JOSUA 13 - PATHIAN LEKHABU IRTHIANG C.L. Bible (BSI)

Ram la lâk hrang hmabâk la omhai

¹ Josua chu a ulian tâka, a tar ok tâka; Rengpa’n a kuang, “Ulian ni ni’n ni tar ok tâka, ram la lâk hrang lak chu a la tam oka.

² Filistia le Gesur-hai omna ramhai,

³ Sim tiang Avim-hai omnahai la lâkloi a ni. Aigupta ramri Sihor vadung ata hmâr tiang Ekron dênin Kanaan mihai rama irngai a ni. Filistia-hai chu Gaza haia, Asdod haia, Askelon haia, Gada haia an rêng an iom a ni.

⁴ Kanaan-hai ram le Sidon-hai ram Meara chu Amor ramri Afek dênin la lâk loi a ni.

⁵ Gebal mihai ram, Lebanon tâng nisua tiang Hermon tâng kôla Hamath khua lûtna dênin ram la lâk loi a ni.

⁶ Lebanon tâng le Misrefotmaim kâra tâng rama om murdi Sidon mihai chu, keima’n Israel mihai matona lei inhnotsuakhai zit ki ti, chong nangni ki pêk angin an ram irchon hrangin Israelhai chu pe phot mai roh.

⁷ Khasikin, atûn hin Israel nam kuakhai le Manasea irchi chimriphai kuanga, an ram irchon hrangin sem ro,” a tia.

Jordan nisua tianga ram irsem

⁸ Manasea irchi chimrip leh Reubena irchi le Gada irchihaiin Jordan nisua tianga an ram irchon hrang Rengpa siahlo Mosia pêk kha an neia.

⁹ Arnon dung irhôr sîra khua om Aroer rengata le, irhôr laitaka khopui le, Medeba phâi ram murdi Dibon dênin,

¹⁰ Amor mi, Hesbon khua rêng Sihona ram murdi Amonhai ramri dênin a huama.

¹¹ Gilead ram huamin Gesur-hai le Maakat-hai omna leh, Hermon tâng le Basan rama Seleka a dêna.

¹² Astarot le Edrei rêng Oga ram Basan hai a huama, ama chu Refaim la om sunhai laia mi a ni; Mosia khan khahai kha an hnêa, an hnotsuak zit a ni.

¹³ Aniachu, Gesur mihai le Maakat mihai chu Israelhaiin inhnotsuak mahai, atûn ten hin Israelhai laia an la om sa a ni.

¹⁴ Levi irchihai rêk chu an ram irchon pe sahai ma, Israelhai Pathian Rengpa kuanga an thilinhlan hâlirvôm irbôlnaa zôk chu an dongtum hranga pe hrangin Rengpa’n Mosia chu a hril a ni kha.

Reubena irchihai ram

¹⁵ Mosia’n Reubena irchihai chu an insûngkua kuaa irsem hrang ram a pêk a ni kha.

¹⁶ An ramri chu Arnon irhôr sîra om Aroer khuaa irthokin irhôr lai taka khopui le Medeba tâng inzôlhai,

¹⁷ Hesbon khua le a kôlvêl khuaa tâng zôla omhai, Dibon hai, Mamoth-baal hai, Beth-Baalmeon hai,

¹⁸ Jahaz le Kedemot hai Mefaat hai;

¹⁹ Kiriathaim, Sibma hai, Zereth-sahar, irhôr inzôla omhai;

²⁰ Bethpeor hai, Pisga tâng panghai, Beth Jesimoth hai a huama.

²¹ Tâng zôla khua om murdi le Amor mi Hesbon rêng Sihona ram murdi a huam sa. Kha kha Mosia’n an hnêa, Midian hruaipu Evia hai, Rekema hai, Zura hai, Hura hai le Sihona hnuaia roirêltu an ni.

²² Israel mihaiin Beora nâipa Balaama, pânzia en thei an that sa.

²³ Nitâk tianga an ramri chu Jordan vadung a ni. Reubena irchihai nei hrangin khi khopuihai an vêla khuahai khi an pêka.

Gada irchihai ram

²⁴ Mosia’n Gada irchihai chu an insûngkua kuaa irsem hrangin an ram irchon hrang a pêka.

²⁵ An ramin Jahaz le Gilead khopui murdi a huama, Amon-hai ram chimrip, Raba khua nisua tianga om Aroer a huam saa.

²⁶ Hesbon le Ramat-mizpa le Betonim kâra ramhai, Mahanaim ata Lo-debar ramri inkârhai a huam sa.

²⁷ Jordan vadung tiang chu Beth-Haran hai, Beth-Nimra hai, Sukothhai, Zafon hai le Hesbon rêng Sihona ram lei nihai ngai kha a huam tel sa. Nitâk tianga ramri chu Jordan dung, Galili dîl dênin a ni.

²⁸ Gada irchihai nei hranga khi khopuihai le a vêla khuahai khi an pêka.

Nisua tianga Manasea irchihai ram

²⁹ Mosia’n Manasea irchi chimriphai hranga an insûngkua kuaa irsem hrangin ram irchon an nei hrang a pêka.

³⁰ An ramin Mahanaim ata Basan ram, Basan rêng Oga ram murdi a huama, Basan ram Jair bial khua sômruk khom a huam a ni.

³¹ Gilead bial chimrip, Astarot hai, Edrei hai, Oga ram Basan khopuihai chu a pêk bel sa. Manasea nâipa Makira irchihai kuanga khi ramhai khi a ipêk a ni.

³² Moab phâia an om lai khan, Jeriko nisua tianga ram chu khi ang khin Mosia’n a sema.

³³ Mosia’n Levia irchihai chu ram inkung pehai mah. Israelhai Pathian Rengpa kuanga thilinhlan chu an dongtum hranga a inkung a ni.