JOBA 4 - PATHIAN LEKHABU IRTHIANG C.L. Bible (BSI)

Chongna nei matontak ELIFAZA

¹ Temana mi’n hiang hin a hrila;

² ni kuang chongbâi khat ki hril nuama, inhuat zapin mo? Dâihrek thei lak ni ta maka?

³ Irngaitua ro, mi tamtak ni lei irchutirhaia, kut hrâtloihai, ni len hrâttir pehaia.

⁴ Ni thu’n a’rtethai, ni kaithoihaia, irkhûk zenghai nin hrâttirhaia.

⁵ Intakna ni chunga a hong tung tâka, ni’rzal zap tâka, nang ar bôk pe maia; ni ibuai zoi a ni ta.

⁶ Sakhua mi ni nitna hin ni’rtha a’rngam thei loi ma ni? Ni nun a hoi sika hin, ni’rngai a isiat ma ni?

⁷ Irngaitua sabak ro, Ite a siatna om loiin tu mo siatna tong ngai. Kho tiang mo mi dikhai an dâihrek ngai ti ni inhriat?

⁸ ki lei hong ihmu dânin chu tukhom a dik loina, âlkai anga inrang taka buaina chi inthekin, a pangai an hmu ngai.

⁹ Pathian phûka an irhmang ngaia, ningmurna sêmin an irhmang ngai.

¹⁰ Kâmkeibaknei inrûm le a harialhai a’rngamtir pea, kâmkeibaknei vânglai ha ngaih tak an khiaktir pea.

¹¹ Kâmkeibaknei tar chu fâk hrang irsamin, ar hmanga, a pui nâi ir-ôi laihai khom an indarh zoi ta.

¹² Dâihrekin ki kuang thu a zuang tunga, ki mikuar kôla dâi za zatin kin hriata.

¹³ Zân dâichit lai taka, zân inlârna kha ki ngaitua laiin,

¹⁴ phûk inthingin kin thing nor nora, ki lungrîl an chûka.

¹⁵ Khanchu, ki hmâia vâr a hong êla, ki pangmulthi an ding sup supa.

¹⁶ Ki hong ngîra; khannisian a hmêl inlang dân chu hmu’nfel thei ma unga, a châng dep dupin ki hmua, a hong dâihreka, khanchu irhâi kin hriata.

¹⁷ Mihriamhai hi Pathian mithmua a felin mo nin hriat? A siamtu makunga hin a’rthiangin mo nin hriat?

¹⁸ Irvâna a siahlohai khom iam zoi maka, a tîrtônhai fel loina khom hmutheitu khan.

¹⁹ Pil ina omhai hi iam zoi thei imo, vâiphina siam mai an nia, phehlep anga inrôp nôk chian ang an ni.

²⁰ Zîng le khohloi kâra irngêhai ifâk irhmang hrang ang a ni.

²¹ An chunga puan in khitna hrui chatin, an ithi mai hrang mo ni ma, vârna nei loiin?