KOLOSA 3 - PATHIAN LEKHABU IRTHIANG C.L. Bible (BSI)

¹ Krista leh kaithoi nin ni tâka, khasikin Pathian chang tiang Krista toinaa om, chung tiang thilhai kha, zong ual roi.

² Chung tiang thila nin lungrîl irnghat khak unglân, irnêng thila chu irnghat no roi.

³ Nin thi tâka, nin hringna kha Krista kuang Pathianin a vong insa a ni.

⁴ Nin hringna bul, Krista kha, a zuang inlang tena chu nangni khom a kuang roiinpui takin inlang sa nin ti.

Hringna milui le thar

⁵ Nin rammual om dân sual: irditna hai, porinchena hai, hurna hai, irzukna sual hai huatirhamna hai (kha kha millim biakna a ni,) hihai hi thatpai roi.

⁶ Kha thil sika khan iam loihai chunga Pathian ningmur a izuang chum hrang a ni.

⁷ Tiana khan nangni khom, khaang khan nin oma, nin nuamlam tak a ni.

⁸ Atûn chu ningmurna hai, milung inphuna hai, irhmumâkna hai, mâksan unglân, irhrilsiatna hai le chong porinche hai nin bâi ata suak no ri se.

⁹ Milak irhril irhlôm uar no roi, mihriam milui kha a sinthohai leh nin hlîk tâka.

¹⁰ Mihriam thar khan nin irbel tâk sikin; Pathian inhriat infel hrangin kha mihriam thar kha a siamtu anga om hranga siam thar mai a ni.

¹¹ Kha hringna thar khan Grik le Juda, sertan le tanloi, Oze le Skuthia mi, suak le suakloi om thei mah, Krista vai hi itinrêng a nia, itinrênga a om.

¹² Khanchu Pathian mi inthang, mi irthiang le inditom takhai ni le irhoiin lungrîl taka irrenna hai, khonzana hai, irngaiintômna hai, thuhnuairôlna hai, tuangdiarna hai khan irvô roi.

¹³ Tukhomin tu chunga khom thu’ntak nin neiin a tuang theiin, irngaidam irhlôm roi, Rengpa’n nangni a ingaidam ang khan tho roi.

¹⁴ Khahai murdi chunga khan lungthungna irbel unglân, kha kha itinrêng inrual taka khitkhop theitu a ni.

¹⁵ Krista irngeina khan nin milunga roirêl ri se, takpum inkhata om hranga koi nin ni. Lômna châng inhre roi.

¹⁶ Krista thu kha, a’rchongna murdi leh nangnia om ri se. Inpâkna hla hai, Pathian hla hai, Irtha tiang hla hai le vârna tinrêngin irchutir unglân, irthor irhlôm roi. Nin milung taka Pathian chôiindômin raifân takin inpâk roi.

¹⁷ Krista zâra Pathian kuanga lômthu hril pumin, nin itho murdi, thu’nsîra mani sinthoa mani Rengpa Jisua irhmingin tho zit roi.

Hringna thara Kristian in sûngkua om dân

¹⁸ Nuhaio, nin pasalhai thu zôm roi, kha kha Rengpa mihai tho rua a ni.

¹⁹ Pahaio, nin dôngmahai lungthung unglân, an chunga sual no roi.

²⁰ Nâipanghaio, lam tinrênga nin nu le nin pahai thu zôm roi, kha kha Rengpa nuam lam a ni.

²¹ Pahai khom nin nâihai ninginmurtir no unglân, an beidongna ti.

²² Suakhaio, lam tinrênga nin puhai thu zôm unglân, mihriam inlômtir tumtuhai anga an hmu laia vai sin loiin, milung taka Rengpa chi pumin an hmu loia khom sin roi.

²³ Nin itho murdi mihriam sintho ang ni loiin Rengpa sintho ang takin tho roi.

²⁴ Irchon nin ilua hrang hi Rengpa ata lômman a nih ti inhre mai roi. Rengpa Krista sin nin itho a ni.

²⁵ Thil dikloi thotuhai khan thil dikloi an itho man hmu an ti, Pathian chu tûte theibîk nei mah.