LEVI DÂN 1 - PATHIAN LEKHABU IRTHIANG C.L. Bible (BSI)

Hâlirvôm Thilinhlan

¹ Irtongna puan in ata Mosia chu Rengpa’n a koia.

² Israel nâihai kuang hiang hin ti ro: Rengpa kuang thilinhlan nin hong chôiin nin sa vâi, sehrât laia mani belra le kêl laia mani nin hong ilâk ngai hrang a ni.

³ Thilinhlan chu hâlirvôm thilinhlan hrang a ni’n chu sa laia a chal, hmêlveiloi ni a ta, Rengpa lei pom hrangin irtongna puan in mikota an hlantu khan a hong ichôi hrang a ni.

⁴ Hâlirvôm hrang sa lu chunga a kut irnghat a ta, a sual irbôlna hrangin pom ni a ti.

⁵ Sechalpa kha Rengpa makunga tan a ta, Arona nâi, ochaihai khan a thisen kha inhlan an ta, irtongna puan in lûtna kôla maichâm kha an inthek irkual suak hrang a ni.

⁶ A vun kha hlâi a ta, a hme kha irchanchit a ti.

⁷ Arona nâi ochaihai khan maichâma thing an lei siaa, mei tho an ti.

⁸ A sa chu a thâi le a lu leh ochai khan meia rô an ti.

⁹ A phîng sûng le a kehai kha irsûkinfâi hrang a nia, an hlantu ochai khan maichâma a rêngin a ihâlirvôm hrang a ni. Hi hi hâlirvôm thilinhlan tho lam dân hrang a ni; kha kha Rengpa nuamlam tak a ni.

¹⁰ Belra mani kêl mani hâlirvôma inhlan hrangin chu a chal, hmêlveiloi, a ini ngêt hrang a ni.

¹¹ Rengpa makunga, maichâm hmâr tianga khan tan a ta, a thisen kha ochaiin maichâma inthekin irkualsua a ti.

¹² A hme kha irchan indarh a ta, maichâm chunga thing chok luai luaia khan ochaiin a lu leh a thâi le rô a ti.

¹³ A phîng sûng le a kehai rêk chu a irsûkinfâi bak hrang a ni; a rêng khan ochaiin a ihâlirvôm zit hrang a ni, hâlirvôm thilinhlan a nia, Rengpa nuamlam a ni.

¹⁴ Rengpa kuanga thilinhlan hrang chu phervali le vasu hâlirvôm thilinhlana ni’n chu vasu mani, phervali mani hong chôi sianlân,

¹⁵ ochai khan lei la a ta, maichâma a inhlan hrang a ni; a ringa inpotsat a ta, a ihâlirvôm hrang a ni; a thisen chu maichâm sîra a inzung zoi hrang a ni.

¹⁶ A midil le a busêk chu maichâm kôl sak tiang irvut sianaa a ipai hrang a ni.

¹⁷ Inset chit loiin a mitha dâra kaiphar hrang a ni, maichâma hâlirvôm zit ri se, hâlirvôm thilinhlan a nia, Rengpa nuamlam tak a ni.