KOLOSA 4 - PATHIAN LEKHABU IRTHIANG C.L. Bible (BSI)

¹ Hruaituhaio, nangni khomin irvâna Hruaitu nin nei tih inhriatin, nin suakhai chunga dik tak le satakin itinrêng tho roi.

Inthorna

² Chongchai ngut ngut unglân, nin chongchainaa lômthu insîr pumin irngaitua roi.

³ Keini hrang khomin ni chongchai pe roi. A thu hrilna lampui Pathianin a nin hong pena hrangin, lung in ki intângna san Krista thurîl inpuang ki sunzom theina hrangin.

⁴ Ki insîr hrang lam ang taka kin sîr theina hrangin ni chongchai pe sa roi.

⁵ Iamloihai ata vâr takin om unglân, nin zoro kha hmang insa roi.

⁶ Itiklai khomin satak le chonghoi taka chong uar unglân, khanchu mi tin, i anga sâm hrang mo nin inhriat hrang a ni.

Inthâna chubai

⁷ Rengpaa ki chanpui sinthotu iamom tak, kin urêng inditom tak Tukika hin ki thurchi murdi nangni hril a ti.

⁸ Kin thurchi nin inhriata lungrîl raifân taka nin om theina hrangin ki hong itîr a ni.

⁹ Ama pâla hin nangni mi, urêng inditom tak Onesima, iamtu det tak hi ki hong tîr sa a ni. Hi thurchi hi nangni hril zit a ti.

¹⁰ Aristarka, intângna ina ki iompui hin chubai nangni a mûk. Marka, Barnaba tupa khom hin chubai nangni a mûk. (Ama hi nin kuang a hong zoro’n chu lei lôm hrangin nangni ki hril tâk kha.)

¹¹ Josua, Justa an iti hin chubai nangni a mûk, Juda Kristianhai laia khan anni inthum vai hi Pathian Ram ta hranga a sinthotu an ni, ki’rtha a sân an irngamtir a ni.

¹² Epafra, nangni mi, Krista Jisua suak hin chubai nangni a mûk. A chongchai rikipin det takin nin ngîra, nin hong puihlinga, Pathian nuamlam anga iamtu tak ni theina hrangin sathnem irngai takin nangni a ngên pe ngai a ni.

¹³ Nangnihai ta hrangin, Laodikei khuaa mihai le Hieropolis khuaa mihai ta hranga ama hi a sin intam tak tak ti khom kin hriat a ni.

¹⁴ Luka, daktor inditom tak le Dema hin chubai nangni an mûk.

¹⁵ Laodikei, khuaa urêng omhai le Numfii le a ina Koiindang inkhôm ngaihai kha chubai ni hong mûk pe sa roh.

¹⁶ Ki lekha hi nin laia nin tep zoia, Laodikei Koiindang inteptir sa roi, khaang dênin Laodikei Koiindang lekha hi lei tep sa roi.

¹⁷ Khan, Arkipa kuang khan, “Sinthôna, Rengpa kuang ata ni idong kha ni izoi ngêt hrang kêng, ti roi,” a tia.

¹⁸ Kei Paula’n hi hi keima kut ngeia irziakin chubai nangni ki imûkna a ni, ki thîrkol bunhai hi inhre mai roi. Pathian lungkhamna kha nin kuang om ri se.