JOSUA 1 - PATHIAN LEKHABU IRTHIANG C.L. Bible (BSI)

Pathianin Kanaan ram lût hrangin Josua a tîr

¹ Rengpa siahlo Mosia thi zoiin Mosia changpuitu, Nuna nâipa Josua kuang Rengpa’n,

² “Ki siahlo Mosia chu a thi tâka, Israel mi murdi hi Jordan dung irkânpui ro, ki ipêk hrang rama fe hrangin irsiam roh.

³ Mosia kuanga ki ihril tâk ang khan nin kezaphaa nin isir murdi chu, nangni pe zit ki ti.

⁴ Sim tiang ramkâr ata hmâr tiang Lebanon tâng; sak tiang Eufrates vadung ata nitâk tiang Hit mihai ram, Mediteranean tuipui dênin nin ram ni a ti.

⁵ Josua, ni dam sûngin tukhomin nang inhnê no nihai. Mosia kuanga ki iompui angin nang ompui mai ki ti, nang intha viat no ning.

⁶ Hâitakin irnak song ro; khanchu, an irchibulhai kuanga pêk ki inkung ram chu hruaitu changin lûtpuihai ni ti.

⁷ Hâitakin irnak song phot mai ro; Mosia’n ki dân a ihrilhai hi zôm zitin lân, inkhatte lua zôm loiin om no ro; khanchu lam tinrênga hlochuk ni ti.

⁸ Itiklai khomin ki dân bu sûnga thu irziakhai hi tep irnghil no ro, ni zôm zit theina hrangin a sûn a zânin irchu ngai ro; khanchu lam tinrênga hmangchangin hlochuk zêl ni ti.

⁹ Hâitakin irnak la roh ki iti kha inhriat mai ro, chi no’n lân, rot no ro; kei Rengpa hin ni fena tina nang ki ompui mai a ni,” a tia.

Josua thupêk

¹⁰ Josua’n Israel mipui hruaituhai kuang,

¹¹ “Riakbuk hmuna fe zit unglân, mihai kuanga, ‘Sûn thum sûngin, Rengpa nin Pathianin nangni a ipêk ram lua hrangin Jordan dung ei irkân hrang a nia, fâk nêk hrang siam irfûk roi,’ ti roi duah,” a tia.

¹² Reubena namhai, Gada namhai le Manasea namhai zât chimriphai kuang Josua’n,

¹³ “Rengpa siahlo Mosia’n nin kuang hi ang hin a ihril kha inhre mai roi, ‘Nin Pathian Rengpa’n Jordan dung sak tianga ram nin dongtum hrang nangni pêk a ti;

¹⁴ nin dôngmahai, nin nâihai, nin sa vâihai chu hi laia hin lei om an ta, nin laia râlthuam chôituhai hi tuidung lei kâi masa nin ta, nin urêng Israelhai hi nin ichangpuihai hrang a ni.

¹⁵ Rengpa nin Pathianin nangni a pêk hrang ram, Jordan dung nitâk lam tiang chu an lua fela, Israel namhaiin an omna hrang chita hoi taka an om zoi tena vai kîr thei nin ti, Jordan nisua tianga ram, Rengpa siahlo Mosia’n nangni a ipêkna hin om thei nin ti, a ti kha,” a tia.

¹⁶ Josua chu an sâma, “Ni nin hril la lamin tho kin ti, ni ni itîrna ti tiang fe zel kin ti.

¹⁷ Mosia chong kin izôm ngai angin ni chong khom zôm kin ti; Rengpa nin Pathianin Mosia a iompui ngai ang khan ompui mai ri se.

¹⁸ Ni thu hnôla, ni thupêk zôm nuam loi chu thatpai ni ri se. Hâitakin irnak song phot mai ro,” an tia.