JEREMIA 8 - PATHIAN LEKHABU IRTHIANG C.L. Bible (BSI)

¹ “Kha tena chu, Judai rama rênghai ru, mi lianhai ru, deipuhai ru, mi dang Jerusalema omhai ru khom an thâna irthokin lasuak ni a ti.

² Khataka a sin an itho, an zonga, an zuia, chubai an imûk ngai misa, tha, le irvâna ârsi murdi kôla phoi inlang ni an ti. Lâkkhôma omin phûm khom ni no nia, irnêng insatir ngai sahrok irnênga om angin an ruhai chu om a ti.

³ Khante hi nam sual tâk mi a la damhai hmun tina ki irthekindartirhai chu dam mai nêkin chu a thi inthang ual an ti,” Keima Rengpa Pathianin ki iti a ni.

Sual le hremna

⁴ Rengpa’n a mihai kuanga insîr hrangin a ni tîra, “Mi an irtetin an thoi nôk ngai mo ni ma? Mi’n lampui chaninvâi sianlân, a ikîr nôk ngai mo ni ma?

⁵ Khaang khan a ni ngânin te, o ki mihai itho mo hong kîr ta loiin hnung nin ni isongsan mai tâk hi? Nin millim nin intûk mai tâka, keima tiang hong kîr nuam ta mak chêia.

⁶ Nangni ki irngai chiana, tûte thu dik hril zel om mak chêi. Tu mi khom ni unglân, a thil tho’nsual sikin a poi ti maka, tu mi khomin, thil dik loi ki isin ma nih ta o! tiin irdonna siam ma, sakor irdoina hmun pana intân angin mi tin mâni lampui nin ipan chit a ni ta.

⁷ Tuichir le ivahai khomin kîr zoro an inhriata, vasuhai, pelôihai, le sâlvahaiin irthon zoro an inhriata. Khannisian ki mihaiin chu nangni rêlna hranga ki dânhai nin irnghil a ni.

⁸ Itin mo vâr nin irtia, ki dânhai kin inhriata, tiin nin irbe thei? En roi, dânhai chu lekha irziaktu iamom loihai indanglama om an ni ta.

⁹ Nin mi vârhai chu hmâimôk irsak an ni ta, lungzîngin an ir-ôk a ni ta, ki thuhai an hnôla, vârna nei ual an irtia.

¹⁰ Khasikin an loihai chu a chongpu thar kuang pe ki ta, an dôngmahai chu pasal danghai pehai ki ti. Mi tukhom, a chîn, a lianin dik loi taka sum lâklût an itum a ni. Deipuhai le ochaihai ten luan mipui an ihuanghai a ni.

¹¹ Ki mihai sâbe tuang khom ngaituahai ok loiin, ‘A thathaia,’ an tia, an dam zoi no khomin.

¹² Ki mihaio, hi thil porinchehai nin tho sikin nin inzak mo? a ni, ite inzak viat mak chêi; nin hmâi ten lua sen thei mah! Khasika khan mi dang an rîl tâkhai angin inrîl nin ta, dûk nangni ki tho ni tâka chu, nin mongna ni a ti, keima Rengpa’n ki iti a ni.

¹³ “Mi’n chîmu a ibukkhôm angin, ki mihai khom ki buk nuama; khan grep hrui ra boi angin, theipui ra boi, a hnâ khom thêm tâk angin nin oma, khasikin ram dang mihaiin ram hi an ilâk ki iphal a ni.

¹⁴ Itho sika ei itoi mai ma ni? Hong roi, khopui kul neihaia rot ei ta, so taka son va thi ei ti. A chunga ei tho’nsual sika khan Rengpa ei Pathianin thi hrangin thiamloi a nin chang tâk sikin, ei in hrangin tûr a ni ipêk tâk a ni.

¹⁵ Irtharngamna le indamna zoro ei tûnga, khan khom ite ar fêna om ma, hi nêkin chitna irkhêl kêng a zuang intung ual a ni.

¹⁶ Ei râlhai chu Dan khopuia an oma, an sakorhai hnârkhông irhâi khom ei inhriat a ni. A ram pumpui chu sakor inhrâm chiin an inthing a ni. Ei râlhaiin ei ram le a sûnga thil tinrêng ei khopuihai le a mihriamhai siatna hrangin an ihong a ni.

¹⁷ Khasikin irning roi, nin laia mirûl ki hong itîr hrang a ni, mirûl tûr hrâthaiin, nangni inchuk an ti,” Rengpa’n a ti.

A mihai ta hranga Jeremia milung natna

¹⁸ Ki milung natna hi indam thei ni ma, lungrîla na ki ni.

¹⁹ Ram dang le kha ki mihai chapna ki inhriat hi irngai roi. “Zion-a Rengpa chu a iom ta loi ma ni? Khatak khan Zion rêng chu a iom ta loi ma ni?” Rengpa an rêng khan a sâma. Ni millimhai chubai mûkin; nin ram dang pathian hmanghmunboihai makunga lu kûnin, “I lo hrang mo ki ning nin inmurtir,” a tia.

²⁰ Mipuihai khêk suaka, “Kholum a heka, favâng ar zoi tâka, khan khomin saninhringin la om mak me,” tiin.

²¹ Ki mihai lungnatna’n ki khêkpuia, ki chapa, lungzîngin ki om tâka;

²² Gilead thinghnâi hloi a iom ta loi ma ni? Kha khan nin damtir thei an iom loi mo? Khaang khan a ni’n teh itho mo ki mihai indamin an iom loi?