LEVI DÂN 18 - PATHIAN LEKHABU IRTHIANG C.L. Bible (BSI)

Om dân saloi khapna

¹ Rengpa’n Mosia kha a chongpuia,

² “Israel mihai kha nin Pathian Rengpa ki ini hi hril roh.

³ Nin lêngna Aigupta mihai itho lam tho no unglân, nangni ki ihruai lûtna hrang Kanaan ram mihai om dân khom la ual no roi.

⁴ Ki dânhai hi zôm nin ta, ki thupêk angin nin iom lem hrang a ni. Rengpa nin Pathian ki ni.

⁵ Ki dânhai hi zôm unglân, tho hrang ki itihai hi tho roi; kha kha mihriam ta hrangin hringna hrang a ni;” Rengpa ki ni.

⁶ Tukhomin mâni urêng irnaipui a ipôl hrang ni ma, Rengpa ki ni,

⁷ ni pa mualinphoitir hrangin ni nu ni ipôl hrang ni ma, ni nu a nia, ama khom ni imualinphoitir hrang ni ma.

⁸ Ni pa dôngma dang tukhom pôlin ni pa ni imualinphoitir hrang ni ma.

⁹ In inkhata nin omsuam mo tâk, om no mo tâk, ni farnu, nu dang khom pa dang nâi khom ni ipôl hrang ni mah.

¹⁰ Ni nâipa nâinuhai, ni nâinu inei ni tunuhai pôl no ro, mâni irmualphoitir ni ni.

¹¹ Ni pa dôngma nâinu infâ khom ni ipôl hrang ni ma, ni farnu dên kêng.

¹² Ni nî ni ipôl hrang ni mah.

¹³ Ni nu zuarpui khom ni ipôl hrang ni ma, urêng irnai nin ni.

¹⁴ Ni pa sangpahai dôngma khom pôl no ro, ama khom ni nu a ni sa.

¹⁵ Ni nâipa dôngma, ni moi khom pôl no ro,

¹⁶ Ni sangpa dôngma khom pôl no roh.

¹⁷ Ni nupang pôl tâk nâinu mani, tunu mani pôl no ro, thilsual a ni; ni urêng irnaipui an ni.

¹⁸ Ni dôngma a hring laiin a zuarpuinu dôngma’n nei no roh.

¹⁹ Nupang thinei laiin pôl no ro, a porinche lai a ni.

²⁰ Mi dôngma pôl no ro, mâni irporinchetir a ni.

²¹ Moleka biakna hrang hâlirvôm hrangin ni nâi ni ipêk viat viat hrang ni ma, ni Pathian irhming ni porinchetir ni ti, Rengpa ki ni.

²² Nupang angin pasal kha ni ipôl hrang ni ma, a porinche a ni.

²³ Pasal khomin nupang khomin, sâ a ipôl hrang ni ma; khaang tho ngai mi chu an suakinsual an nia, irporinchetir no roi.

²⁴ Nin matona ki irzûlpai suak hrang namhai kha hi thil hin an irporinchetira, hi thil hin irporinchetir no roi.

²⁵ An thil inzong sikin ram kha an porinchetira, an sual sika khan ram kha hrem ki ta, an nihai kha ki inhnotsuak hrang a ni.

²⁶ Nangni chu ki dânhai le ki thupêkhai hi zôm unglân, nin laia tukhomin, nin laia om nam danghai ten khomin, hi thil porinche hi tho no roi.

²⁷ Nin om mâna hi rama omhai hin thil porinche hi an tho ngaia, ram chu an porinchetir tâk a ni.

²⁸ Rama khan nin mâna omhai an hnôl tâk angin nin porinche’n chu irhnôl sa ngêt nin ti.

²⁹ Nin laia hiang thil tho chu ensan ngêt hrang a ni.

³⁰ “Hi thil intirom nin mâna mihai iuar ngai hi tholoi hrangin nangni ki iti a ni, irporinchetir viat no roi, Rengpa nin Pathian ki ni,” a tia.