JOBA 11 - PATHIAN LEKHABU IRTHIANG C.L. Bible (BSI)

ZOFARA

¹ Zofara, Naama mi’n hiang hin a hong tia;

² Hihai anga thu tamtak hi sâm thei loi a ini thei hrang mo? Mi chong tamhaiin an ifâk ruk thei hrang mo?

³ Ni irsongnahai hin, mi milung a ichuk hrang mo? Huatirham taka ni chonga hin, tûte’n nang an inzaktir loi hrang mo?

⁴ Ki iamna vai hi a dik ni tia, Pathian mithmua, “ki’rthiang,” nir tia.

⁵ Khannisian, Pathian zuang chong sianlân, ni chungthu hin a bâi hong phong sianlân,

⁶ Khan a vârna thu’rthup nan hretir a ta, vârna dik, mihriamhai inhriat phâkloi chu. Inhre ta ro, ni dikloina insâpin chu ni dengtheina hi ite la ni mah.

⁷ Pathian roiinpuina hi ni izong suak loi hrang mo? Itinrêngthothei hi hmu thei zôiin mo?

⁸ Irvân nêka irsâng a nia, Inhre zoi no chi ni; Seol nêka inthûktak a nia, nangin ite hmu thei no chi ni.

⁹ A’rzat lam chu rammual le tuikhanglian nêka irza a ni.

¹⁰ A hro chita, a khâra a bukhaiin chu, tu mo danh thei hrang?

¹¹ Mi chanlamboihai khom an hriata, dikloina khom a hmua, a zong no khomin.

¹² Rama sakuartungte mihriam angin a suak tena, mi pualoihaiin inhre thei an ti.

¹³ Ni lungrîl irput dân a dika, Ama tiang ni kut ni pharin chu,

¹⁴ Ni kuta dikloina a omin chu paiin lân, ni puan ina sual om phal no’n lân,

¹⁵ Lungthi takin lêng thei ni ta, ni dinghmun det a ta, chi hrang nei no chi ni.

¹⁶ Ni dengtheinahai irnghil ni ta, Tui luang angin inhre thei mai ta ni ti.

¹⁷ Ni nunchan chu sûn vâr angin vâr a ta, an thima khom zîng khovâr ang ni a ti.

¹⁸ Sabeina lian a om sikin nir tha irngam a ta, irhei vêl ni ta, lungngamin irngam ni ti.

¹⁹ Zâlin in ni ta, tûte’n nan chitir no nihai. mi tamtakin nang chongpui thei no nihai.

²⁰ Khannisian, mi pualoihai mit chu chanlamboiin, intân suakna lampui nei no nihai. An inghâkna tak khom thina vai a ni.