirvôm hrang a ni; kha kha a rênga hâlirvôm entîrna ni a ti. Hi hi hâlirvôm thilinhlan a nia, Rengpa nuamlam tak a ni.

¹⁰ Inhlan ban, rô loi chu ochaihai dongtum hrang a ni, Rengpa inhlan ser irthiang tak a ni.

¹¹ Bu le bâl thilinhlan, Rengpa kuanga inhlan rêng rêng chu chol kop siam hrang ni maka; chol le khuaihlutui kop rêng rêng Rengpa kuanga hâlirvôm hrangin inhlan hrang ni ma.

¹² Nin bu le bâl invâng masa tak rêk chu Rengpa makunga kum tin nin hong inhlan hrang a ni, maichâma hâl zit hrang ni ma.

¹³ Bu le bâl thilinhlana hin michi a ikop seng hrang a ni, michi hi Pathian leh Thuthung entîrna a nia, nin thilinhlana a ikop seng hrang a ni.

¹⁴ Nin bu le bâl thar masa nin hong inhlan tika changpêr inhlan sa hrang a ni.

¹⁵ Oliv hriak le bero a ikop sa hrang a ni.

¹⁶ Ochai khan changpêr le sahriak tômte, a rênga irthûlin la a ta, bero le khan bu le bâl thilinhlan Rengpa hrangin hâlirvôm hrang a ni.