JONA 2 - PATHIAN LEKHABU IRTHIANG C.L. Bible (BSI)

Jona lômthu hril chongchaina

¹ Khan, Jona kha nga phîng sûng ata kha, Rengpa a Pathian kuanga a chongchaia.

² Hiang hin a ti: “Kin takna sikin Rengpa kha ki koia, Ama’n a ni sâma; Seol phîng sûng ata kin sama, Nangin ki’rhâi nin hriata.

³ Inthûk taka, tuikhanglian sûngrîla khan nangin ni ni pai lûta, Tui irsok le ni tui irsônhai murdi khan a ni vur thiaia.

⁴ Khan, ‘Ni mithmu ata pai suak ki nia; Khannisianlân, ni biak in irthiang tiang irhei nôk ki ta,’ ki tia.

⁵ Tuihai khan ki hringna dênin a ni hual vêla; Tui inthûk kha ki vêlin a oma; Sûlhai khan ki lu a ituam vêl a ni.

⁶ Tâng bul tôp rêthaia khan ki chuma; Irnêng khan kumkhua hrangin a fenahai khan a ni khâr khuma; Aniachu nangin, O Rengpa ki Pathian, khurpadop ata kha ki hringna ni ilâk suak a ni.

⁷ Ki hringna ki sûnga a’rzal lai khan, Rengpa kha kin hriat maia: Ki chongchaina kha ni biak in irthianga ni kuang a zuang itung a ni.

⁸ Thil chanlamboi milak mai mai ngaisaktuhai khan anni iamomna kha an irheisan a ni.

⁹ Kei rêkin chu lômthu insîrna irhâi leh ni kuang irbôlna inhlan ki ta; Thu ki inkung tak kha hlensua ki ti. Saninhringna kha Rengpa ta a ni,” tiin.

¹⁰ Khan, Rengpa khan nga kha thu a pêka, Jona kha muanga a hong insuak tâka.