JOSUA 17 - PATHIAN LEKHABU IRTHIANG C.L. Bible (BSI)

Nitâk tianga Manasea irchihai ram

¹ Josefa nâilutîr, Manasea irchihai ram chang chu hi hi a ni: Josefa nâipa upa ual Manasea nâipa Makira, Gileada pa chu, mi huaisen a nia. Jordan nisua tianga Gilead le Basan ram chu an dongtum hrangin an pêka.

² Jordan nitâk tianga Manasea nâi danghai hrang ram a pêk saa, kha mihai chu: Abiezera, Heleka, Asriela, Sekema, Hefera le Semida hai an ni. Hihai hi Josefa nâipa Manasea nâipasalhai, insûngkuaa ulianhai an ni.

³ Hefera nâipa Zelofehada’n nâipasal nei loiin nâinupang vai a neia. A pu chu Makira, Manasea nâi a ni. Zelofehada nâinupanghai chu, Mahlaii hai, Noi hai Hoglaii hai, Milkaii hai, Tirzaii hai an ni.

⁴ Anni chu ochai Eleazara hai, Nuna nâipa Josua hai le Israel nam hruaituhai kuang an va fea, ‘Rengpa’n kin urêng pasalhai ang takin ram ni pêk hrangin Mosia a inhril kha,’ an hong tia. Rengpa thupêk ang takin an urêng pasalhai angin ram chu an chang tâka.

⁵ Jordan nisua tianga Gilead le Basan ram kopin Manasea irchihai dongtum hmun sôm an nei bîk a ni.

⁶ Nâipasalhai ang takin an nâinupanghaiin ram an chang sa tâk sikin Gilead ram chu Manasea irchi danghaiin an chang tâk a ni.

⁷ Manasea irchihai ram chang chu Asera-hai ram chang rengata Sekem khuaa nisua tianga Mikmethat khua kâr chu a ni. Sim tiang ramri chu a fea, Entapuaa omhai chu a huama.

⁸ Tapua ram hi Manasea-hai ichang a ni, a khopui Tapua hi chu Efraimahai ta a ni.

⁹ Ramri chu Kana dunghaia a zu chuma. Vadunghai kôl sim tianga khuahai chu Efraimahai ta a ni, Manasea hai ram sûnga om ni khomsian; ramri chu hmâr tianga vadunghai kôla a fe zêla, Mediteranean tuipuia a suaka.

¹⁰ Sim tiang Efraimahai an oma, hmâr tiang Manasea-hai an oma, Mediteranean tuipui hi an ramri a ni; Asera namhai chu hmâr tianga nisuana tiang Isakara hai an oma.

¹¹ Asera-hai le Isakara hai ram chang sûnga Manasea khua Beth-Sean le Ibleam khopui, an kôlvêl khuahai leh a oma. Tuipui kôla Dor khuahai, Endor hai, Taanak hai, Megido hai le an kôlvêla khuahai khom a om.

¹² Hi khuaa omhai hi Manasea irchihaiin inhnotsuak thei mahai; khasikin Kanaan mihai chu an la om zêl a ni ta.

¹³ Israelhai an hong hrât zêl hnung khom khan inhnotsuak ual mahai, sintho hrangin chu an norhai ngai.

Efraima le nitâk tianga Manasea-haiin ram an zong sa

¹⁴ Josefa irchihaiin Josua kuang, “Itho sika mo kin irchon hrang ram hmun khat vai ni ni ipêk. Rengpa lakin sat a ni vura, kin tam lak kin tam oka”? tiin an hrila.

¹⁵ Josua’n, “Nin tam oka ni’n chu, Efraima tâng ram hi a chîn viata ni’n chu, Periz le Refaim-hai omna rampuihai hi tukdarh unglân, irthial infâi roi,” a tia.

¹⁶ Anni’n, “A tâng ram ringot hi kin ta hrangin chu ruk no ni; phâia Kanaan-hai lakin thîr sakor an neia; Jezreel phâia omhai le Beth-Sean khopui le a kôlvêl khuahaiin irdoina thîr sakor an nei chit a ni,” an tia.

¹⁷ Josua’n Efraima le Manasea irchihai chu a sâma, “Nin tam oka, hrât khom nin hrâta, ram changtum inkhat vai ni loiin a nêka tam nei ual nin ti.

¹⁸ Tâng ram khi nin changtum hrang ni a ta, rampuipa ringot khom ni sian, tukdarh unglân a ram pumin inhnê roi, Kanaan-hai chu an thîr sakorhai leh hrât tak khomsian, inhnotsuakhai zit an ti,” a ti.