JOBA 5 - PATHIAN LEKHABU IRTHIANG C.L. Bible (BSI)

¹ Hong koi ngân ta, tu’n mo nang a sâm hrang? mi irthiang tu ngân mi mo ni ipan ta hrang?

² Mi’nto chu chiar chiarin thi a ta, irhnarsâna hin mi’nmôl a that thei.

³ Mi’nto irkôkpoploi ki hmua, khannisianlân, a omna chu khua ki sâl pea.

⁴ A nâihai khom zôk thei viat no nihaia; kul mikot bula khan sirbein an oma, sansuaktu hrang tûte om mahai.

⁵ Phîngchâmin a bu le bâl fa pe an ta, ilhling le a irkulhai khom, ar chongnahai kha, mi huatirhamhaiin irzuk an ti.

⁶ Tuangnahai hi pil ata hong suak ni maka, buainahai khom hi irnêng ata hor phut ni ma.

⁷ Meirisi chung tiang a irlêng ang hin, mihriam hi buai hrang piala zuang suak a ni.

⁸ Keima’n chu Pathian zong mai ki ta, Pathian kuang ki chungthu inkoltir ki ti.

⁹ Thil roiinpui tak a ithohai inhriat phâk thei loi; thilirkhêlhai tep zoi loi thotu chu.

¹⁰ Irnênga rua inthotirin, loihai khom tui a pêk ngaia.

¹¹ Khaangin, mi irhniamhai a chôiirsâng ngaia, beidonghai chu an hnêmhai ngai.

¹² Irhuang hmanghai ngai lunginchong hlo inchuk pehai ngai maka. a kut sintho khom hlochuk thei ngai ma.

¹³ Mi vârhai chu an vârna khan irkhit an ti, mi vârillethai thil ngaituana khan ite changpui ngai mahai.

¹⁴ An nihai hrangin chu sûn vâra khom an thim pehai ngai. Sûn laihaia khom zân angin an irmai ngai.

¹⁵ An bâia khandai ata khom inrianghai chu a saninzôk ngai. Mi hrât kut ata khom a sansuak ngai.

¹⁶ Khanchu inrianghai chu sabeina an neitirhai nôka. Mi sualhai chu an bâi an hruk pehai ngai.

¹⁷ Pathianin mi a irchutir chu irkhêl loiin, khasikin itinrêng thothei thupêk chu ngainêp no roh.

¹⁸ Pathianin a inphophai kha a tuam nôka; a kuta a innatirhai kha an damhai nôk ngai.

¹⁹ Voiruk voisari khom buaina tokin lân, nang sansuak a ti, thil saloiin nang tôn thei no ni.

²⁰ Châm tâk laia khom thina ata nang sansuak a ti; irdoina hmuna khom khandai sinthotheina ata nang sansuak a ti.

²¹ Chong saloi tak ata khom nang hrung a ta, siatna hong tung khomsian chi no chi ni.

²² Siatna le châmpui tâk khom kha innuisan ni ti, ramkâra sahrâng khom chi no chi ni.

²³ Irnêng pil ni ituknaa khom lung om no nia; rama sahrâng khomin nang doi no nihai.

²⁴ Ni puan ina irtharngam takin om ni ta, ni belra omna ni fe khomin irkip dîpin om an ti.

²⁵ Ni’rchi tamtak la hmu phâk ni ti, ni rîla rahai khom hloisûl angin bit an ti.

²⁶ A zoro taka bu an i-ât ngai angin, tar dêna kûnin thânmual liam ni ti.

²⁷ Irngaitua infel ro, hong sût sabakin lân. Hihai ang hin a hong nia, irngaiin lân ni ta hrangin satna a nih ti inhre roh.