JOHANA 21 - PATHIAN LEKHABU IRTHIANG C.L. Bible (BSI)

Irchutir sarihai kuanga Jisua inlârna

¹ Kha zoi hnung chu Jisua kha Tiberi dîla a irchutirhai kuang an lâr nôka, hiang hin an lâr a ni.

² Simon Petera, Thoma (Phîra an iti,) Galili rama Kana khuaa om. Nathanaela, Zebedaia nâipahai inhni, a irchutir inhni danghai an om irchuna.

³ Simon Petera khan an kuang, “Nga chel fe hrang ki ni,” a tia. Anni khan, “Keini khom ni kuang zuang sa kin ti,” an tia. An fe suaka, irkuanga an chuang tâka; khannisian kha zâna khan chu ite man mahai.

⁴ Khua a hong vârin chu Jisua kha ivadung kôla chiaiphoia a ngîra; khannisianlân, irchutirhai khan Jisua a nih ti inhre mahai.

⁵ Jisua’n an kuang, “Nâihaio, ite nin iman loi mo?” a tia. Anni khan, “Man viat ma ung,” tiin an sâma.

⁶ Jisua’n an kuang, “Irkuang sîr chang tianga khan lên vôr unglân, man nin ti,” a tia. Khanchu an vôra, nga kha a tam ta hrai sikin kaisua thei ta mahai.

⁷ Irchutir, Jisua’n lung a ithung khan Petera kuang, “Rengpa a ni so te,” a tia. Simon Petera’n Rengpa a nih ti an hriatin chu puan a sila, (puan boia om a ni sikin) dîla khan ar chôm thâk tâka.

⁸ Irchutir danghai khan irkuang chîn le, lêna nga sip kaisua pumin an hong pana. Muang ata hla maka, metar irzakhat vêla om an ni.

⁹ Muanga an va suakin chu, meihola mei tho, a chunga nga le bai om kha an hmua.

¹⁰ Khan, Jisua’n, “Atûn hin nin nga man kha hong chôi u ta,” a tia.

¹¹ Khanchu, Simon Petera kha irkuanga a va chuanga, lên kha nga lian tak tak sipin muanga a kai suaka, a rêngin irzakhat sômringa inthum a ni. Khaang dôr kha om khom sianlân, lên kha chet mah.

¹² Jisua’n an kuanga, “Hong unglân fa ta roi,” a tia. Irchutirhai laia tukhomin, “Tu mo ni ini?” ti’n irdon ngam mahai. Rengpa a nih ti an inhriat infel sikin.

¹³ Jisua kha a fea, bai a lâka, an kuang a pêkhaia, nga khom khaang dênin a pêkhaia.

¹⁴ Kha kha Jisua mithi lai ata a thoinôk hnunga an lâr voithumna a ni.

Ki belrahai infa ro

¹⁵ Khan, an fâk zoiin chu Jisua’n Simon Petera kuang, “Simon, Johana nâipa, hihai nêkin nangin lung mo ni ni thung ual?” a tia. Ama khan, “O Rengpa, lung nang ki thung ti nin hriat,” a tia. Jisua’n a kuang, “Ki belra tehai infa roh,” a tia.

¹⁶ A voihninaa khom Jisua’n a kuang, “Simon, Johana nâipa, nangin lung mo ni ni thung?” a ti nôka. Ama khan, “O Rengpa, lung nang ki thung ti nin hriat,” a ti nôka. Jisua’n, “Ki belrahai enkol roh,” a tia.

¹⁷ A voithumna khan a kuang, “Simon, Johana nâipa, nangin lung ni ni thung mo?” a tia. Jisua’n a voithumna’n, “Nangin lung ni ni thung mo?” a ti pe nôk sikin, Petera irngai a siat tâka. “Rengpa itinrêng nin hriat, lung nang ki thung ti nin hriat,” a tia. Jisua’n a kuang, “Ki belrahai infa roh.

¹⁸ “Thudik tak nang ki hril, ni nâiinpang laiin nir siama, ni kong ni khita, ni nuamna tiang tiang ni chai ngaia, ni ulian tika chu ni kut phar ni ta, mi dangin ni kong nang khit pe an ta, ni nuam loina ti tiang nang hruai an ti,” a tia.

¹⁹ (Kha thu kha Jisua’n an sîr pena chu, Petera thi lam hrang le Pathian a la ichôiindôm hrang a nih ti irhmutir hrangin kha thu kha a insîr a ni.) Kha kha an sîr zoiin chu Jisua’n a kuang, “Ni zui roh,” a tia.

Jisua le irchutir dang

²⁰ Khan, Petera kha a hong irheia, irchutir, Jisua’n lung a ithung, zânbu fâk laia Jisua tiang va kûna, “Rengpa, tu mo nang a chel hrang?” tia irdontu kha a hnunga a hmua.

²¹ Ama kha Petera’n a hmu’n chu Jisua kuang, “Rengpa, hi pa hin imo a itho hrang?” a tia.

²² Jisua’n a kuang, “Ki zuang nôk mâka hring mai hrangin nuam khom inlân, imo ni ilo hrang? Ni zui zôi zel roh,” a tia.

²³ Khan, kha irchutir kha thi loi hrang angin urênghai laia thu an thang tâka. Khannisianlân, Jisua’n thi no nih ti a kuang a insîr ni mah. “Ki zuang nôk mâka hring mai hrangin nuam khomin lân, imo ni ilo hrang?” a itihna kêng a ni.

²⁴ Kha irchutir kha hi thu inhretu le irziaktu hi a nia, a thu inhriatir hi a dik a nih ti ei inhriat.

²⁵ Thil dang tamtak Jisua’n a itho a la oma, khahai kha irziak suak zit hrang ang ni sian, lekhabu irziak hrang chu rammuala khom hin inlengin iam ma ung.