JOHANA 20 - PATHIAN LEKHABU IRTHIANG C.L. Bible (BSI)

Jisua thoinôk thu

¹ Pathian ni zîng taka, thingchangvârroa chu Magdala mi Mari kha thâna khan a va fea, lung kha thân ata lâkpaiin a hmua.

² Khanchu Simon Petera le irchutir dang Jisua’n lung a ithungtu kuang khan a van tâna, an kuang, “Thân ata Rengpa kha an lâk suaka, khôn mo an isia inhre ma ung,” a tia.

³ Khanchu, Petera le irchutir dang kha thân tiang panin an suak tâka.

⁴ An ruaiin an intân suama; irchutir dang kha Petera nêkin an tân hrât uala, thân kha a tung masa a ni.

⁵ Kûnin a vênga, puan irnêm sil omhai kha a hmua, a sûnga chu lût mah.

⁶ Simon Petera khom a hnunga a hong tung tâka, thân sûnga khan a lûta, puan irnêm sil omhai kha a hmua,

⁷ a lu khitna puan khom kha, puan irnêm sil kôla om loiin irzuata a binga omin a hmua.

⁸ Irchutir dang, thân tung masa khom kha a lût sa tâka, a hmua, a iam ta.

⁹ Mithi lai ata thoi nôk hrang a nih ti Pathian lekha thu kha lan hre thiam mahaia.

¹⁰ Khanchu, irchutirhai kha an in tiang an kîr nôk tâka.

Magdala mi Mari kuanga Jisua inlârna thu

¹¹ Khan, Mari kha thân pên tiang chap puma ngîrin a kûna, thân sûng kha a vênga.

¹² Vântîrtôn inhni, puan cheka irvo’n, Jisua an inzâlna lu thun tiang inkhat, ke thuan tiang inkhat toiin a hmuhaia.

¹³ Anni khan a kuang, “Nupang, ithoa mo ni ichap?” an tia. Ama khan an kuang, “Ki Rengpa an lâkpaia, an isiana inhre ma ung,” a tia.

¹⁴ Kha kha an sîr zoiin chu a hong irheia, Jisua ngîr kha a hmua, Jisua a nih ti inhre mah.

¹⁵ Jisua’n a kuang, “Nupang, ithoa mo ni ichap? Tu mo ni izong?” a tia. Ama khan irhuan enkoltu mani a sôna, a kuang, “Ka Pu, ama kha ni ilâkpai a ni’n chu, ni isiana nin hril ro ba; khanchu la ki ti,” a tia.

¹⁶ Jisua’n a kuang, “Mari,” a tia. Ama khan ama tiang a hong irheia, Hebrai chongin, “Rabboni,” a tia, (Kha kha “Irchutirtu” tihna a ni.)

¹⁷ Jisua’n a kuang, “Ni tôn no roh, Pa kuang khom la hong fe ma ung; khannisianlân, ki urênghai kuang va fe’n lân, an kuang, ‘Ka Pa, nin Pa, Ki Pathian, nin Pathian kuang kâi hrang ki ni’ a ti, ti roh,” a tia.

¹⁸ Mari, Magdala mi kha a fe tâka, irchutirhai kuang, “Rengpa kha ki hmu ta,” a va tia, a kuanga thu a insîr pe kha a hrilhaia.

Irchutirhai kuang Jisua an lârna thu

¹⁹ Pathianni khohloi a nia, Judahai an chi sikin irchutirhai omna mikothai kha an khâr tâka, Jisua a honga, an laia a hong ngîra, an kuang, “Nin chunga irtharngamna om ri se,” a tia.

²⁰ Kha kha an sîr zoiin chu a kut le a kâng an entirhaia, Rengpa kha an hmu’n chu irchutirhai kha a sân an lôm tâka.

²¹ An kuang, “Nin chunga irtharngamna om ri se,” a ti nôka. “Pa’n keima a ni itîr ang dênin kei khomin nangni ki tîr a ni,” a tia.

²² Kha kha an sîr zoiin chu, “Irtha Irthiang nei roi, tiin an chunga a phûk a mût khumhaia.

²³ Tu sual khom nin ingaidamhai ka chu ngaidam ni an ta, nin ingaidam loi chu ngaidam ni no nihai,” a tia.

Thoma kuanga Jisua inlârna

²⁴ Sômhleihnihai laia inkhat, Thoma, (Phîra) an iti kha, Jisua hong laiin an laia om maka.

²⁵ Irchutir danghai khan a kuang, “Rengpa kha kin hmu ta kêng,” an tia. Ama khan, “A kuta thîr hembêna sabê ki hmua, thîr hembêna sabêhaia ki kut leh ki tôna, a kâng kin them mâka chu iam no ning,” a tia.

²⁶ Sûn riat hnunga a irchutirhai kha in sûnga an om irchun nôka, Thoma khom an laia a om saa, Mikothai kha an kala, khannisianlân Jisua a honga, an laia a hong ngîra, “Nin chunga irtharngamna om ri se,” a tia.

²⁷ Khan, Thoma kuang khan, “Ni kut pârin hong inthemin lân, ki kuthai en ro; ni kutin hong inbanin lân, ki kâng hi tôn roh; iam loiin om no’n lân iam zôi zel roh,” a tia.

²⁸ Thoma’n a sâma, “Ki Rengpa le ki Pathian,” a tia.

²⁹ Jisua’n a kuang, “Ni ni hmu sika iam mo ni inih? Hmu loia iamhai chu an râlvân a sa,” a tia.

Hi lekhabu irziakna san

³⁰ Jisua’n irchutirhai makunga khan sinirkhêl dang tamtak a thoa, kha kha hi lekhabua irziak ni mah.

³¹ Jisua kha Krista Pathian Nâipa a nih ti nin iam theina hrang le nin iam sika khan ama irhminga hringna nin nei theina hranga hihai hi irziak a ni.