JOHANA 14 - PATHIAN LEKHABU IRTHIANG C.L. Bible (BSI)

Jisua, Pa kuanga fena lampui

¹ Jisua’n, “Nin milung dûk intong no ri se, Pathian nin iam kei khom ni iam sa roi.

² Ka Pa ina omna tamtak a oma, om no sianlân chu, nin ta hranga hmun siama ki fe hrang thu nangni ki ihril hrang ma ni?

³ Nin ta hranga hmun siamin ki fe’n chu zuang kîr nôk ki ta, ki kuang nangni hruai ki ti, ki omnaa nin om sa theina hrangin.

⁴ Ki fena hrang lam khom nin inhriat,” a tia.

⁵ Thoma’n a kuang, “Rengpa, ni fena hrang inhre ma ung, itin mo a lam kin inhriat thei hrang?” a tia.

⁶ Jisua’n a sâma, “Keima hi lampui le thutak le hringna ki ni, keimaa fe no chu tukhom Pa kuang tung ngai mahai.

⁷ Keima hi nin hre unglân chu ka Pa khom inhria nin ta, atûn chu ama nin inhriat tâk, ama nin hmu sa tâk,” a tia.

⁸ Filipa’n a kuang, “Rengpa, Pa kha nir hmutirin lân, kin ta hrangin sa ti,” a tia.

⁹ Jisua’n, “Filipa, hi dôr hi nin kuang ki om tâka chu, nin ni la inhriat loi ma ni? Keima ni hmu chu Pa hmu a ni. Itina mo ‘Pa chu nir hmutir roh’ ni iti?

¹⁰ Keima Paa ki om le Pa keimaa a om ti nin iiam loi ma ni? Nin kuanga thu ki insîrhai hi keima phuachôpin ki insîr ni mah. Pa keimaa a om maiin chu, a sin a itho a ni ual.

¹¹ Keima Paa ki oma, Pa keimaa a om ki iti hi iam roi; a ninole, ki sintho sika lua hin ni iam roi.

¹² Thudik tak nangni ki hril, tukhom ni iam chu thil ki itho ang hi tho sa ti; hi nêka roiinpui ual khom hi la tho a ti, Pa kuang ki fe hrang sikin.

¹³ Ki’rhmingin i khom nin izong ka chu tho thiai ki ti; Pa kha Nâipa sika chôiindôm a ni theina hrangin.

¹⁴ Nangni’n ki’rhmingin i khom nin izong ka chu tho thiai ki ti.

Irtha Irthiang inkung kha

¹⁵ “Nangni’n lung nin ni thungin chu, ki thupêkhai zôm nin ti.

¹⁶ Khan, keima’n Pa zong ki ta, Irtharngamtu dang nangni pe a ti, kumkhuaa nin kuanga om hrangin.

¹⁷ Irtha dik tak chu, rammualin nei thei maka, ama an hmu thei no sik le ama an inhriat no sikin. Nangni’n chu ama nin inhriat, nin kuang a om maia, nangnia a om mai sikin.

¹⁸ Fara’n nangni masan no ning, nin kuang zuang nôk ki ti.

¹⁹ Zoro sôtnote hnunga rammualin ni hmu ta no nihai, nangni’n chu ni hmu nin ti, keima ki hring sikin nangni khom la hring nin ti.

²⁰ Kha tika chu keima Paa ki oma, nangni keimaa nin om le, keima nangnia ki om ti lan hria nin ti.

²¹ Tukhom ki thupêkhai poma zômpu chu lung ni thungpu a ni, lung ni thungpu chu ka Pa’n lungthung a ta, kei khomin lungthung ki ti, a kuang inlâr sa ki ti,” a tia.

²² Juda, (Iskariota ni loi) khan a kuang, “Rengpa, kin kuang inlâr ni ta, rammual kuang nin lâr loi hrang mo?” a tia.

²³ Jisua’n a sâma, “Mi’n lung an ni thungin chu ki thu khom zôm a ta, ka Pa’n ama kha lungthung a ta, a kuang zuang kin ta, a kuang om mai kin ti.

²⁴ Lung ni thung loitu chu ki thu zôm maka, thu nin inhriat hi keima thu ni maka, Pa a ni tîrtu thu a ni ual.

²⁵ Nin kuang ki la om sûng hin nangni ki ihril a ni;

²⁶ Irtharngamtu, Irtha Irthiang, ki’rhminga Pa’n a zuang itîr hrang khan itinrêng nangni irchutir a ti, nin kuang ki insîr murdi nangni inhriat suaktir nôk a ti.

²⁷ Irtharngamna nangni ki mâk pe, keima irtharngamna kêng nangni ki ipêk; rammualin a ipêk ang ni loiin nangni ki ipêk a ni. Nin milung dûk tong no ri se, chi khom chi no ri se.

²⁸ “Nangni masan hrang ki nia, nin kuang zuang kîr nôk ki ti,” ki iti kha nin inhriat ta. Lung nin ni thungin chu Pa kuanga ki ife hrang hi lôm nin ti; Pa kha keima nêkin a roiinpui ual sikin.

²⁹ Kha kha a zuang tung tika nin iam theina hrangin, atûn a zuang tung mân nangni ki ihril a ni.

³⁰ Zoro sôt ualin chu nin kuang thu insîr intam ta no ning, hi rammual roirêlpu hi a hong hrang sikin, ama’n ki chunga irchamnei mah,

³¹ khannisian, keiin Pa lung ki thung le, Pa’n thu a ni ipêk angin ki tho ngai tih rammualin an hriatna hrang a ni. Thoi unglân, hitak ata hi suak ta ei ti.