JOSUA 14 - PATHIAN LEKHABU IRTHIANG C.L. Bible (BSI)

Jordan vadung nitâk tianga ram irsem

¹ Jordan vadung nitâk tianga Kanaan ram chu Israel mihai kuanga ochai Eliazara hai Nuna nâipa Josua hai le Israel nam hruaituhaiin hi ang hin ram an sema.

² Rengpa thupêk angin nam kuak le a chimrip nitâk tianga namhai dongtum hrangin tâ an sâna.

³ Jordan nisuana tianga nam hni le a chimrip chu Mosia’n ram irchon hrang a pêk tâka, an laia Levi irchihai chu ram pehai mah.

⁴ Josefa irchihai kha nam hni, Manasea le Efraima nama irsen an nia, khannisian Levi irchihai chu ram irchon pehai mah. An omna khua rêk chu an sialhai le belra le kêl satna hrang ram chu a pêkhai.

⁵ Mosia kuanga Rengpa thupêk angin Israelhaiin ram chu an irsem tâka.

Kaleba ta hrangin Hebron pêk a ni

⁶ Gilgal-a an om laiin Juda irchi laia mi senkhat Josua kuanga an honga. An laia mi inkhat, Keniz mi, Jefunea nâipa Kaleba’n Josua kuang, “Kades-Barnea ei om laia Pathian mi Mosia kuanga, ei inhni chungchânga Rengpa ihril kha nin hriata.

⁷ Rengpa siahlo Mosia’n Kades-barnea hmun ata ram va enirchik hranga mi a itîrhai khan kum sômminli ki ni tâka; khan ki lungrîla om ang tak kha a kuang intung nôk ki ti.

⁸ Ki chanpui, ki urênghaiin, mipui an zâmirzaltira, kei rêkin chu ki Pathian Rengpa thu ki zôm ngit a ni kha.

⁹ Kin Pathian Rengpa thu ni zôm indet khak sikin, ni kea ni va isir ram chu nin ram irchon hrangin ni inei ngêt hrang a ni,’ tiin Mosia’n kha nî khan chong an kung a ni kha.

¹⁰ Irngai ta, Mosia kuanga Rengpa’n thu a ihril kha a vuan ten hin kum sômminli ringa vêl a hong ni tâka, Israelhai ramchâra an irvâk an irvâk lai ata atûn ten hin Rengpa’n a ihril angin hring damin a ni lan zôk tâk hi; en ta, kum sômriat ringa ki hong ni tâka,

¹¹ Mosia’n a ni tîr lai ang tak khan a vuan sûn tena khom ki la hrât a ni. Irdoinaa khom fea, nuam nuama suak zêl theiin ki la ihrât a ni.

¹² Khasikin, kei le ki ifepuihai leh ile chong kin hong intung laia Rengpa iti, hi tâng ram hi ni pe ro ba, Anak mi, milianhai chu kul lianpa pa sûnga an om tiin nangni kin hong inhril kha; Rengpa’n ni ompui mai a ta, Rengpa thupêk angin kin hnotsuak zit thei itinin,” a tia.

¹³ Josua’n ama chu sat a vura, Jefunea nâipa Kaleba chu ram irchon hrangin Hebron chu a pêk tâka.

¹⁴ Khanchu, Israelhai Pathian Rengpa thu chu a zôm tak tak sikin atûn ten hin Hebron chu Jefunea nâipa Keniz mi Kaleba ram irchon a ni ta.

¹⁵ Tianlai khan Hebron chu Kiriath-arba ti a ni ngai, Arba khua tihna a ni. Arba chu Anak mihai laia khan rêng roiinpui tak a nia. Ram chu hoi takin a om tâk.