JOBA 3 - PATHIAN LEKHABU IRTHIANG C.L. Bible (BSI)

Pathian kuanga Joba chiarna

¹ Kha irzoiin chu Joba a hong chong suaka, a suak nî sûn khomâk a sâma.

² Hiang hin Joba’n a hril ta:

³ Ki suak nî sûn chu irhmang ta sian, “Nâipasal a vong ta,” an ti nî zân leh khan!

⁴ Kha nikhua kha a zîng hong chang sian, chung tianga irthokin Pathianin irngai ta no sian, A vâr khom a chunga vâr pe ta no ri se.

⁵ Beidongna le inthim irsa khakin, an dongtum irchu sian, sûmin inbokdel sian, sûn vâr inthimtir kha a charindongtir ri se.

⁶ Kha zân kha sûmin irkhukhak sianlân, kha kum sûng kha sûna tep loiin om sian, tha tepna khom khan tep ni ta no ri se.

⁷ Kha zân kha zân beidong ni sian, râifânna irhâi ite om no ri se.

⁸ Sûn khi khomâksâm theihaiin, kha nî sûn kha khuasâl ri sehai, Leviathan enkol theihaiin.

⁹ A zîngbupa ârsi kha inthim sianlân, vâr lei nghâkin hmu ta no sian, Thingchangvârroa khom hmu no ri se.

¹⁰ Kha zân khan ka nu sul ar khâr no sikin le ki mit hmua buaina ar thup no sikin.

¹¹ Ithoa mo sul sûnga khan ki ithi loi, ki hong suaka zel khan ki phûk a irbôn loi?

¹² Ithoa mo a malpui chunga a ni ipom, ki inêk hrang irhnu’n a ni lei inghâk?

¹³ Khanchu, zâl ki ta, dâihrek ta ki ti, in irnghil ki ta, irngam chian ta ki ti.

¹⁴ Irnêng rênghai le roirêltuhai, Mâni hranga ram indingtuhai leh khan.

¹⁵ rângachak tamtak nei rêng nâihai le an in khom tangkarua inbittuhai leh khan.

¹⁶ Aninole, a zoro loia suak thup irhmang ang ki ini hrang, nâitesen vâr la hmu ngai loi ang hin.

¹⁷ Kha khan mi sualhaiin, inbuaitir ta no nihaia, a’rzalhai irngam ta an ti.

¹⁸ Mi intânghai irngam ta an ti, a hrungtuhai irhâi khom inhre no nihai.

¹⁹ Mi lian le mi chîn hmunkhatin omkhôm an ta, siahlo khom a pu kôl ata zalên ta a ti.

²⁰ Ithoa mo dengthei tuanghai kuang vâr pêk a ini? itho mo lungrîla sôlhai kuanga khan hringna pêk a ini.

²¹ Thi irzukhai thi thei loiin, irchon phûm zong inrûk nêka irkhêlin thina zongtuhai.

²² Thân chu a hmu suak thei tâka, A saterenga râiinfân tak tak hrang kuanga khan.

²³ I sika mi, a lampui thupa om kuang le, Pathian paltâng a’rhualkhum kuanga khan vâr pêk mo a ini?

²⁴ Bu ki nêk mân ki sabei dongna a hong tunga, kin hrûmnahai chu tui anga bunthâk an ni ngaia.

²⁵ Ki ichi ngai tak ki chunga a tunga, ar khêl ki iti tak ki itong a ni ta.

²⁶ Ki’rtha irngam maka, omchian thei ta ma ung, sôl irngam thei loiin, buaina vai kêng a ni ta.