JOBA 41 - PATHIAN LEKHABU IRTHIANG C.L. Bible (BSI)

¹ Irkuai leh Leviathan ni inkhittir thei hrang mo? Hruihrual leh a milei mo khit pe theiin?

² A hnâra hrui leh mo invit theiin? Irkuai leh a hner kôla mo inthil theiin?

³ Ni kuang nghina tamtak mo siam thei ni? Hmâitâiin nang a ichongpui hrang mo ni isôn?

⁴ Dam sûnga ni siahlo chang hrangin thu mo nang thungpui ni?

⁵ Vâhai angin inthem thei le mo nir hoi? Ni nâinuhai sâi hrangin ni sia nuam mo?

⁶ Nga cheltuhaiin chongpui thei le moh nir hoitir? Bepâr thohaiin ircho hrangin nuam nihai mo?

⁷ A vun ngar kha ep khomin lân, invit theiin mo? A lua khom ufei leh mo inkhô theiin?

⁸ A chunga ni kut hen sum ngân ta! chi a om lam hrang dân irngaitua ro. A hmu khom nuam ta no chi ni.

⁹ Irngai ro, mihriamhai sabeina chu ite ni ual ma: A hmu ringot khom beidongom tak a ni.

¹⁰ Ama kaithoi ngam tûte mi huaisen om mahai, khaang khan a ni’n teh tu mo ki kôla ngîr ngam hrang?

¹¹ Tu moh tuam nôk hranga thil ni pêk masa nuam? Irnênga thil tinrêng hi ki ta kêng a ni.

¹² Leviathan ke thurchi nang hril ki ti A’rtha nei le a taksa irhme dânhai hi.

¹³ Tu’n mo a vun hlâipai thei hrang? Tu’n mo a hnermul thuahni sûnga lût thei hrang?

¹⁴ Tu’n mo a hmêl lampui ang hi inhong thei hrang? A ha irkual zêkzuaka om chu tu’n mo a chel ngam hrang?

¹⁵ A hlip irthua chuka om hi a isong tak a nia. Irtôn nata omin lung anga ngar a ni.

¹⁶ A’rtôn pe nat sikin a kâr ir-ông viat loiin.

¹⁷ A’rtônin a idetkhak a ni sikin, phôi thei pai ni no ni.

¹⁸ A ha a riala vâr an phû suaka, A mithai chu kôlirsal ang hi a ni.

¹⁹ A bâi ata meiri-al a suaka, Meirisi a’rtêktir zur zura.

²⁰ A hnâr ata meikhu a zuang suaka, Sa suangna bêla ar hu a hong isuak ang hin a om.

²¹ A phûkin meihol a sêm ir-altira; a bâi ata meiri-al a hong suaka.

²² A ringa hrâtna a neia, Ama irtongpui murdi an inthing ngai.

²³ A vun irnêmna zel om maka, Thîr anga ngar a ni, invit thei zât zel ni mah.

²⁴ A lungrîl khom lung anga ngar a nia. Lungnôina hnuai tianga ang dêna ngar a ni.

²⁵ A hong irthoka zel hin mi hrâthai khom chipumin an inthing ngaia.

²⁶ Khandai leh tukhai khomsian, pêm lua pêm viat no ni, ufei thalhai leh sun thei ni mah.

²⁷ Thîrhai khom hi fapôl anga a ibe a nia, Ei inghi khom hi thing irmôi ang maia a ibe a ni.

²⁸ Thal chi hin rot ngai maka. Sâihli leh kâp khomin lân, favâi ibur ang dôr luan bê mah.

²⁹ That ni tum khomin fapôl angin a ibe a nia. Thal irhâi khom hi a innuisan ngai a ni.

³⁰ A phînga vunhai khom pilbêl irzum vâr ang a nia, Âlkaina hmor irzum angin pilpok kha an inrît ngai.

³¹ Tui inthûkhai chu bêla tuisoi angin an phûltir buan buana, Tuipui khom bêla tui angin an phûltir thei.

³² A fena lampui chu a’rlang tur tura, Tuipui huan mani an sôna.

³³ Irnênga hin ama ang zel hi om mahai. Ite chitna nei loi sahrâng a ni.

³⁴ Ramsa hâitakhai khomin êng ngam mahaia; Ama chu ramsa tinhai Rêngpa a ni.