JOSUA 8 - PATHIAN LEKHABU IRTHIANG C.L. Bible (BSI)

Ai khua ata insiat thu

¹ Rengpa’n Josua kuang, “Chi no unglân, beidong no roi; Israelhai laia irdoi thei mi hruai zitin lân, Ai khua doi hrangin fe roi. Ai khua rênghai, a mihai, a koppuihai le a ramhai chu ni kuta nang ki pêk tâk a ni.

² An khua le an rêng chu Jeriko khua le an rêng ni soisak ang khan soisakhai ro, atûn zoroa hin chu an belra le an sâhai chu mâni ta hrangin la nin ti. Khopui inrûka irdîp hrang a hnung tiang ata siahai ro,” a tia.

³ Ai khua doi hrangin Josua le a sipaihai chu an irsiama. Josua’n mi feltak tak sîngthum an thangsuaka, zâna an fetirhaia.

⁴ Josua’n, “Khua hnung tianga khan hla ok loiin irbi zêt roi, irning chakin om roi.

⁵ Ki mihai le khua chu matona ang khan va doi kin ta, ni doi hrangin anni khom hong suak an ta; matona ang khan intânpat kin ti,

⁶ khua ata hlataka an ni irzûl zoi tena, matona ang khan kin irzûlhai pat tâk mani ti an ti.

⁷ Nin irbukna hmun ata hong suak nin ta, khua chu nin ilâk hrang a ni. Nin Pathian Rengpa’n nangni pêk a ti.

⁸ Khua nin lâk zoia chu Rengpa thu angin hâl roi. Nin itho hrang chu kha kha a ni,” a tia.

⁹ Josua’n anni chu an fetirhaia, Ai khua thang tiang Bethel le Ai khua kâra khan an oma, zâna Josua-hai chu an riakbuka an riaka.

¹⁰ Josua chu zîng taka a thoia, a mihai chu a koikhômhaia, Israel upahai le ileh Ai khua chu an pan tâka.

¹¹ Khua lûtna kotsua tiang, hmâr tiang a sipaihai chu riakbuk an khuara, Ai khua le an kâra khan irhôr a oma.

¹² Ai khua thang tiang, Bethel le an kâra inrûka lei irbîk hrangin mi sângringa a siaa.

¹³ A sipai irbukna hmunpui hmâr tiang ata Ai khua doi hrangin an irning chiana, khua thang tianga lei irbîkrûka lei irning chian khom an oma. Kha ni zân khan Josua chu irhôra khan a fea.

¹⁴ Ai khuaa rêngin a lei hmua, a mihai le zînga an thoia; Israelhai le an irdoina hmun Araba irhôra khan Israelhai doi hrangin an zu fe nôk tâka, an hnung tiang ata khopui doi hranga mi lei irbîk inrûk an om ti inhre mahai.

¹⁵ Josua le Israelhai chu ichiom ang takin ramkâr tiang panin an intân pata.

¹⁶ Ai khuaa mihai chu an ni irzûlhai hrangin an irkoi bûma, Josua chu an irzûla, khua chu an suaksan zit tâka.

¹⁷ Ai khua mi murdi’n Israelhai chu an irzûla, khua lei hrungtu mi inkhat lua om mahai, khua chu mâksanin irhonghlangin a oma.

¹⁸ Rengpa’n Josua kuang, “Ni ufei khan Ai khua inkhîk ro, khua chu nang pe ki ti,” a tia.

¹⁹ Josua’n a ufei inlên leh khan Ai khua chu a inkhîka, khaanga a inkhîk lai tak khan lei inruangtuhai kha an irbîkna hmun ata an zuang suaka, khuaa an lûta, an lâk tâka; khua chu an hâl rip tâka.

²⁰ Ai khua mihai chu an hnung tiang an irheia, an khua kâng meikhu ngut ngut kha an hmua, ramkâra intânhai khan an doi nôka, intânna hrang rêng rêng inhre ta mahai.

²¹ Josua le Israelhaiin an sipai lei irbîkrûkhai khan khua chu an lâka, an hâlna meikhu dût dût kha an hmu’n chu, an hong doihai nôka, Ai mihai chu an that tôlpaihai tâka.

²² Khua lâktuhai khan an hong doi nôka, Israelhaiin an kachêpa, tûte dama intân suak om loiin an that zit tâka.

²³ Ai khuaa rêng kha chu a hringin an chela, Josua kuanga an hong hruaia.

²⁴ Ai khua mi, Israel irzûltuhai kha ramchâra an lei thathai zita, an sât thathai hnunga chu Ai khuaa Israel mi murdi chu an fea, khataka mi murdi chu khandaiin an that zita.

²⁵ Kha nia khan, Ai khuaa mi an thathai chu nupang pasal tepin mi sîngkhat le sânghni an kâi.

²⁶ Ai khua mi an that zoi zit mâka chu Josua’n a ufei kha an lek maia.

²⁷ Josua kuanga Rengpa thupêk angin sâ an ilâkhai le an râllâk sumhai chu an mâni hrangin an lâka.

²⁸ Khan, Josua’n Ai khua chu a hâl insiat zita, atûn ten hin a ram a isiat zit a ni ta.

²⁹ Josua’n Ai khuaa rêng chu khohloi dênin thinga an khâi thata, misa a tâkin chu Josua thupêk angin a ruak chu an kaisuma, khua kul mikot sîra khan an paia, lungin a ruak kha an irkhua, atûn ten hin kha kha a la om.

Dân bu Ebal tânga an tep

³⁰ Khanchu, Josua’n Israelhai Pathian Rengpa hrangin Ebal tânga maichâm a siama.

³¹ Rengpa siahlo Mosia’n Israelhai kuanga thu a ipêk, Mosia Dân bua irziak angin lung thîr leh siam irfûk ni loiin maichâm an siama. Rengpa kuang hâlirvôm thilinhlan le irpôlkhômna thilinhlan an inhlana.

³² Israelhai mithmu lai ngêta Josua’n Mosia dân chu lunga khan a’rziak suaka.

³³ Israelhai laia an upahai, hruaituhai, roirêltuhai le an laia nam dang omhai le Levi irchi ochaihai irzôn, Thuthung Bôm tiang irheiin, kiang tiang kiang tianga an indinga. A chimripin Gerizim tâng tiang an mâsongin an ngîra, a chimripin Ebal tâng tiang an mâsongin an ngîra. Rengpa siahlo Mosia’n Israelhai kha sat a ivurhai hrang a nih tia thu a lei ipêk tâk ang khan.

³⁴ An inding infel zoiin chu, Dân bua thu murdi, satvurna thuhai, khomâksâmna hrang thuhai chu Josua’n a tep suak zita.

³⁵ Israel mipuihai makunga, nupanghai, nâipanghai le an laia fe sa nam dang mihai makunga Mosia’n thupêk murdi chu a tep suak zita, tep irhmâi nei viat mah.