JOHANA 4 - PATHIAN LEKHABU IRTHIANG C.L. Bible (BSI)

Jisua le Samari nupang

¹ Johana nêkin Jisua’n irchutir tam ual a siam le a baptis-hai nôk tih Farisaihaiin an inhriat tih Jisua’n an hriatin chu,

² (A dik takin, Jisua’n chu tûte baptis maka, a irchutirhaiin mi an ibaptis ngai a ni.)

³ Khanchu Judai ram a suaksana, Galili rama a kîr nôk tâka.

⁴ Samari ram kha hro hrang a nanga.

⁵ Samari khua inkhat, Sukar an iti kha a va tunga, kha kha Jakoba’n a nâipa Josefa ram a ipêk kôla om a ni.

⁶ Jakoba tuikuang khom khatak khan a oma. Sûn lai tak a hong ni’n Jisua kha a sân a sôl sikin tuikuang kôla khan a toi chota.

⁷ Samari nupang inkhat tui chôi hrangin a honga. Jisua khan, “In hrang ni pe roh,” a lei ti pea.

⁸ A irchutirhai kha fâk rua ircho hrangin khuaa an fe tâk a ni.

⁹ Nupang khan, “Nang Juda mi ni nia, keima Samari nupang ki nia, ithoa mo in hrang ni ni inghi?” a tia. (Judahaiin Samari mihai kha itea irhmang irhlômpui ngai mahai).

¹⁰ Jisua’n a sâma, “Pathian thilpêk le ni kuang, ‘In hrang ni pe roh,’ tihtu hi inhre’n lân chu, a kuang ni inghi lem hrang a ni, ama’n chu tui hring nang a ipêk hrang a ni,” a tia.

¹¹ Nupangnu khan, “Ka pu, kaisuana hrang ite lak nei mak chea, tuikuang a inthûk tia le te, kho taka mo tui hring ni inei?

¹² Kin pu Jakoba nêkin ni iroiinpui ual ma ni? Ama khan hi tuikuang hi a ni pêka, ama le a nâihai le a sâ vâihai khomin hitaka hin an in ngai,” a tia.

¹³ Jisua’n, “Tukhom hi tui in murdi chu an tui lan hrâl nôk a ta;

¹⁴ Tukhom an kuanga ki ipêk hrang tui in ka chu an tui inhrâl nôk ta no ni. An kuang ki ipêk hrang chu an phîng sûnga tuihnâr hong chang a ta, kumtuang dênin kang ta no ni,” a tia.

¹⁵ Nupang khan, “Ka pu kha tui kha ni pe ro, ki tui an hrâl ta nona hrangin le hi ten tena tui chôi ki zuang ta nona hrangin,” a tia.

¹⁶ Jisua’n, “Ni pasal va koiin lân, hong kîr nôk ro,” a tia.

¹⁷ Nupangnu’n, “Pasal mo ki neia,” tiin a sâma. Jisua’n, pasal nei ma ung ni iti hi, ni ti indik;

¹⁸ pasal ringa ni nei tâka, atûna ni inei khom hi ni pasal tak ni ual maka, “Ni iti kha a dik,” a tia.

¹⁹ Nupang khan, “Ka pu, deipu ni nih ti kin hriat ta.

²⁰ Kin irchibulhaiin chu hi tânga hin Pathian an biak ngaia, nangni’n chu, ‘Mihaiin Jerusalema ngêt Pathian an ibiak hrang a ni’ nin ti ngaia,” a tia.

²¹ Jisua’n, “Nupangnu, ni iam roh, hi tânga kher no khom, Jerusalema kher no khom Pa chubai nin mûkna hrang zoro tung a ti.

²² Nangni Samarihaiin chu nin inhriat loi chubai nin mûka, keini Judahaiin chu kin inhriat kêng chubai kin imûk ngai; saninhringna chu Judahai kuang ata hong suak a nia.

²³ Khannisianlân, a zoro la tung a ti, atûn khom a tung thiai ta, Pathian chubai mûktu tak takhaiin irtha le thutakin Pa chubai mûk an ti, khaang mi kha Pa’n ama chubai mûktu hrangin a izong a ni.

²⁴ Pathian chu Irtha a nia, ama chubai mûktuhaiin Irtha le thu takin chubai an imûk hrang a ni,” a tia.

²⁵ Nupangnu’n, “Mesia, Krista an iti kha, zuang hrang a nih ti kin hriat. A zuang tika chu itinrêng ni la hril a ti,” a tia.

²⁶ Jisua’n a sâma, “Keima, nang a chongpuitu hi Ama kha ki ni,” a tia.

²⁷ Kha lai taka khan irchutirhai kha an hong tung nôka, nupangnu a ichongpui kha an hong hmu’n chu, a sân ar khêl an tia. Khannisianlân, tukhomin, “Imo ni izong? Ithoa mo nupangnu kha ni ichongpui?” khom ti mahai.

²⁸ Nupangnu’n a tuibêl a mâksana, kho sûng tiang a kîr nôka, kho sûnga mihai kuang khan,

²⁹ “Mi inkhat ki itho tinrêng ni hril zit theitu a oma, hong unglân en u ta, Krista mo ni thei ni?” a tia.

³⁰ Khanchu, kho sûng ata kha an suaka, Jisua kuang an fea.

³¹ Kha kâra khan irchutirhaiin “Irchutirtu, fa roh,” tiin an ngêna.

³² Ama khan, “Nin inhriatloi bu nêk hrang ki nei,” a tia.

³³ Irchutirhaiin, “Tu mo khatin bu an hong ipêk ma ni?” tiin an irti irhlôma.

³⁴ Jisua’n an kuang, “A ni tîrtu nuamlam sin le a sintho zoi hi ki bu a ni.

³⁵ Nangni’n bu âtna hrangin ‘Tha minli a la om,’ nin iti ngai mo ni ma? Thîr unglân, loihai hi en u ta, buhai chu ât thei zôi zel hrangin a hmin ta tih nangni ki hril.

³⁶ Bu âttu chu a hlo a hmu ngaia, kumtuang hringna dêna om hrangin a ra a bûm ngai, a phuntu le a âttu an lôm irrual theina hrangin.

³⁷ ‘Mi inkhatin a tûa, mi dangin a ât ngai,’ ti hi a dik a ni.

³⁸ Nin sin sôl loina ra ât hrangin nangni ki itîr hi, mi dangin an sina, an isinna ra kha nin i-ât a ni,” a tia.

³⁹ Nupangin, “Ki sintho tinrêng a ni hril thei zit,” a ti sika khan, kha khuaa Samari mi tamtakin Jisua an iam tâka.

⁴⁰ Samari mihai kha Jisua kuang an hong tungin chu, an kuang la châm hrangin an ngêna, kha khuaa khan sûn hni a châm tâka.

⁴¹ A thu an inhriatin chu mi dang tamtak khomin an iam tâka.

⁴² Khan, nupang kuang khan, “Atûn chu ni thu’nsîr sika iam ni ta ma unga, kei ni ngêtin a thu’nsîr kin inhriata, hi mi hi rammual saninhringtu a ni ngêt ti kin inhriat ta,” an tia.

Jisua’n milian nâipa an damtir

⁴³ Sûn hni hnunga chu khatak ata Galili rama a fe tâka.

⁴⁴ Jisua ngêtin, “Deipu kha ama ram tiang chôiirsângin om ngai mah,” a lei ti ngaia.

⁴⁵ Galili ram a va tungin chu, Galili mihai khan a sân an lei lôma; Jerusalema Ferkân Kûta an fe laia a sintho tinrêng an hmu sikin.

⁴⁶ Jisua Galili rama Kana khuaa tui uain an changtirna kha a va tung nôka. Khan, Kapernaum-ah sorkâr mi liantak inkhat nâipa damloi a oma.

⁴⁷ Khapa khan Jisua, Judai ram ata Galili rama a hong tih an hriatin chu a kuang a hong fea, a nâipa thi vâng vâng indam hrangin Kapernaum-ah fe hrangin a fiala.

⁴⁸ Jisua’n a kuang, “Thilirkhêl le sinirkhêl tho nin hmu no’n chu iam viat no chin ni,” a tia.

⁴⁹ Khapa khan, “Ka pu, ki nâipa kha a thi mân hong hrâm roh,” a tia.

⁵⁰ Jisua’n, “Fe ta roh; ni nâipa kha a dam ta,” a tia. Ama khan Jisua thu’nsîr kha a iama, a fe tâka.

⁵¹ A kîr nôk laiin, a siahlohaiin an lei dona, “Ni nâipa kha a dam tâk,” an lei tia.

⁵² A nâipa lei dam zoro kha ar donhaia. Anni khan, “Mizân sûn dârkhata khan an khur a boi pe ta,” an tia.

⁵³ Khanchu, a pa khan Jisua’n a kuanga, “Ni nâipa a dam tâk,” a ti lai tak kha a nih ti an hriat tâka. Kha hnung chu, ama le a in mihai, an rêngin an iam zit tâka.

⁵⁴ Kha kha Jisua Judai ram ata Galili rama a fe hnunga sinirkhêl a itho voihnina a ni.