JOBA 9 - PATHIAN LEKHABU IRTHIANG C.L. Bible (BSI)

JOBA

¹ Joba’n hiang hin a sâm;

² Ni ihrilhai chu a dik ti khom kin hriat, khannisianlân, Pathian mit hmuin mihriamhai hi dik zit thei nihai mo?

³ Pathian chu sêl ngânhai sianlân, voi sângkhat laia hin, voikhat khom sêl thei no nihai.

⁴ Pathian chu vârna tinrênga sip, sinthotheina hrât nei a ni. Ama doi thei hrang tu mo om an ta?

⁵ An inhriat no kârin tânghai a thonpaia, a ning an murin an siatpai ngai.

⁶ Irnêng khom a omna rengata an hnîngtir theia, a chopuihai chu det thei ni ta ngai mah.

⁷ Misa khom thu a pêka suak maka, ârsihai khom ar khûpai khipa.

⁸ A bingin irvân khom khi a kaiphar theia, tuipui irsok chunga kalchôi chu.

⁹ Pathianin irvâna sîkhovâr le sîruk hai, sahrâng ichiom le sim tianga ârsihai chu a siama.

¹⁰ Thil roiinpui tamtak suisuak zoi loihai le thilirkhêl hril theiloihai thotu a nia.

¹¹ Irngai roh ki kôla a zuanga, hmu thei ma ung, ki’rkhêlpuia, hmu thei loiin ki om.

¹² Irngai ta, a inuam murdi a lâk khomin tu’n mo a khap thei? Tukhomin ama chu imo ni itho? ti ngam mahai.

¹³ Pathianin a ninginmur insum no nia, Rahab changpuituhai chu a hnuaia an kûna.

¹⁴ Itin mo keima bingdok hin, ama ki isan thei hrang, Ama hnôlin i thu mo ki la hrilsuak thei hrang?

¹⁵ Dik zap khom inlân, ite don thei no ning, ki chungthu rêltu kuanga hin lungkhamna vai nghi ki ti.

¹⁶ Ki koia, a len hriat khomin, ki thu nir ngai pe le irhoitir ma ung.

¹⁷ Phâivopui hmangin a ni sêm phîta, A san om loiin ki pop ki liama.

¹⁸ Thoi irman loi rakin ki oma, dengtheina’n ki sip zoi ta.

¹⁹ Hrâtna ringot hin chu ama phâk om mahai! ir-otpui inlân tu’n mo doi ngam hrang?

²⁰ Sual ki nih irti no khom inlân, ki chongbâi suaka hin thei loi a ni inchangtir a ni ta, demna nei ma ung ti khom inlân, ki dik loina a hmu ta.

²¹ Sêlna boi ni khom inlân, irngaiirsâng thei ta ma ung, ki hringna hi ki ingainêp a ni.

²² Khasikin kêng mi sual le mi dikhai khom ir-angnatin inhekhai a tih ki iti.

²³ Thil ichiom a tung tena khom mi poi tôn loi chu thatin a oma, Pathianin ama chu an nuisan mo?

²⁴ Rammual hi mi sualhai kuta pêk a nia, roirêltuhai mit khom a inchotir a ni; Ama itho a ni no’n, tu itho mo a ini hrang?

²⁵ Ki dam lai sûnhai a hek inranga, thil sa tho irman loiin a ihek ngai a ni.

²⁶ Irkuang hrâttak angin a ni khêlpaia, irmu vuang inrang ang hin.

²⁷ Ki chiarnahai hi irnghil ki ta, ki beidongna irnghilin râiinfân ta ki tih ki ti khomin,

²⁸ ki lei tuangnahai hin a ni irzaltir a ni. Nangma’n sual angin ni nin sâpa.

²⁹ Mi sual laia tep ki ni tâka, itho mo chanlamboiin ki la iom mai hrang?

³⁰ Ivur tui leh irsil infâi khom inlân, ki kuthai chang-al leh irsûk infâi khom inlân.

³¹ Nangin porchena khura ni ni pai tâka, ki puansilhai ten khom ni nin tir tâka.

³² Roirêlna hmuna inding suama sâm hrangin, Ama chu keima anga mihriam ringot khom ni mah.

³³ Kin kâra ni sel hrang khom tûte om mahaia, kin chunga ni thuneitu dong khom tûte om mahai.

³⁴ A ni ivîkna hmol khâipai khom sianlân, A kuttum tuang hrang khom nin chitir ta no ri se.

³⁵ Keiin chu chi no ning, Ki lungrîla kin hriat sikin chong suak ki ti.