JOBA 12 - PATHIAN LEKHABU IRTHIANG C.L. Bible (BSI)

JOBA

¹ Khanchu Joba’n hiang hin a tia:

² A ni mivâr chu nin lei ni hi te, hmunkhatin nin vârnahai leh thi nin ti.

³ Khannisian nangni angin inhriatna chu ki la nei, Nangni nêkin chîn ual ma ung, Tu’n mo hi thilhai hi an hriat loi hrang om?

⁴ Pathian ki koia, a ni sâm ngai, khannisian ki rualhaiin an nin nuisana, mi fel le demnaboi ni khom inlân, nuizabûr ang ki ini ta hi.

⁵ Mi a hoitaka omhaiin chu, vânduaihai hi hmusitom a nia, kalbi chîntea khom an irtet ngai.

⁶ Khannisian inrûhai le Pathian nei loi mihai chu lungthi takin an om ngaia, an pathian chu an hrâtna vai hi lei ni khom sian.

⁷ Ramsahai khom irdonin lân nang irchutir thei an ti. chunglêng vatehai khom irdonin lân, nan hril thei an ti. Tuipuia ngahai khomin ni kuang hril thei an ti.

⁸ Irnêng khom chongpuiin lân, nang irchutir thei a ti.

⁹ Hihai murdi laia hin, Rengpa kutin a itho a nih ti inhre loi tu mo om?

¹⁰ Thilhring tinrêng hringna le mihriamhai irtha hi a kuta om a ni.

¹¹ Bâiin thil tuilam a inhriat ang hin, mikuar hin a sia le sa an hriat infel ngai ang hin,

¹² Ulianhai chu an vâr uala, Dam sôthaiin thil an inhriat intam ngai.

¹³ Pathian chu a vârin a hrâta, irfûktir dân a theia, itinrêng an hriat ngai.

¹⁴ A insiat tâk chu sin thei ni ta ngai ma, mihriam a ikhârkhum tâk chu tûte’n insua thei ngai mahai.

¹⁵ Rotho a khapin chu, khua a kanga, An thotir nôk le, ram a chim insiat ngai.

¹⁶ Amaa khan hrâtna le vârna irkip chu a oma, Ihuanga om le a huangtu khom ama ta a ni.

¹⁷ Irfûktir theihai inhriatna la pai pehai a ta, roirêltuhai chu into angin an omtir thei.

¹⁸ Rênghai irkhitna chu a sûtpaia, an konghai chu kong khitin a khit pehai,

¹⁹ ochaihai chu korongin an fetirhaia, mi hrâthai khom a’rtettira.

²⁰ Mi iamom chonghai chu a sonpaia, Upahai inhriatthiamna kha a lâk irhmang ngai.

²¹ Mi lianhai chunga hmusitna chu ibuakin a oma, mi hrâthai irkhitna a sût pehai ngai.

²² A zînga thilirthupa a’rlangtira, inthim irsâtak khom an vârtir thei.

²³ Namhai an liantir theia, an chîntirhai nôk thei. Nam an tamtir khom a theia, irthek indartir khom a thei.

²⁴ Irnêng mipui hruaituhai lungrîl an hnêpaia, Ramchâr lampui om loina hmuna a chaninvâitir ngai.

²⁵ Inthim kâra an irmaia, zû’nrui angin an khêk ngai.