JEREMIA 9 - PATHIAN LEKHABU IRTHIANG C.L. Bible (BSI)

¹ Ki lu hi tuikuang ni sian, ki mitrithi hi tuipût ni ri se, ti ki inuam chu! Ki mi thata omhai hrangin, a sûn a zân ki ichap hrang a ni.

² Khual inzinhai hrang ramchâra tungna hrang tûngin om sianlân, ki mihai marakin kha khan om ki ta. An rêngin uire an nia, iamom loi pâl an ni.

³ Minlak tho hrangin an irfôk mai ngaia; Ram sûnga dikna nêkin irhuangna an lal tâka. Rengpa’n a ti, “Ki mihaiin thil saloi ata saloi thil dang an thoa, an Pathian an ni inhriat viat ta loi a ni,” a tia.

⁴ A tu mi khomin rualsa ata a irvêng ngêt hrang a ni. Tu mi khomin a urêngpa iam zoi no ni; a san chu tu urêngpa khom ni sian, Jakoba anga minlak a nia, tu mi khomin rualsa a hril insiat ngai.

⁵ Rual le rual an irhuanga, thudik insîr zel om mahai; Minlak tho an irchu irhlôma, sual sin thôna’n zoro an inhek ngai.

⁶ Tho’nchâina chu tho’nchâinain a zuia, irhuangna chu irhuangnain a zui ngai, a san chu nin hriat zel an tum no sika a ni, Rengpa’n a ti.

⁷ Hi sika hin Rengpa Pathianin a ti, “Thîr angin ki mihai irthît ki ta, anni ki ifiahai hrang a ni. Ki mihaiin sual an isin a nia. Imo ki la itho pehai thei hrang?

⁸ An mileihai chu thal tûr nei hrât tak ang a nia; Itiklai khomin thudik loi an hril ngai. Tu mi khomin a tualbômhai kuang chu chonghoi a thoa, an rîl tâk khomin, ama ta hrangin chong a ikam pe a ni.

⁹ Hi thilhai sika hin anni chu dûk ki itho loi hrang mo? Hianga nam chunga hin phuba ki ilâk loi hrang mo? Keima Rengpa’n ki iti a ni.

¹⁰ Keima’n, “Mual tin ta hrangin chûlpui angin ki om ta, sûlhring hmunhai hrangin chap ki ti, an châr zoi tâk sikin, Tûte khatak khan an zin nuam om ta mahai. Sa pâl irhâi inhriat hrang khom om ta ma, vâ le sahai khomin laizâm tho’n an rot zoi tâka,” ki tia.

¹¹ Rengpa’n a tia, “Jerusalem chu inram chim angin insiamtir ki ta, sihalhai fena hmun chang ta a ti. Judai ram khopui chu ramchâr chang a ta, tûte’n lua ta no nihai,” a tia.

¹² Keiin ki’rdona, “Rengpa i lo hranga ram insiatin, ramchâr anga ni inchâr, tûte inzin ta loi hranga siam a ini? A tu hi mo a vâr uala an hriatthiam hrang? Mi dang hril hrangin tu hi mo hi thilhai hrilinfel pehai hrang ni ipêk?,” ki tia.

¹³ Rengpa’n a ni sâma, “Ki mihai ki irchutirna pêk an mâksan sika hin, hi thil hi a itung a ni. Ki thuzômin ki inhrilhai, tho nuam mahaia.

¹⁴ An tukullianna sikin, an pahaiin an lei irchutirhai angin, Baal millimhai chubai an mûk a ni.

¹⁵ Khasikin keima Rengpa itinrêng thothei Israel Pathianin ki tho hrang hi irngai ro: ki mihai hloisûl kha fâk zât le tûr in hrang, ki ipêkhai hrang a ni.

¹⁶ Anni’n mo, an irchibulhaiin mo an inhriat loi namhai laia, anni chu irthekindartir ki ta, anni ki’rhmangtirhai zoi mâka chu doiin sipai pâl ki itîr hrang a ni,” a tia.

Jerusalem mihai changpui zongin an khêk

¹⁷ Rengpa Itinrêngthotheiin a iti a ni, “Imo thil a itung hi irngaitua ta roi! Mi châ theihai koi unglân, mithi chûlpuia hla sak thei nupang koihai roi,” a tia.

¹⁸ Mipuihaiin an iti chu, “I lo hranga mithi chûl hla sak pehai hranga ni ihril, kin mithai mitrithi’n a sip zoi mâka, kin mit vunhai chapna sikin mitrithi’n an duitir zoi mâka chu,” tiin.

¹⁹ Zion-a chap irhâi so irngai hi roi, “Ei insiat zoi tâk! Mual ei inphoi a ni ta! Ei ram hi ei imâk ngêt hrang a ni. Ei inhai lak chu a chim zoi tâka,” tiin.

²⁰ Ki iti chu, “Nupanghaio, Rengpa chong hi irngai unglân, a thuhai hi nin inhriat theina hrangin. Nin nâinupanghai chap dân irchuhai roi, nin rualhai mithi chûl hlasak dân irchutirhai roi.

²¹ Thinahai chu ei inkhâra a hong lûta, ei in roiinpui tak sûnga a hong lûta; Nâipanghai chu kotbâia a tuk inrîlhaia, kholaia ruatharhai khom a tuk inrîlhai ta.

²² Loi laia seêk pông angin, mithi ruakhai chu hmun tina a irthek zen zun a ni ta, Bu ât sai, a âttuhaiin an imâk, bu tukhomin an irtik bûm loi ang hin, hi hi Rengpa’n inpuang hranga a ni iti chu a ni.

²³ Rengpa’n a ti, “Mi vârhaiin an vârna, mi hrâthai khomin an hrâtna, irchonghai khomin an irchongna irpâkpui no ri sehai.

²⁴ Mi tukhom irpâk a nuamin chu, mi’n hrilin nin hril infelin inpâk ri se, ki lungthungna chu a det a ni sikin, thildik le thil fel tho ngaitu ki ni. Hi thilhai hin a nin lômtir ngai a ni,” ti hi keima Rengpa hin ki iti a ni.

^25-26 Rengpa’n a ti, “Aigupta mihai, Edom mihai, Amon mihai, Moab mihai le ramchâra om mihai, an sam ep inkolhai dûk tho hrang nî chu a hong inâi a ni ta. Hi mihai hi sertan chu an ni vinga, khan a inentir thuthung kha vong indik ngai mahai. Hihai laia tukhomin ki mi Israelhai tep sain ki thuthung an ivong indik loi a ni,” a tia.