JOSUA 20 - PATHIAN LEKHABU IRTHIANG C.L. Bible (BSI)

Zôkna khopuihai

¹ Rengpa’n Josua kuang,

² “Israel mihai hril roh, Mosia ki inhril ang khan zôkna hrang khua inthang roi.

³ Châiirpal mani, hmu loi sika mani mihriam thata, an thisen phuba lâktu ata an intâna, an irbîk theina hrangin.

⁴ Kha khuaa khan intân an ta, khopui lûtnaa inding an ta, kha khuaa upahai kuang an hong intân nasan kha an ihril hrang a ni; anni’n hmun lei ngaitua pehai an ta, an omna hrang pehai an ti.

⁵ Thisen phuba latuhaiin an hong zong khomin an lei ihrung hrang a ni, châiirpal a ni sikin, ningmur sika that chu ni no ni.

⁶ Kha khuaa khan Israel irbukkhômhaiin an chung thu an rêl mâka le, ochai inlaltak chang lai a thi mâka chu a iom mai hrang a ni; kha zoia chu, kha mi châiirpalna mi thattu kha a hong intâna, an khuaa ama ina ngêt kîr nôk thei ta a ti.

⁷ Hi a hnuaia khuahai hi Israel mihai ta hrang le an laia om nam danghai zôkna hranga an inkunghai chu a ni. Kades khua, Naftalia ram nitâk tiang Galili biala; Sekem khua, nitâk tianga Efraimahai ram; Kiriath-arba khua (Hebron an ti ngai) nitâk tianga Juda irchihai ram sûnga om.

⁸ Jordan nisua tianga khua: Bezer khua, Golan khua, Manasea hai ram Basan biala om.

⁹ Khahai kha a ni Israel mihai le an laia nam dang omhai ta hranga irhual hranga khua an inkunghai chu a ni. Tukhomin mi that sianlân, hi khuahaia hin an rot thei; an chung thu chu Israel irbukkhômhaiin an rêl infel mân chu thisen phuba lâktu kuta thi no nih.