JOHANA 8 - PATHIAN LEKHABU IRTHIANG C.L. Bible (BSI)

Nupang uire lai an chel

¹ Khanchu, mi tin mâni in chita an fe tâka, khannisian Jisua chu Oliv tânga a fe tâka.

² A tûk zînga chu Tempila a lût nôka. Mipui murdi a kuang an honga; a toia, annihai kha ar chutirhai tâka.

³ Dân irchutirtuhai le Farisaihai khan, nupangnu a uire lai taka chel an hong hruaia, a laia an inngîrtira.

⁴ Jisua kuang, “Irchutirtu, hi nupangnu hi a uire lai taka kin ichel a nia,

⁵ Ei Dân, Mosia ni ipêka chu hiang nupangnu hi lunga dêng that hrang tih a nia. Nangin teh itin mo ni ti?” an tia.

⁶ Kha kha ama fiana hrangin an iti a ni, demna an hmu theina hrangin. Jisua kha a kûna, a kut chalin irnênga a’rziaka.

⁷ Khaanga ngîr pumin an irdon kher kher sikin, a thoia, an kuang, “Nin laia sual neiloi takin lungin dêng masa ri se,” a tia.

⁸ Khanchu a kûn nôka, a kutin irnênga a’rziak nôk tâka.

⁹ Kha kha an inhriatin chu inkhat khatin ulian taka irphutin an suak zit tâka, nupangnu a omna ngaia om leh vai khan an om tâka.

¹⁰ Jisua kha a hong tanga, a kuang, “Nupangnu, khôn mo an om zoi tâk? Thiamno nang inchangtir tûte om mahai mo?” a tia.

¹¹ Ama khan, “Rengpa, om mahai,” a tia. Jisua’n a kuang, “Keima khomin thiamno nang inchangtir no ning; fe’n lân, atûn ata chu sual nôk ta no roh,” a tia.

Jisua rammual vâr

¹² Jisua’n Farisaihai kuang thu an sîr nôka, “Keima hi rammual êl invârpu ki ni. Tukhom a ni zuitu chu inthima lêng viat no nihaia, hringna vâr nei ual an ti,” a tia.

¹³ Farisaihaiin a kuang, “Mâni thurchi kêng ni insîr, ni thu insîr hi dik mah,” an tia.

¹⁴ Jisua’n, “Mâni thu inhriattir ki ni khomin ki thu inhriattir chu a dik a ni, ki zuang suakna le ki fena hrang kin hriata, nangni’n chu ki zuang suakna le ki fena hrang inhre mak chêi.

¹⁵ Nangni’n chu taksa dânin nin ni hrilsiat ngaia, keima’n chu tûte hrilsiat ngai ma ung.

¹⁶ Ki lei hrilsiat khom lei ni sianlân, ki hrilsiatna chu dik a ti; ki bing vaia om ni ma unga, Pa ni tîrtu ki kuang a om sikin.

¹⁷ Nin Dân lekhabua khom, ‘Hriatpuitu mi inhni chong chu a dik,’ ti irziak a ni.

¹⁸ Kei hi mâni thu inhriattirtu ki nia, Pa ni tîrpu chu ki thu nin hriatpui sa a ni,” a tia.

¹⁹ Anni’n chu, “Kho hi mo ni Pa,” an tia. Jisua’n, “Nangni’n nin hre mak chêi, Ka Pa khom inhre mak chêi. Keima nin hre unglân chu Ka Pa khom inhria nin ti,” a tia.

²⁰ Kha thu kha Tempil tholôm bôm siana hmuna ar chutir laia a insîr a ni. Tukhomin chel mahai, a zoro a la tung no sikin.

Ki fena hranga fe thei mak chêi

²¹ Jisua’n an kuang, “Hin om ta no ning, nangni’n ni zong nin ti, khannisianlân nin sualnaa khan thi nin ti. Ki fena hranga hong thei no chin ni,” a ti nôka.

²² Judahaiin, “A irthat hrang ma ni? Ki fena hranga khan hong thei no chin ni a iti hi?” an tia.

²³ Jisua’n an kuang, “Nangni chu hnuai tiang ata hong suak nin ni; kei chu chung tianga zuang suak ki ni; hi rammual ata hong suak nin nia; Kei chu hi rammual ata hong suak ni ma ung.

²⁴ Khasika khan kêng, ‘Nin sualnaa khan thi ni nin ti’ nangni ki iti,” a tia.

²⁵ Anni’n, “Tu mo ni ini?” an tia. Jisua’n, “A phut ata nin kuang ki insîr tâk mo ni ma?

²⁶ Nin chungchânga insîr hrang le rêl hrang tamtak ki nei; i khom nisian, a ni tîrtu chu mi diktak a ni, a kuang ata ki inhriat vai rammual kuang kin sîr ngai,” a tia.

²⁷ An kuang Pa thu a insîr a nih ti inhre mahai.

²⁸ Jisua’n an kuang, “Mihriam Nâipa hi nin inkhâi tika keima ki ni tih le, keima irchamin i khom tho ma ung Pa’n a ni ihril ang vai kin sîr ngai tih lan hria nin ti.

²⁹ A ni tîrpu chu ki kuang a oma, ki bing vaia om hrangin ni rotsan ngai ma, a nuamlam vai ki tho ngai sikin,” a tia.

³⁰ Kha thu kha an sîr laiin mi tamtakin ama kha an iam tâka.

Thutakin nangni’n zalêntir a ti

³¹ Jisua’n ama iamtu Judahai kuang khan, “Ki thutaka nin om maiin chu ki irchutir tak takhai ni nin ti;

³² Thutak inhria nin ta, thutak khan nangni inzalêntir a ti,” a tia.

³³ Anni’n an sâma, “Abrahama irchihai ei nia, tu suaka khom om ngai ma ung, nangni inzalêntir a ti, itina ni iti ma ni?” an tia.

³⁴ Jisua’n a sâmhaia, “Thudik tak nangni ki hril, thilsual tho murdi chu suak an ni.

³⁵ Suak chu kumkhua’n in sûngkua mi ni mai mah, nâipa chu kumkhua’n a om mai.

³⁶ Khasikin, Nâipa’n nangni an zalêntirin chu zalên tak tak ta nin ti.

³⁷ Abrahama irchihai nin nih ti kin hriat, khannisianlân, ni that nin tuma, ki thu hin nangnia hmun a nei no sikin.

³⁸ Keima’n Pa kuanga ki ihmu kin sîra, nangni khom nin Pa kuang ata nin inhriat kha nin insîr ngai,” a tia.

Nin pa Diabola

³⁹ Anni’n, “Kin pa chu Abrahama a ni,” tiin an sâma. Jisua’n, “Abrahama nâihai nin ni’n chu, Abrahama itho ang kha tho nin ti.

⁴⁰ Atûna ni that nin itum hi, thutak Pa kuang ata ki inhriat, nangni hriltu hi Abrahama’n khaang khan tho ngai ma.

⁴¹ Nin pa itho ang nin itho hi,” a tia. Anni’n chu, “Zâi nâi ni ma unga, Pa inkhat kin nei, Pathian chu,” an tia.

⁴² Jisua’n an kuang, “Pathian kha nin Pa a ni lele’n chu, lung ni thung nin ti, Pathian kuang ata zuang ki ni. Keima irchama zuang ni ma unga, a ni tîrtu irchama zuang kêng ki ini.

⁴³ Ki thu’nsîr hi itina mo nin inhriat thei loi? Ki thu nin dong indik no sika a ni.

⁴⁴ Nin pa Diabola ata suak nin nia, nin pa lungdo sin nin inuam a ni. Ama kha a phut ata mi that ngai a ni, thu dik tiang khom chang ngai ma, dikna zel a nei no sikin. Milak a tho’n ama insua a ni ngai. Milak pa a ni sikin; milakhai tinrêng pa khom a ni sa.

⁴⁵ Keima’n thutak kin sîr sikin nin ni iiamloi a ni.

⁴⁶ Nin laia tu mo sualna insîr thei? Thutak kin sîra, ithoa mo nin ni iiam loi?

⁴⁷ Pathian ata suak khan Pathian thu a’rngaitua ngaia; nangni’n chu ki thu irngaitua mak chêi, Pathian ata suak nin ni no sikin,” a tia.

Jisua le Abrahama

⁴⁸ Judahai khan an sâma, “Samari mi ni nia, ramilhli ichel a ni kin iti kha, kin iti indik mo ni ma?” an tia.

⁴⁹ Jisua’n, “Ramilhli ichel ni ma unga, Ka pa ki ichôiindôm kêng, nangni lakin ki thang nin insiaa.

⁵⁰ Keima roiinpuina hrang zong ni ma ung, a zongtu le a ngaituatu chu inkhat a om.

⁵¹ Thudik nangni ki hril, tukhom ki thu zômpu chu thi viat no ni,” a tia.

⁵² Judahaiin a kuang, “Atûn chu ramilhli ichel ni nih ti kin inhriat infel ta; Abrahama a thi tâka, deipuhai khom an thi tâka, nang lakin, ‘Tukhom ki thu zôm chu kumkhua’n thina irtem no ni,’ ni tia.

⁵³ Kin irchibul Abrahama nêkin ni iroiinpui ual ma ni? Ama khom a thi tâka, deipuhai khom an thi tâka, a tukhôkin mo ni irbe?” an tia.

⁵⁴ Jisua’n, “Mâni irchôiindôm inlân, ki satna kha ite ni no ni. Kin Pathian nin iti Ka Pa chu, a ni chôiindômtu chu a ni.

⁵⁵ Ama chu inhre mak chêi, keima’n chu kin hriat; Ama kha inhre ma ung ki ti’n chu, nangni ang dêna milak ni ki ti; khannisianlân, ama kin hriata a thu khom ki zôm ngai.

⁵⁶ Nin Pa Abrahama’n ki izuang a hmu hranga khan a râi a fân oka, khaang khan a hmu ngeia, a lôm tak tak,” a tia.

⁵⁷ Judahai khan a kuang, “Kum sômringa lua la ni mak che dua, Abrahama ni hmu moa?” an tia.

⁵⁸ Jisua’n an kuang, “Thudik kêng nangni ki ihril. Abrahama suak mân khom ki om,” tiin a sâma.

⁵⁹ Khan ama dêngna hrang lung an lâka, khannisian Jisua kha ar bîka, Tempil ata a suak tâka.