LEVI DÂN 14 - PATHIAN LEKHABU IRTHIANG C.L. Bible (BSI)

Pân saloi irvei thâr hrang dân

¹ Rengpa’n Mosia kuang,

² “Pân saloi irvei dam nôk, thâr infâi hrang dân chu hi ang hin a ni. A’rthiang tah ti inpuang a ni’n chu ochai kuang fe a ta,

³ ochaiin dâi pên tiang hruai a ta, ngûk taka a en zoia a dam ngêt a nih ti an hriatin chu

⁴ sa irthiang inhni, sidar thing le patzâi senduk le husop hriak le hong chôi hrangin hril a ti.

⁵ Pil bêlin ivatui luang lai thâl sianlân, ama chunga khan vâ inkhat a ithat hrang a ni,

⁶ a thisen zungna tuia khan vâ inkhat kha sidar thing, patzâi senduk, husop hriak hai leh khan inchie a ti.

⁷ Irthiangtir hrang kha thisen khan voisari inthek a ta, a’rthiang tah ti inpuang a ta, vâ chu ramhnuaia insua a ti.

⁸ Kha mi khan a sil le kaihai kha irsu a ta, a sam ep a ta, a’rsil tika hong irthiang a ta, riakna hmuna lût thei ta a ta, aniachu, sûn sari sûng ama puan in pên tiang a iriak hrang a ni.

⁹ Sûn sari zoia a lu, a hnerkamul, a mitkhoi mul le a mul danghai khom voi a ta, a puandiar irsu a ta, tui a’rsil zoi tika hong irthiang ta a ti.

¹⁰ Sûn riat ni’n chu belrate, a chal inhni le a nupang inkhat, kum khat vêla irchang, hmêlveiloi le baidi her thum, sahriak koploi oliv hriak litar hmun thuma hmunkhat hong chôi a ta,

¹¹ ochai khan irtongna puan in mikota, kha mi kha a thilinhlanhai leh khan a ihruai inlût hrang a ni.

¹² Belrate inkhat, a chal chu, oliv hriak litar hmun thuma hmunkhat leh khan tho’nsualna man thilinhlana inhlan pe a ta, Rengpa makunga thâr a ti.

¹³ Belrate chu sual irbôlna le hâlirvôm thilinhlan hrang thatna hmun irthianga that a ta, hiang tho’nsualna man thilinhlan hi sual irbôlna thilinhlan angin ochai hrangin a iser hrang a ni.

¹⁴ Ochai khan belrate thisen kha an hlantu mikuar chang tiang hmora, a kut le kepui hmorhaia a ipol pe hrang a ni.

¹⁵ Ochai khan oliv hriak senkhat chu a kut zapha vei tiang bun a ta,

¹⁶ a kut chang tianga kutpâr phûm a ta, Rengpa makunga hriak kha voisari a inthek hrang a ni.

¹⁷ A kuta hriak le belrate thisen senkhat kha irzêl a ta, a mikuar chang tiang hmora, a kut le kepui hnâra pol pe a ti.

¹⁸ A kuta hriak la om chu irthiangtir hrang, a lua khan pol a ta, khaang khan irthârna kha tho pe a ti.

¹⁹ Sual irbôlna thilinhlan kha inhlan pe a ta, kha mi kha thâr irthiang a ti. Kha zoia chu hâlirvôm thilinhlan kha that a ta,

²⁰ bu le bâl thilinhlan le maichâma inhlan a ta, khaang khan thâr irthiang a ta, kha mi kha irthiang ta a ti.

²¹ Khaang dôr nei zoi zâkloi inriang chu irthârna belrate inkhat, tho’nsualna man thilinhlan hrangin hong chôi a ta, sual irbôlna hrangin a ithâr hrang a ni, kha leh khan baidi hriak le irpol herkecher le oliv hriak litar hmun thuma hmunkhat a inhlan sa hrang a ni.

²² A inei la lamin, vasu bop khat mani, phervali bop khat mani, inkhat chu sual irbôlna thilinhlan hrangin, inkhat chu hâlirvôm thilinhlan hrangin a hong ichôi hrang a ni.

²³ A’rthâr sûn riat niin chu Rengpa makunga irtongna puan in mikota a hong ichôi hrang a ni.

²⁴ Ochaiin chu belra le oliv hriak kha la a ta, Rengpa makunga a ithâr hrang a ni.

²⁵ Belrate kha that a ta, a thisen senkhat kha a mikuar chang tiang hmora, a kut le a kepui chang tiang hmora pol pe a ti.

²⁶ Ochai khan oliv hriak senkhat kha a kut zapha vei tiang bun a ta,

²⁷ a kut chang tiang kutchala inchie a ta, Rengpa makunga voisari a inthek hrang a ni.

²⁸ Sahriak senkhat a mikuar chang tiang hmora, a kut le ke chang tiang kepui hnârhaia a ipol hrang a ni.

²⁹ A kuta hriak la om khan khapa lua khan a ipol hrang a ni. Khaang khan irthârna kha a itho pe hrang a ni.

³⁰ Kha zoia chu vasu mani, phervali mani inkhat chu,

³¹ sual irbôlna hrangin, bu le bâl thilinhlan leh inhlan a ta, khaang khan thâr irthiang a ti.

³² Hiang hin pân saloi irvei, irthârna hrang bituk zât nei zoiloi hranga irthâr hrang dân chu a ni.

In sûnghaia phâr hri om

³³ Rengpa’n Mosia le Arona kuang:

³⁴ “Nin inei hranga nangni ki ipêk Kanaan ram nin tung tika chu, ram nin va idong nin in sûnga phâr hri kin koptirin chu,

³⁵ in neitu khan ochai koi a ta, ‘Ki in sûnga phâr hri ni le irhoi a kopa’ ti a ta.

³⁶ Ochai khan in sûnga a lût mân a sûnga thil om murdi inkêlsuatir a ta, a porinche ti an puangkhum loina hrangin, in sûnga thil om murdi chu inkêlsuatir zit a ta, eninfel hrangin in sûnga khan lût a ti.

³⁷ A phâr hri kha ngûk takin en a ta, a êm mani, a sen u uai mani a oma, banga khan a lei kâia, bang kha a hmonin an lang tikin chu,

³⁸ in kha suaksan a ta, sûn sari sûng inkaltir a ti.

³⁹ Sûn sari ni’n chu in kha va en nôk a ta, banga khan a lei zapin chu,

⁴⁰ lung hri kopna lung kha, kho pên tiang porinche painaa inpaitir a ti.

⁴¹ Kha zoi tena chu in sûng tianga bang murdi kha ziat inkhoktir a ta, an ikhok kha dâi pên tiang an ipai hrang a ni.

⁴² Lung an ipai kha a thar thûl hrang a ni, a lung bang khom a thar vanga inmâi innâm hrang a ni.

⁴³ Hi hi pai a nia, inmâi innâmna ziatkhok zit hnunga a thar thûl a ni zoia khom hri a kop nôkin chu,

⁴⁴ Ochai khan va en nôk a ta, a hong zapin chu boi theiloi a ni, in kha a porinche a ni.

⁴⁵ Insiat chit hrang a ni, lung, thing, inmâi innâmhai kha pai zit hrang a ni.

⁴⁶ In kha khâr a ni sûng khan a lût an omin chu khohloi dênin porinche an ti.

⁴⁷ Kha in sûnga zâl mani, thil fâk mani chu, a sil le kai kha a irsûk ngêt hrang a ni.

⁴⁸ In sûnga lung, inmâi thar hnung khan ochaiin va en nôk a ta, hri kop a om ta no’n chu a’rthiang ti inpuang a ti, hri kha a boi fel tâk sikin.

⁴⁹ Kha in thâr irthiang hrangin chu, vâ inhni chel a ta, sidar thing, pat senduk hai le husop hriak hong chôi sa a ti.

⁵⁰ Vâ inkhat chu pilbêl ivatui siana chunga that a ta,

⁵¹ vâ inkhat kha sidar thing, patzâi sendukhai, husop hriak leh khan pil bêla tui thar, vâ inkhat thisen zungnaa khan inchie a ta, in sûng kha voisari inthek a ti.

⁵² Vâ thisen le tui luang lai, sidar thing, pat sendukhai le husop hriakhai hmang khan in kha thâr irthiang a ti.

⁵³ Vâ la hring kha kho sûng ata ramhnuaia insua a ta, khaang khan irthâr infâina kha tho a ta, hong irthiang ta a ti.

⁵⁴ Hiang hin takpuma pân saloi chungchânga tho hrang lam chu a ni.

⁵⁵ Puandiar mani, in sûnga hrihai,

⁵⁶ takpuma invûng mani, irdul mani, a khir mani,

⁵⁷ a’rthiang le irthiangloi theithâkna hrangin. Hihai hi inphâr chungchânga dân chu a ni.