LEVI DÂN 11 - PATHIAN LEKHABU IRTHIANG C.L. Bible (BSI)

Hme fâk theihai

¹ Rengpa’n Mosia le Arona kuang

² “Israel mihai kha hiang hin hrilhai roi.

³ Tânga lêng, hiang sahai hi fa thei nin ti: a kemitin têra suak, a fâk insoi ngai sâ rêng rêng chu fa thei nin ti.

⁴ Khannisianlân insoia inlem mani a mitin têr loia a suak laia om mani, hihai hi chu nin ifâk hrang ni ma; saringsei, insoiin invol khom sianlân, a mitin a têr no sikin, nin ta hrangin a iporinche a ni.

⁵ Khan, mizupui, an soia an lem nâkin, a mitin a têr no sikin; nin ta hrangin a iporinche a ni.

⁶ Khan, mizupui kha insoia an lema chu, khannisian a mitin a têr no sikin: nangni hrangin a porinche a ni.

⁷ Vok hme fa no roi, sâ porinche a ni, a ke mitin a’rkaka chu, khannisian insoiin invol mah.

⁸ Hiang sâ hmehai hi chu fa no roi, a thi tâk ruak khom tôn no roi, a porinche a ni.

⁹ Nga chi tinrêng, tuia omhai, tuikhangliana om, dîla om, hlip le a phe neihai chu fa thei nin ti.

¹⁰ Tuia lêng hlip le a phe nei loi chu fa loi hrang a ni.

¹¹ Khahai kha intir a om, a tôn khom tôn no roi.

¹² Tuia lêng, hlip le a phe nei loi chu nin ifâk hrang ni ma.

¹³ Hi vâhai hi vâ intirom an ni: irmu, simbu

¹⁴ muhâite, vânlaiirmu chi rêng rêng

¹⁵ vaâk chi rêng rêng,

¹⁶ vâ ngalirsâng hai, meibâk, tuivaârngoi, tuikhanglian vahai, irmu chi rêng rêng

¹⁷ rângkêk, vadung irmuhai, suitilil hai

¹⁸ simbu misiaknei, raikoso hai,

¹⁹ khânghlâi hai, dîl va chi rêng rêng, sualungvakâmkei hai le bâk hai.

²⁰ Thilhring mitha nei, ke minlia irvâk chi rêng rêng chu nangni hrangin a porinche a ni.

²¹ Irkâr theina hrang ke mitin irphal nei zât rêk chu fa thei nin ti.

²² Khâihmimse chi rêng rêng, khâiruang chi rêng rêng, ruanguiêk chi rêng rênghai fa thei nin ti.

²³ Mitha nei, ke minlia irvâkhai chu nangni hrangin intirom a ni.

²⁴ A thi tôn murdi khohloi dênin porinche a ti.

²⁵ A hme khom puan diarin a tônin chu irsu hrang a ni, khohloi dênin a neitu chu a porinche a ni.

²⁶ Sa khom a mitin irkak khomsian insoi loi mani, a mitin irkak sualoi rêk chu a iporinche a ni, a ruak tôn chu porinche a ti.

²⁷ Ke minli nei, kepâr irtuam murdi chu, an iporinche a ni, an ruak tôn chu khohloi dênin porinche a ti.

²⁸ An ruak lâktu khan puandiar a irsûk hrang a ni, khohloi dênin porinche a ti; hi ruakhai ang hi nangni hrangin a porinche a ni.

²⁹ Irnênga a’rvâkhai ang zât hi nangni ta hrangin a porinche sa a ni; ibûi, mizu, châichek rêng rêng,

³⁰ tokke, innghâk, laikin, ûleng kinsanêlnek.

³¹ Hiang a boka irvâka lôn chi hi nin ta hrangin a porinche a ni. A thi tôn khom khohloi dênin porinche an ti.

³² Khan, a thiin chu thing mani, puandiar mani, savun mani, hmarsa mani, thil sianaa hmang tâka khom a delin chu porinche a ti, irthiang nôk zôi zel a ti.

³³ Pilbêl sûnga a tâkin chu a sûnga om tinrêng kha porinche a ta, a bêl kha zêmkhoichit hrang a ni.

³⁴ Thil fâk thei chi rêng rêng, khaang bêla lei om chu irchôk a niin chu porinche sa a ti; khaang bêla inthei chi om rêng rêng khom porinche sa a ti.

³⁵ Hihai thi ruak hi bai inzêina bêla mani, a tâkin chu porinche a ta, inkhoichit hrang a ni.

³⁶ A thi ruak chu i ang khomin tôn sian a tôntu chu a porinchea, khannisian, tuikuanga, tui panga ta sian porinche ma.

³⁷ Song hranga chîmu sia chunga tâk khom ni sian, chîmu chu porinche ma.

³⁸ Chîmu chu tuia an inchie laiin, hi a thi ruak hi a tâkin chu porinche a ti.

³⁹ Sa fâk zât thi sianlân, a ruak tôn murdi khohloi dênin porinche an ti.

⁴⁰ A hme fâk chu a puandiar a irsûk hrang a ni, khohloi dênin porinche a ti. A hme pêltu khomin a puandiar a irsûk hrang a ni, khohloi dênin porinche a ti.

⁴¹ Thilhring, irnênga boka irvâk zât hi nin ifâk hrang ni mah.

⁴² A’rtôla irtôlhai, ke minli mani kha nêka tam mani nei irnênga irvâk zât rêng rêng hi nin ifâk hrang ni ma, a porinche a ni.

⁴³ Hihai hi nin fâkin chu intirom ni nin ta, porinche nin ti.

⁴⁴ Kei Rengpa hi nin Pathian ki nia, ir-enkol insa unglân, kei hi ki’rthiang a ni, nangni khom nin irthiang sa hrang a ni. Irnênga lôn zât chi rêng rêng hin porinche no roi.

⁴⁵ Nin Pathian ni hrangin Aigupta ram ata nangni hruai suaktu Rengpa ki ni. Nin irthiang hrang a ni, kei ki’rthiang sikin.

⁴⁶ Hihai hi ramsa hai, vâ hai, tui sûng hai, irnêng chunga irvâk hai, chungchânga dân chu a ni.

⁴⁷ A’rthiang le irthiang loi, fâk zât le fâk loi zât nin itheithâk hrang a ni.