JONA 1 - PATHIAN LEKHABU IRTHIANG C.L. Bible (BSI)

Rengpa kuang ata Jona a rot

¹ Amitaia nâipa Jona kuang Rengpa thu a zuang tunga,

² “Thoiin lân, Ninevi khua, khopui roiinpui taka khan fe’n lân, a chungchâng thu tâng insampui roh; an sualnahai kha ki kuang a hong tung tâk,” a tia.

³ Khannisianlân, Jona kha Rengpa makung ata Tarsis-a a rot hrangin a thoi tâka; khan, Jopa khuaa a zu fea, Tarsis pan hrang irkuang a hmua: khanchu, a fena man a pêka, Rengpa makung ata kha Tarsis pan hranghai leh fe hrangin irkuanga khan a lût tâka.

⁴ Khannisianlân, Rengpa khan phâivua kha a satêrengin tuikhangliana khan an thotira, tuikhangliana khan a satêrengin phâivopui a thoa, khanchu, irkuang kha koi hrang angin a om tâka.

⁵ Khan, irkuanga mihai khan an chi tâka, mâni Pathian an koi senga; irkuang kha an ta hrangin a zâng theina hrangin irkuang sûnga timmatuahai kha tuikhangliana khan an pai suak tâka. Jona rêk chu irkuang sûngrîl taka a lei lût tâka; a lei zâla, a lei in irnghila.

⁶ Khanchu irkuang hruaitu kha a kuang a honga, “O nang a in, itho mo ni ini? thoiin lân, ni Pathian koi ro, Pathianin ei irhmang loina hrangin, ni ngaitua no ni mo”, a tia.

⁷ Khan, “Tho, hi thil saloi ei chunga hong om hi tu sika mani, ti ei inhriat theina hrangin, tasân ei ti,” tiin an irti irhlôma. Khanchu, tâ an sâna, an tasân kha Jona chunga a chuma.

⁸ Khanchu, a kuang khan, “Hi thil saloi ei chunga a ichum hi tu sika ma ni, nin hril ro, nang kin ngên; imo ni sintho? khôtaka hong mo ni ini? Kho rama om mo ni ini? i nam mo ni ini”? an tia.

⁹ Ama khan an kuang, “Hebrai mi ki nia; tuikhanglian le rammual siamtu Rengpa, irvân Pathian kha ki chi”, a tia.

¹⁰ Khan, mihai khan an chi tak taka, a kuanga khan, “Khante, imo ni itho tâk”? an tia; a hril tâk sikin, mihai khan Rengpa makung ata a irot irhmang a nih ti an inhriat tâka.

¹¹ Khanchu, a kuang khan, “Ei ta hrangin tuikhanglian hi a’rsok loina hrangin, ni chunga imo kin itho hrang”? an tia, tuikhanglian kha a’rsok tîr tîra.

¹² Khan, ama khan an kuang, “Nin dom unglân, tuikhangliana hin nin zuanpai roi; khanchu tuikhanglian hi nin ta hrangin irsok ta no ni: keima sika nin chunga hi phâivopui irkhêltak hi a itho a nih ti kin hriat tâk a ni”, a tia.

¹³ Khannisianlân, mihai khan muanga kîr hrangin an ngên ngut nguta; aniachu thei mahaia: tuikhanglian lak kha an chunga a’rsok si sita.

¹⁴ Khasika khan Rengpa kha an insama, “O Rengpa, hi mi hringna sika hin nir hmangtir no’n lân, mi thiam thisen mô kin chunga irnghat thut loi hrangin nang kin ngên, O Rengpa, nang kin ngên, nangin ni nuamlam anga ni itho a ni”, an tia.

¹⁵ Khanchu Jona kha an indoma, tuikhangliana khan an inzuanpai tâka; khan, tuikhanglian irsok but but kha a hong boi tâka.

¹⁶ Khanchu, mihai khan Rengpa kha a satêrengin an chi tâka; Rengpa kuanga khan irbôlna an inhlana, chong an inkung tâka.

¹⁷ Khan, Rengpa khan Jona inlem hrangin nga lian tak a lei inkung tâka; kha nga sûnga khan Jona kha sûn thum le zân thum a oma.