JOSUA 24 - PATHIAN LEKHABU IRTHIANG C.L. Bible (BSI)

Sekem khuaa Josua chongbe

¹ Josua’n Israel namhai chu Sekem khuaa a koibûmhaia. Israel upahai, nam hruaituhai, roirêltuhai le ulianhai chu Pathian makunga an hong irbûma.

² Josua’n mi murdi makunga, “Rengpa, Israelhai Pathianin hiang hin a ti: Tianlaia nin irchibul pi le puhai chu Eufrates vadung râla an om ngaia, pathian danghai an biak ngai. An laia mi inkhat chu Tera a ni, ama chu Abrahama le Nahora pa a ni.

³ Nin pu Abrahama chu Eufrates vadung râl ata Kanaan ram pumpuia ki hruai inlûta, Isaka ki pêka, a’rchi tamtakin kin punga,

⁴ Isaka chu Jakoba le Esaua ki pêka, Seir tânghai chu Esaua omna tâng hranga pêk a ni. Jakoba le a nâihai chu Aigupta rama an lûta.

⁵ Inhnunga chu Mosia le Arona kha ki tîra, Aigupta mihai chu ki hremhai tak taka, nangni chu Aigupta rengata nangni ki hruaisuak tâk a ni.

⁶ Nin pi le puhai chu Aigupta ram rengata ki hong hruaisuaka, Aigupta mihaiin sakor thîrtâli le sakor chunga chuang mihai leh ile an hong irzûlhaia;

⁷ Khannisian, Tuipui Sen an tungin chu changpuitu zongin Rengpa an koia, Aigupta mihai le an kâra inthim an omtira, tuipuia khan Aigupta mihai an tâka, a tânhai tâka. Aigupta rama ki sinthohai chu nin inhriata, ramchâra zoro sôttak nin oma.

⁸ Jordan nisua tianga om, Amor mihai omna chu nangni ki hruai intunga, nin irdoia nin inhnêhaia, an ram chu nin nei tâka. Anni chu ki that irhmanghai tâk a ni kha.

⁹ “Khan, Zipora nâipa Balaka, Moab rêngin Israelhai chu a lei doia, Beora nâipa Balaama chu khomâksâm khumhai hrangin a lei phuna.

¹⁰ Khannisianlân, Balaama thu chu irngai nuam ma unga, sat nangni a ivur tâk a ni; khaang khan Balaka kut ata nangni ki isansuak a ni;

¹¹ Jordan vadung nin kâia, Jeriko khuaa mihaiin nangni an lei doia; Amor mihai, Periz mihai, Kanaan mihai, Hit mihai, Girgas mihai, Hiv mihai le Jebus mihai khomin nangni an lei doia; khannisian nangni ki inhnêtir zit a ni.

¹² Amor rêng inhnihai len vâng chu khandai mani thal mani hmang nang loiin nin maton tiang khuaibêl ki tîra, an hnotsuakhai zit a ni.

¹³ Nin la ichuan viat loina ram nangni ki pêka, in nin la isin loina khopui nangni kin omtir a ni. Atûn chu nin iphun loi grep ra nin irhmala, nin iphunloi oliv ra nin fâk tâk a ni hi.

¹⁴ “Khasikin, Rengpa chu inzâ unglân dik takin a sin tho ngit roi. Mesopotamia ram le Aigupta rama nin pi le puhai ibiak ngai pathian illimhai kha pai zit roi.

¹⁵ Rengpa sintho hi sa nin ti no’n chu nin irchibul pi le puhai ibiak, Mesopotamia ram pathianhai sin kha mo nin tho nuam, atûna nin omna rama mi, Amor pathianhai hi mo, a vuan hin nin nuam nuam inthang roi. Kei le ki insûng mihai rekin chu Rengpa sin hi a nih kin tho hrang chu,” a tia.

¹⁶ Mipuihaiin, “Rengpa chu mâksanin pathian danghai sin hi kin itho loi hrang a ni hi!

¹⁷ Aigupta rama suak kin ni laia ni hruaisuaktu chu Rengpa, ei Pathian hi a ni hi te; thil roiinpuitak tak a tho kin hmua, nam tin chi tin laia kin fena tina a ni saninzôk mai ngai.

¹⁸ Hi rama kin hong tung khomin Rengpa’n kin matona lei om, Amor mihai an hnotsuak zit a ni kha. Khasikin, Rengpa sin hi ei tho hrang chu, ama vai hi ei Pathian chu a ni,” an tia.

¹⁹ Josua’n mipuihai makunga, “Rengpa sin hi tho thei no chin ni: Ama chu mi irthiang a ni, pathian dang rêng rêng irngai thei maka, nin tho inchâinahai le nin sualhai ngaidam thei no ni.

²⁰ Rengpa chu irheisanin pathian dang sin ni tho’n chu nangni doiin nangni hrem a ti; nin chunga lei sa ngai khom sianlân, nangni a that irhmang zit hrang kêng,” a tia.

²¹ Mipuihaiin Josua an sâma, “Ni ma! Rengpa sin kin itho hrang a ni,” an tia.

²² Josua’n an kuang, “Rengpa sintho hrang nin inthang hi nangni ngêtin nin inthang a nih ti inhriattuhai chu nin nia,” a tia. Anni’n, “O a ni, thu’nhretuhai kin ni,” an tia.

²³ Josua’n, “Khaang khan a ni’n chu, nam dang pathian illim nin idônhai kha pai zit roi duah: Israelhai Pathian Rengpa vai hi pom roi,” a tia.

²⁴ Mipuihaiin Josua chu an sâma, “Kin Pathian Rengpa sin hi kin tho hrang a ni, a thu khom zôm zêl kin ti,” an tia.

²⁵ Khan, kha sûna khan Josua le mipuihaiin thu an thunga; an zôm hrang dân le thupêk a siam pehaia.

²⁶ Josua’n kha thu kha Pathian dân bua khan a’rziak lûta; lung liantak a lâka, Sekem khuaa Rengpa Hmun Irthiang saisothing kung bula khan a phuna.

²⁷ Josua’n mipuihai kuang, “En u ta, hi lung hi ei thu inhretu a ni; ei kuanga Rengpa thuhril murdi kha an hriat zita, nin Pathian nin mâksan loina hrangin nin thu’nhretu a ni,” a tia.

²⁸ Josua’n mipuihai chu an fetirhaia, an mâni khua senga an kîr nôk tâka.

Josua le Eleazara thi thu

²⁹ Kha zoia chu kum irzakhat sômhni a ni’n Josua chu a thi tâka.

³⁰ Gaas tâng hmâr tiang, Efraimhai ram, tâng rama ama ram Timat-sera-ah khan an phûma.

³¹ Josua dam sûng chu Israelhaiin Rengpa sin an thoa, a thi zoia khom an tho, an mâni mit ngêta Rengpa sintho murdi hmutuhai dam sûng chu an sin zêla.

³² Josefa ruak, Israelhaiin Aigupta ram rengata an hong chôi kha Sekem khuaa khan an phûma, Jakoba’n tangka sumru irzakhata Sekema Hamora irchihai kut ata a irchôk ram a ni, hi ram hi Josefa irchihai ta hranga ram irchon a hong ni ta zêla.

³³ Arona nâipa, Eleazara khom a thia, Efraima mihai tâng rama om, a nâipa Finehasa an ipêk ram Gibea khuaa an phûma.