JOSUA 5 - PATHIAN LEKHABU IRTHIANG C.L. Bible (BSI)

¹ Jordan dung nitâk tianga om, Amor rênghai murdi le Mediteranean tuipui panga om Kanaan rama rêng murdihaiin Israelhai Jordan dung an irkân sûng chu vadunga tui chu Rengpa’n an kangtir ti an lei inhriatin an chia, an lei rot zit tâka.

Gilgal-a sertan thu

² Kha lai khan Rengpa’n Josua kuang, meilung chemte siamin lân, Israel mi, ser la tan loihai ser tanna neipuihai nôk ro,” a tia.

³ Josua’n meilung chemte a siama, Israelhai chu Gebeat-ha-arat hmuna khan an ser a tan pehaia.

⁴ Josua’n an ser a tan nasan chu hi hi a ni: Aigupta ram ata suak pasal râlkâp mi murdihai chu ramkâra an thi zit tâka,

⁵ an suak phuta khan ser an tan zit a ni; lampuia an hong sûnga suakhai kha chu an ser la tan loi an ni.

⁶ Israel mihai chu ramchâra kum sômminli an invâia, Aigupta ram ata an hong suak ata râlkâp mihai chu an thi zit tâk a ni. Rengpa thu an irngai no sikin khuaihlutui le dûttui luangna ram inkung, eini ni pêk hranga a chong a lei inkung kha, tung no nihai, tiin Rengpa’n chong a lei inkunga.

⁷ An irthûla, an nâihai a don inlianhaia, kha mihai kha a ni Josua’n ser a itan pehai chu a ni, lampuia an ser an tan no sikin.

⁸ Mipuihai murdi ser an tan hnunga an dam mâka chu an riakbuka an oma.

⁹ Rengpa’n Josua kuang, “A vuan hin Aigupta mihaiin nangni an hmusitna kha kin boipai tâk,” a tia. Kha hmun kha atûn ten hin Gilgal an ti ta a ni.

¹⁰ Gilgal-a Israelhaiin riakbuk an khuara, Jeriko phâizôla khan, kha tha tarik sômkhat minli ni khan ferkân kût an hmanga.

¹¹ Ferkân kût zoia sûna khan, kha rama barli inzêi inphuak, chol pol loi bai le changpêr an fâk sa tâka.

¹² Kha rama bu an fâk ata chu mana khom tâk ta mah. Israelhaiin mana fâk hrang nei ta mahaia, kha nî kum ata chu Kanaan rama bu le bâl thar an fâk tâk a ni.

Josua le mi inkhat khandai chôi

¹³ Josua chu Jeriko khua kôla a om laiin mi an envêla, mi inkhat, khandai chôi hi a matona a lei inding a hmua. Josua’n a va pana, “Keini tianga sipai mo ni inih kin râl mo ni ini?” a tia.

¹⁴ “Ni make, Rengpa sipaihai hruaitu ki nia, ki ihong tâk a ni hi,” a tia. Josua chu irnênga khûksadelin a kûna, “Ni siahlo kuanga hin imo hril ni nuam?” a tia.

¹⁵ Rengpa sipaihai hruaitu’n Josua kuang, “Ni kekok kha khek ro, ni ngîrna kha hmun irthiang a ni,” a tia. Josua’n a kekok a khek tâka.