LEVI DÂN 12 - PATHIAN LEKHABU IRTHIANG C.L. Bible (BSI)

Nâi nei zoia irthâr hrang dân

¹ Rengpa’n Mosia kuang:

² “Israelhai kha hril roh. Nupangin nâi a vonga, pasal a niin chu sûn sari sûng porinche a ti, thi a nei sûnga a iporinche ang khan.

³ A sûn riat ni’n chu nâitesente ser hmor vun kha a itan hrang a ni.

⁴ A thisen suak sikin nu chu sûn sôminthum sûn thum a hek mâka chu irthiang no ni, a’rthâr irthiang mâka chu thil irthiang ite a itôn hrang ni mah.

⁵ “Nâinupang nei chu sûn sômhleiminli sûng, thi nei lai ang dênin, porinche a ti, a thisen suak sikin sûn sômruk kiruk dang a hek mâka chu irthiang no ni.

⁶ Pasal mani nupang mani irthâr infâi zoro a chuk zoia irtongna puan in lûtnaa kum khat vêla belrate hâlirvôm thilinhlana hrang hong chôi a ta, sual irbôlna hrangin phervali mani, vasu mani ochai kuang a hong ichôi sa hrang a ni.

⁷ Ochai khan Rengpa kuang thilinhlan kha inhlan a ta, porinche irthârna kha lei tho pe a ti. Hi hi nupangin nâi a neia a itho hrang chu a ni.

⁸ “Nupang khan belrate a nei no’n chu vasu bop khat mani phervali bop khat mani a hong inhlan hrang a ni; inkhat chu hâlirvôm thilinhlan ni a ta, inkhat chu sual irbôlna thilinhlan ni a ti. Ochai khan a porinche thârna kha inhlan pe a ta, hong irthiang ta a ti,” a tia.