JOELA 3 - PATHIAN LEKHABU IRTHIANG C.L. Bible (BSI)

Namhai chunga Pathianin roirêl a ti

¹ “Irngai u ta, kha nikhuahai le kha zoi tika chu Juda le Jerusalem inding nôk hrang tika chu,

² nam murdi buk khôm ki ta, Jehosafata irhôra hruai ki ti. Ki mi, ki’rchon dongtum Israel chunga an thiltho sikin an chungthu rêl ki ta; ram danga ki mihai an indartira.

³ Tasânin ki mihai an irsema; nâipanghai kha nupang pasalin notizuar le uain lâkna hrangin an zuara.

⁴ Nangni Tura le Sidon, nangni Filistia ramhaio, ki chunga phubâ lâk nin itum ma ni? Ki chunga phubâ lâk nin itum a niin chu inrang takin nin chunga phubâ la kîr nôk ki ti.

⁵ Ki tangkarua le rângachak nin lâka, ki thil satak inditomhai nin biak in sûnghaia nin chôi lût sa tâka,

⁶ Juda nâihai le Jerusalem nâihai khom an ramri ata hlataka nin sonpai theina hrangin, Grik nâipahai kuang nin zuar lik tâka.

⁷ Irngai u ta, nin zuarna hmun ata kha kaiharin insuaktir ki ta, nin thuanna kha nin lu chung ngeia thuanna ki ti;

⁸ nin nâipahai, nin nâinuhai kha Juda nâihai kuta zuar ki ti, anni khan hlataka Seba mihai kuang, anni kha zuar an ta”: Rengpa khan a iti tâk a ni.

⁹ Hi hi namhai laia inpuang unglân; irdoina sinsiam unglân: mi hrâthai inphût unglân; irdoi mi murdihai hong nâiin hong kâi ri sehai.

¹⁰ Nin irnêng âlkaina hmor irzumhai khandaiin incher unglân, nin thei kung tanpaina chemtehai kha ufeiin incher roi: mi hrât loi khomin, “Ki hrât a ni,” ti ri se.

¹¹ A kôla nam murdihaio, hong irhnot unglân, pung khôm roi: O, Rengpa, kha khan ni mi hrât takhai kha infetirhai roh.

¹² Namhai kha irphût irhlômhai sian, Jehosafata khurpadopa khan hong kâi ri sehai: kha khan a vêla nam murdi chunga roirêl hrangin ki itoi hrang a ni.

¹³ Nin kôite kai dok unglân, bu ât zoro a ni tâka: hong unglân, hong sirpha roi; grep sômna khur kha a sipa, bêlhai kha a sip lêta, a sân an sual sikin.

¹⁴ Mi sâng tamtakhai kha Jehosafata irhôra an om khôm ta; kha khan a ni, Rengpa nikhua zuang tung hrang a ni.

¹⁵ Misa le thahai an inthima, ârsihaiin an vârna an thupa.

Pathianin a mihai satvur a ti

¹⁶ Pathianin a mihai satvur a ti. Khan, Rengpa kha Zion tâng ata inrûm dur dur a ta, Jerusalem khua ata ar hâi insua a ta; irvân le irnêng inhnîng a ta: khannisianlân Rengpa kha a mihai ta hrangin irsûnghualna ni a ta, Israel irchihai hrangin kulbang ni a ti.

¹⁷ Khanchu Rengpa nin Pathianin ki tâng irthiang Zion-a lêng ki nih ti inhria nin ti: khanchu Jerusalem khua kha irthiang a ta, nam dang mi’n inhnê viat ta no nihai.

¹⁸ Kha nikhuaa khan hiang hin hong ni a ta, tâng irsânghai khan uain thum inzungtir a ta, tânghai kha irhnutuiin luang a ta, Judai ram vadungte murdihai kha tuiin luang a ta: Rengpa in ata tuihnâr zuang pût suak a ta, Sitim irhôr irziltir a ti.

¹⁹ Juda nâihai chunga saloi taka thoa an rama mi thiam thisen an insua sikin, Aigupta ram kha hong ram a ta, Edom ram kha ramchâr ram chârkhohroi nih a ti.

²⁰ Judai ram rêk chu kumkhua’n om mai a ta, Jerusalem khua kha irlo tin tin dênin.

²¹ Khan, an thisen ki infâiloi kha infâi ki ta: Rengpa kha Zion-a a om mai sikin.