JOSUA 22 - PATHIAN LEKHABU IRTHIANG C.L. Bible (BSI)

Nisua tianga omhai Josua’n a tîr nôk

¹ Josua’n Reubena irchihai, Gada irchihai le Manasea irchi chimriphai chu a koihaia,

² an kuang, “Rengpa siahlo Mosia chong nin zôma, ki ihril murdi khom kha nin zôm zêla;

³ nin urênghai chu zoro sôt tak sûng irheisan loiin nin Pathian Rengpa chong pêk nin zôm ngita.

⁴ Atûn chu, Rengpa nin Pathianin a inkung angin nin urêng Israelhai chu hoitakin a inomtir tâk hi, khasikin Rengpa nin Pathian siahlo Mosia’n Jordan râla ram nangni a ipêk tâka khan va kîr nôk ta roi.

⁵ Rengpa siahlo Mosia’n dân nangni a ipêk kha zôm ngêt unglân, nin Pathian Rengpa chu lungthungin a thupêkhai chu zôm unglân, a nuamlam tho ngai unglân, ama chu iamoma kop indet khakin nin lungrîl murdi le nin irtha murdi’n a sin tho roi,” a tia.

⁶ Khanchu, Josua’n sat a vurhaia, an kîrtirhaia, an in tiang an kîr nôk tâk.

⁷ Mosia’n Manasea irchi chimriphai chu Jordan nisua tianga Basan ram a pêka, a chimrip dang chu Josua’n Jordan nitâk tianga ram a pêk sa. Josua’n in tiang an kîrtirhaia khan sat a vurhaia,

⁸ “Belra le kêlhai, sum le rângachak hai, dâr le thîrhai, le puandiar tamtak leh ile, irchong takin in tiang kîr nôk nin ta, nin râlhai thil nin ilâk pehai chu nin urêng danghai sem sahai roi,” a tia.

⁹ Reubena irchihai, Gada irchihai le Manasea irchi chimriphai chu Silo khua rengata in tiang an kîr tâka. Israel danghai chu Kanaan rama Silo khuaa khan an mâksanhaia, Mosia kuanga Rengpa thupêk angin an ram chang Gilead ram chu an pan tâka.

Jordan dung kôla maichâm

¹⁰ Reubena irchihai, Gada irchihai le Manasea irchi chimriphai khan Jordan nitâk tianga om, Kanaan rama Gelilot chu an tunga, ivadung kôla khan ennuam om taka roiinpui maichâm lian an siama.

¹¹ Israel mi danghai kha, Reubena hai, Gada hai, le Manasea haiin Kanaan rama Jordan dung kôla, Israel mihai rama khan maichâm an siama, ti mi’n an hrilhaia.

¹² Israel mipuihaiin an lei inhriatin doi an tuma, Silo-ah an irbukkhôma.

¹³ Khanchu, Reubena hai, Gada mihai, nisua tianga om Manasea mi chimriphai chu Gileada an om laiin Israel mihaiin ochai Eleazara nâipa Finehasa chu an tîra;

¹⁴ ama leh khan milian sôm, Israelhai nam laia sûngkua ulian tak inkhat zêlin le nitâk tianga nam sôm hruaitu tak inkhat zêlin a pâlin an tîrhaia.

¹⁵ Gilead an tunga, Reubena mihai, Gada mihai, le nisua tianga Manasea mi chimriphai kuang,

¹⁶ “Mipuihai, Rengpa mihaiin, hi thilsual tak hi Israelhai Pathian chunga i sika nin itho mo? Hi maichâm nin isiam hi Rengpa nin idoi tâk tihna a ni, a thu nin izôm ta loi a ni hi te.

¹⁷ Peor hmuna thilsual ei itho kha nin la inhriat mai mo ni ma? Rengpa’n ama mihai ngei khom hri a’rveitira, a hrem a ni kha,

¹⁸ Rengpa chu i sika mo nin izui nuam loi? A vuan hin Rengpa chunga nin nuar sikin nangtûka chu Israel mipuihai chunga a ninginmurna chum a ti.

¹⁹ Nin ram hi ama biakna inrukloi raka porinche a ni’n chu Rengpa puan in biakbuk omna tiang hong unglân, kin laia ram nei sa no ung mo; Rengpa chunga le kin chunga nuarin kin Pathian maichâm ni loi chu maichâm dang siam no roi.

²⁰ Zera nâipa Akana khan thil ser tak ansiata, Israel mipuihai chunga siatna a tunga, Akana vai ni loiin mi dang khom an thi kha,” an tia.

²¹ Reubena mihai, Gada mihai, nisua tianga Manasea mihaiin Israel hruaituhai chu an sâma,

²² “Rengpa chu pathianhai Pathian a ni. pathianhai Pathian Rengpa’n kin itho lam a inhril hi te; nangni khomin inhriat sa unglân kin nuam. Rengpa chunga nuar kin nia, a chunga iamomloi kin nia chu, hring damin nin omtir ta no roi.

²³ Rengpa chong zôm loiin hâlirvôm thil inhlanhai kin inhlanna hranga keini maichâm kin isiam a ni’n chu Rengpa ngêtin ni hrem ri se.

²⁴ Khaang kha ni ma: nakana nin irchihaiin kin irchihai kuang hiang hin an tih itinin ti hi kin ichi a ni. ‘Rengpa Israelhai Pathian chu, nin ibiak sa hrang ma ni?

²⁵ Ama’n Jordan dung chu Reubena le Gada mihai leh ramri hrangin a siama, Rengpa hi biak sa hrang ni mak chêi’ tiin nin irchihaiin kin irchihai chu khappaina an ti.

²⁶ Khasikin, hâlirvôm thil inhlan le irbôlna chi dang inhlanna’n maichâm hi siam ni ma ung.

²⁷ Nin mihai le kin mihai, rualthoithar hong ni zêlhaiin Rengpa kuang ngêt hâlirvôm thil inhlanhai, irpôlkhômna thil inhlanhai le irbôlna thil inhlanhai kin inhlan ngai ti an inhriat theina hrang le nin irchihaiin kin irchihai kuanga, ‘Rengpa hong biak hrang ni mak chêi,’ an ti loina hranga kin isiam a ni.

²⁸ Khasikin, nakana kin irchihai chunga hianga irtîna chong a hong om tika ngaitua’n, ‘Kin irchibul pi le puhaiin Rengpa maichâm ang chie hin hi maichâm hi an isiam a ni, hâlirvôm thil inhlan mani irbôlna thil inhlan mani kin inhlanna hranga ni maka, nangni le keini kâra irsinsiana hrang kêng,’ tiin an sâm theina hranga kin isiam a ni.

²⁹ Rengpa chunga nuar kin itum ni ma, Ama irheisana kin thil inhlan hâlna, kin bu bâl thilinhlan le irbôlna inhlanna hranga maichâm dang siam kin itum khom ni ma, ei Pathian maichâm, a biakbuk kôla om ang kha chu maichâm dang rêng rêng inding ma ung,” an tia.

³⁰ Ochai Finehasa le mipuihai hruaitu, nitâk tianga om nam hruaitu sômhaiin Reubena mihai, Gada mihai nisua tianga Manasea mi chimriphai chong chu an inhriatin an milung a chuk tâka.

³¹ Finehasa, ochai Eleazara nâipa’n an kuang, “Rengpa’n a ni ompui mai ti kin inhriat tâk; Rengpa chunga nuar loia nin iom hi; Rengpa’n Israelhai hremhai mah,” a tia.

³² Reubena le Gada irchihai omna Gilead rengata ochai Eleazara nâipa Finehasa le Israel hruaituhai chu Israel mihai omna Kanaan ram khan an kîra, an thu inhriat kha an va hrilhaia.

³³ Israel mihai chu an lung a chuk tâka, Pathian an inpâka. Reubena le Gada irchihai omna ram kha insiatpai rip thu chu hril ta mahai.

³⁴ Reubena irchi le Gada irchihaiin kha maichâm kha, “Kin kâra Rengpa hi Pathian chu a nih ti inhriatpuitu a ni,” an tia. Khasikin, a’rhming khom “Thu’nhretu” an phua tâk a ni.