LEVI DÂN 13 - PATHIAN LEKHABU IRTHIANG C.L. Bible (BSI)

Vun natna chi tinrêng tho hrang dân

¹ Rengpa’n Mosia le Arona kuang:

² “Vun pân mani, sarthiat mani, invûng mani a oma, dam zôi theiloi hrang angin an langin chu ochai inentir hrang a ni.

³ Ochaiin pân kha ngûk takin a hong ena, a pân laia mul kha a hong ngoia, a pân dân kha a vêl vun nêkin an thûk uala an langin chu pânsia a ni, ochaiin mi porinche’n inpuang a ti.

⁴ A pân kha a ngoia, a sân an langa, a mul khom a ngoi no’n chu ochaiin sûn sari sûng irkêmtir a ti.

⁵ Sûn sari hnunga ochaiin en nôk a ta, a pân kha a pangai dên a nia, a zap no’n chu sûn sari dang irkêmtir nôk a ti.

⁶ Sûn sari hek zoi tika en nôk a ta, a pân kha a châr thiaia, an darh no’n chu porinche mah ti ochaiin inpuang a ti, pân papai a nia, a silkaihai kha irsûk a ta, irthiang a ti.

⁷ Ochaiin a ena, a’rthiang tia an puang hnungin pân kha indarh sianlân, a inentir nôk hrang a ni.

⁸ Ochaiin en nôk a ta, a hong indarh irzatin chu, mi porinchea inpuang a ti, pân saloi zât a ni.

⁹ Tukhomin pân saloi zât hi an irveiin chu ochai kuang hruai ngêt hrang a ni;

¹⁰ ama khan ngûk takin lei en a ta, pân kha a ngoi hlunga, a mul a ngoia, a hnâi a omin chu,

¹¹ pân dam intak zât a ni; ochai khan mi porinche a nih ti inpuang a ta, en nôk hranga irkêmtir nang no nia, a porinche ti a fel sai a ni.

¹² Kha natna kha an dara, ochai hmu phâk ten, a ke ata a lusîp dênin a’rsua tâkin chu,

¹³ ochaiin ngûk takin en a ta, a taksa pumpui an darhsuak tâkin chu, kha mi kha a’rthiang tâk ti inpuang a ti, a vun kha a ngoi suak zitin chu a irthiang tâk a ni.

¹⁴ Aniachu a taksa châr a hong irlangin chu a porinche a ni.

¹⁵ Ochai khan en nôk a ta, an lông lai a hmu’n chu porinche a nih ti inpuang a ti. Takpuma inlông om hi pân saloi a nia, a porinche a ni.

¹⁶ Inlông kha a boia, a hong ngoiin chu ochai a inentir hrang a ni.

¹⁷ Ama’n lei en a ta, inlông kha a lei ngoiin chu kha mi kha chu a’rthiang tâk a nih ti inpuang a ti.

¹⁸ Sarthiat dam tâk,

¹⁹ a hong irhlipin mani a sena a hong dukin mani, ochai inentir hrang a ni.

²⁰ Ochai khan a porinche ti inpuang a ti; sarthiat ata pân saloi a irsiam a ni.

²¹ A mul chu a hong ngoi noa, a vêl vun ata inthûk ual loia ochaiin an hriatin chu kha mi kha sûn sari sûng a ikhum irkêmtir hrang a ni.

²² Kha thil kha a hong zapin chu ochai khan a porinche a nih ti inpuang a ti; hri saloi a ni.

²³ A danglam noa a zap no’n chu, sarthiat ata hong irsiang nôk a ni, ochai khan a’rthiang ti inpuang a ti.

²⁴ Mei ikâng inlông tuang chu a kâng laia sen mani, a senindông mani a niin chu

²⁵ ochaiin lei en pe a ta, a mul kha a hong ngoia, a vun pên tiang ata an thûk okin an langin chu, a kângna sâbe lai kha pân saloia a irsiam tâk a ni. Ochaiin kha mi kha a porinche ti inpuang a ti.

²⁶ A mul a hong ngoia, inthûkin inlang no sian khom, a dukin chu ochaiin sûn sari sûng a bingin a isiapai hrang a ni.

²⁷ A sûn sari niin ochai khan en nôk a ta, a pân kha a hong zapin chu pân saloi a ni; ochai khan kha mi kha a porinche a nih ti inpuang a ti.

²⁸ A ngaidân a nia, a hong zap noa, a duk no’n chu, pân saloi ni maka; kâng ser papai a nia, ochaiin kha mi kha a’rthiang ti inpuang a ti.

²⁹ Pasal khom nupang khom, an lua mani an irkama mani, pân a omin chu

³⁰ ochaiin en a ta, a kôlvêl vun kha an thûkin an langa, a mulhai kha a eng hruakin chu inthak saloi a ni; kha mi kha a porinche ti inpuang a ti.

³¹ Pân kha inthûk ual loiin inlang khomsian, a mulhai kha a hong vom insa ual no’n chu sûn sari sûng a ikhum irkêmtir hrang a ni.

³² a sûn sari nia ochai khan en nôk a ta, a zap noa, an thûk ualin an lang no’n chu,

³³ a pân kôlvêla mul chu ziat inkol hrang a ni, ochai khan sûn sari sûng a ikhum irkêmtir nôk hrang a ni.

³⁴ Sûn sari niin ochai khan a pân kha en nôk a ta, a zap noa, inthûk ualin an lang no’n chu, a’rthiang ti inpuang a ti; kha mi khan puandiar irsu a ta, irthiang ta a ti.

³⁵ A’rthiang ti inpuang zoia, pân kha a zapin chu

³⁶ ochaiin en nôk a ta, a pân kha a izap ngei a ni’n chu kha mi kha a iporinche a ni; a mul kha a eng le eng loi en nang ual no ni.

³⁷ Pân kha a zap noa, a sam kha samvom sa nia ochaiin an hriatin chu pân kha a dam ta tihna a ni, ochaiin a’rthiang tah ti inpuang a ti.

³⁸ Pasal khom, nupang khom, an vun taksa puar a ngoi a hong omin chu,

³⁹ ochaiin en pe a ta, a ngoina kha an vârin chu a hnâi hong lâkpai a nia, ama kha chu a’rthiang a ni.

⁴⁰ A tukburung tiang le a michal tianga sam chil sianlân, lukol papai a nia, a irthiang a ni.

⁴¹ A michal le a tukburung sam chil sianlân, chalkol papai a ni, a’rthiang a ni.

⁴² A kol laia eng mani sendâng viat a omin chu pân saloi a ni.

⁴³ Ochaiin hong en a ta, a sen indâng viat a omin chu,

⁴⁴ kha mi kha a porinche ti inpuang a ta, a lua pân saloi a om sikin.

⁴⁵ Pân saloi irvei chu songkol chet innghâk a ta, a sam inthâ a ta, a hmâi chimrip, a’rkam tiang chu tuam a ta, “Porinche, porinche,” tiin a ninginmurin khêk hrang a ni.

⁴⁶ Kha pân saloi inthak kha a nei sûng chu a porinchea, mi dang kôla om loiin dâi pên tiang a iom hrang a ni.

Phâr hri irkâi chungchâng

⁴⁷ Samul puana mani, puan irnêma mani,

⁴⁸ pat phiara mani, samul pat phiara mani, savuna mani, savuna siam thil danga mani, phâr hri a kâia,

⁴⁹ a êm angin mani, a sen angin mani ni’n an langin chu, phâr hri an darh zât a nia, ochai inentir hrang a ni.

⁵⁰ Ochaiin en a ta, sûn sari sûng a danga inomtir a ta,

⁵¹ sûn sari sûng en nôk a ta; hri kha a hong izap a ni’n chu, thil porinche a ni.

⁵² Ochai khan a ihâlpai hrang a ni; hri, meia hâlpai zât a ni.

⁵³ A hong ena, a hong zap no’n chu

⁵⁴ irsûk infâitir a ta, sûn sari dang se nôk a ta,

⁵⁵ en nôk a ta, hri chu zap no khomsian a pân hmun rông kha a danglam no’n chu a la porinche a ni, a pân hmun kha pên tiang vai mani, a sûng tiang vaia om mani, a ni khomin.

⁵⁶ Hong en nôk a ta, a pân hmun kha a hong irnêpin chu a omna laitak kha puan ata mani, savun ata mani ât thapai hrang a ni.

⁵⁷ A pân hmun kha a hong inlang nôka, a zap maia an langin chu puan neitu khan a ihâl chian hrang a ni.

⁵⁸ A’rsûk infâi theiin chu irsu nôk a ta, hong irthiang ta a ti.

⁵⁹ Puan irnêm mani, samul puan phiara mani, savun siam thil rêng rênga mani, a pân hmun, a’rthiang le irthiang loi sen hrang lam chu, khaang khan a ni.