JONA 3 - PATHIAN LEKHABU IRTHIANG C.L. Bible (BSI)

Jona’n Rengpa thu a zôm

¹ Khan, Rengpa thu kha Jona kuang a zuang tung nôka,

² “Thoiin lân, Ninevi khua, khopui roiinpui taka khan fe’n lân, thuhril hrang nang ki iti kha tânginsampui ro,” tiin.

³ Khanchu, Jona kha a thoia, Rengpa thu ang khan Ninevi khuaa a fe tâka. Ninevi kha khopui roiinpui tak, a lian lam chu sûn thum fena a nia.

⁴ Jona kha sûn khat fe dôr khopui sûnga khan a hong lût irphut phota, “Atûn ata sûn sômminlia, Ninevi hi irhmangtir nih a ti,” tiin a khêka.

⁵ Ninevi mihai khan Pathian an iam tâka; bu nghei hrang tiin an inpuanga, an laia a lian tak ata a chîn tak dênin bora puan an sil tâka.

⁶ Kha thu kha, Ninevi khuaa inlaltak mikuara inhriat a ni tâka, a rêngtoihmun ata kha a thoia, a rêng puan kha a hlîkpaia, bora puan a sila, irvuta a toi tâka.

⁷ Inlaltak le a milianhai thupêkin inlaltak khan Ninevi kho sûnga thu inpuangin a suaka, “Mihriam mani, sa mani, sehrât rual mani, belra rual mani hai khan ite irtem no ri se: fâkin tui khom in no ri sehai:

⁸ Mihriam le sahai khan bora puan sil ualhai sianlân, a satêrengin Pathian insam ri se: a ni, mi tinin mâni lam saloi le an kuta sin sualna kha irheisan ri sehai.

⁹ Kin irhmang loina hrangin, Pathian kha kîrin, lungrîl irheitirin, a ninginmurna irkhêltak ata kha zuang irheikîr no nih ti tu’n mo an hriat?” tiin.

¹⁰ Khanchu, Pathianin an thilthohai kha enin, a lampui saloi kha an irheisan tih a hmua; an kuang a lei insîr tâk angin, tho a itum thil saloi kha Pathian khan ar hei kîra; a itho ta loi a ni.