JOSUA 6 - PATHIAN LEKHABU IRTHIANG C.L. Bible (BSI)

Jeriko siat thu

¹ Israelhai lût thei loi hrangin Jeriko kul chu an khâr khaka; tûte suak thei mahai, tûte khom lût thei mahai.

² Rengpa’n Josua kuang, “Jeriko khua chu an rêng le a sipai hrât huaisenhai leh nang ki pêk tâk.

³ Nang le râlkâp mi murdi’n khopui hi a sûna voikhat hong vêl phot nin ta; khaang khan sûn ruk nin ivêl hrang a ni.

⁴ Sûn sari ni’n chu ochaihaiin belra chal irki bekul chôiin Thuthung Bôm irzôntuhai matona khan fe an ta, belra irki chu tum an ta, voisari an ivêl hrang a ni.

⁵ Khan bekul chu inring takin tum an ta, kha kha nin inhriat tika thei dôrin mipui murdi khêk sup sup unglân; kul chu chim rup a ti; khanchu sipaihai kha irdîn ngitin khopui chu lût thei an ti,” a tia.

⁶ Nuna nâipa Josua’n ochaihai chu a koia, “Rengpa Thuthung Bôm chu irzôn unglân, ochai sari, bekul chôi chitin malam hruaihai sianlân, zuihai roi,” a tia.

⁷ Mipuihai kuang, “Fe unglân, khua chu vêl roi, Rengpa Thuthung Bôm matona khan râlthuam chôituhai fe masa ri sehai,” a tia.

⁸ Josua’n mipuihai kuang thu a hril zoiin chu a iti ang khan an tia; bekul chôitu ochai sarihaiin bekul chu an tuma; Rengpa Thuthung Bôm irzôntuhaiin an zuia.

⁹ Bekul tumtu ochaihai matona râlthuam chôituhai an fea, Thuthung Bôm hnung tianga râlthuam chôituhaiin hnung tiang an hrunga. Bekul chu mong loiin an tum ngota.

¹⁰ Josua’n mipuihai kuang, “Khêk roi duah, ki ti tika thei dôrin nin ikhêk hrang a ni, ki ti mân chu nin ikhêk hrang ni ma,” a tia.

¹¹ Rengpa Thuthung Bôm irzôn pumin khua chu voikhat an vêla, an riakbuka an kîr nôka, zâna an riaka.

¹² A tûka Josua chu zînga a thoia, ochaihaiin Thuthung Bôm chu an irzôn nôka.

¹³ Râlthuam chôiin malam an hruaia, ochai sari, bekul chôiin an zuia, bekul chu chumloi chatloiin an tuma; Thuthung Bôm irzôntuhai chu râlthuam chôihaiin an hong hrung thiaia.

¹⁴ A sûn hninaa khom khua chu voikhat an vêla, riakbuk tiang an kîr nôka. Khaang ngêt khan sûn ruk an vêla.

¹⁵ A sûn sari nî khan chu zînga a vâr tônin an thoia, an tho dân pangaiin khua chu an vêl nôka; kha ni khan chu voisari an vêl irkuala.

¹⁶ A voisari an vêlnaa ochaihaiin bekul an hong tumin chu Josua’n, “Khêk ta roi, Rengpa’n khua hi a ni pêk tâk!

¹⁷ Hi khopui le a sûnga om murdi hi Rengpa hranga pêkhlet a ni ta. Ei mi tîrhai lei inzôktunu sikin Rahabi le a ina om murdi chu inzôkin a iom hrang a ni.

¹⁸ Kha, thilser tak rêng rêng chu ite nin insiat hrang ni mah, inkhat khom nin ilâk hrang ni ma, nin lâkin chu Israelhai om khômna buka siatna irkhêltak a itung hrang a ni.

¹⁹ Sumru hai, rângachak hai, dâr hai leh thîrhai chu Rengpa sum ina sataka sia hrang a ni,” a tia.

²⁰ Khanchu, ochaihaiin bekul chu intông nuai nuaiin an tuma, mihaiin kha kha an inhriatin chu an khêka, kul bang chu a chim tâka; an mâni mân tiang irdîn ngitin an lût ta sup supa, khua chu an lâk tâka.

²¹ Khua chu an insiat zita, a sûnga om nupang pasal, ulian nâipang, sehrât hai, belra hai, sakuartung hai le ileh khan khandaiin an sât thathai zita.

²² Ram envêltuhai kuang, Josua’n, “Notizuar ina fe unglân, kha nu kha a nei murdi le va hruai suak roi,” a tia.

²³ Envêltu ruatharte, a ina tunghai khan Rahabi chu a pahai, a nuchahai leh a urêng irnaipui, a iompuihai leh a nei murdi leh ile an hruai suaka, Israel riakna hmuna khan an hruaia.

²⁴ Khua leh a sûnga om murdi chu an hâl zita; sumruhai, rângachak hai, dâr bêlhai, thîrhai rêk chu Rengpa sum ina an siaa.

²⁵ Jeriko envêl hranga Josua mi tîrhai a lei inzôkhai sikin, notizuar Rahabi chu a pa insûng mi le, a nei murdi le ileh Josua’n a sansuaka, Israel laia atûn ten hin a la ikop mai a ni.

²⁶ Kha zoi chu Josua’n mipui chu hiang hin chong a bêhai tâka: “Jeriko khua inding nôk tumtu chu Rengpa khomâksâm dong ri se, A lungphûm siamirfûk nôktu chu nâilutîr inchân sianlân, A kul lampui siamtu chu a nâimitum inchân ri se,” a tia.

²⁷ Rengpa’n Josua chu a ompuia, ram pumpuia a’rhming an thang tâka.